Read Mizo Lushai RORELTUTE 19 Bible Online

RORELTUTE 19 - Mizo Lushai bible

RORELTUTE 19

¹Israel rama lal an neih hma khân Levia chi mi pakhat Efraim tlângram tâwpah a awm a, Judai ram Bethlehem khuaa mi hmei a nei a.

²A hmei chuan a kalsan a, a pa in lamah, Judai ram Bethlehem khuaah chuan a haw a, thla li lai a awm a.

³A pasal chu a tho va, ṭawng ṭhaa thlêma hruai kîr leh tumin chhiahhlawh pakhat leh sabengtung pahnih nên a va kal a. Hmeichhia chuan a pa inah a hruai lût a; hmeichhe pa chu a lâwm hle a.

⁴Hmeichhe pa, a puzawn chuan a chelh a; ni thum chu an eiin an in a.

⁵A ni li ni chuan zîngah an tho va; ani pawh chu chhuah tumin a tho va; mahse, a puzawn chuan, “Eng emaw tal ei zet ula, in chhuak dâwn nia,” a ti a.

⁶Tichuan, an ṭhu ho va, an eiin an in ta a. A puzawn chuan, “Zânin chu riak leh mai rawh u, hmanhmawh tehchiam a ṭûl lo ve,” a ti a.

⁷Chumi ni chuan chhuah an han tum leh a; mahse, a puzawn chuan a chelh leh a, an châm leh ta a.

⁸A ni nga ni chuan chhuak tawh tûrin zîng takah a tho va, a puzawn chuan, “Ni nêm deuh hma chu awm rih ula, eng emaw tal chu ei rih teh u,” a ti a.

⁹A hmei nên, a chhiahhlawh nên kal tûra an han thawh chhuah chuan a puzawn chuan, “Ngawi teh u, khua a va tlai ta ve, châm leh rih mai teh u; ni a tla dâwn mai tawh si a, hetah riak ula, chaw te i ei ho leh teh ang u. Naktûk zîngah in tho vang a, in khaw ban tûrin in chhuak dâwn nia,” a ti a.

¹⁰Mahse, châm leh chu a duh lo va, a tho va, a chhuak ta a. Jebus-ho khua Jerusalem khaw bul chu, a thawmhnaw phur sabengtungte nên chuan an thleng a, a hmei pawh chu a tel ve a.

¹¹Jebus-ho khua an thlen chuan ni a hniam hle tawh a, a chhiahhlawh chuan, “En teh, Jebus-ho khuaah hian i riak mai ang u,” a ti a.

¹²A pu chuan, “Israel mi ni lo, hnam dang khuaah kan riak tûr a ni lo. Gibea khua i pan ang u,” a ti a.

¹³A chhiahhlawh hnênah chuan, “Gibea khuaah emaw, Rama khuaah emaw kan riak ang chu,” a ti a.

¹⁴An kal ta zêl a Gibea khua an thlen chuan ni a tla ta a. Gibea chu Benjamin-ho khua a ni.

¹⁵Riah tumin Gibea khua chu an pan a, thleng tûra lo sâwm tu mah an awm loh avângin khawpui tual laili chu an pan a, an ṭhu ta a.

¹⁶Tlaiah putar pakhat feh haw hi a lo kal a; amah chu Efraim tlângram mi a ni a, Gibea khuaah a awm ve mai a ni; Gibea mite chu Benjamina thlahte an ni.

¹⁷Chu mi chuan khawpui tual laili chu a han en chuan mikhual ṭhu a hmu a, “Khawi lamah nge i kal dâwn? Khawi aṭanga lo kal nge i nih?” a ti a.

¹⁸Ani chuan, “Judai ram Bethlehem-ah kan va kal a, Efraim tlâng ram tawpa kan awmnaah kîr leh tur kan ni a, LALPA inah kal kan tum a ni; tu mah min thleng duh an awm lo va ni.

¹⁹Sabengtung ei tûr buhpâwlte pawh kan intodelh a, kei leh i bawihnu leh tlangvâl tân pawh chaw ei tûr kan nei: neih loh eng mah kan nei lo,” a ti a.

²⁰Putar chuan, “Mangang hauh suh u, in mamawh zawng zawng chu ka tum vêk ang, khawlaiah zawng riak lul teh suh u,” a ti a.

²¹Tichuan, a inah a hruai lût a, sabengtungte chu buhpâwl a pe a, an ke an sil a, an eiin an in ta a.

²²Hlim taka chaw an ei lai chuan khawpuia mi sual rual chuan in chu an rawn hual a, kawngka chu an rawn chhuih dawt dawt a, in neitu putar hnênah, “I mikhualpa kha han hruai chhuak teh, kan lo pâwl ang e,” an ti a.

²³In neitupa chu a chhuak a, “Ni lo ve, ka unaute u, chutiang thil ṭha lo tak chu tih tum teh suh u; he mi hi ka ina thleng a ni a, he thil ṭha lo hi a chungah ti suh u.

²⁴En teh u, ka fanu, mipa la pâwl loh leh he mi hmei hi, ka rawn la chhuak ang a, in duh leh in tlâwm ang a, in duh ang angin in sawisa dâwn nia; he mi chungah erawh hi chuan thil ṭha lo ti teh suh u,” a ti a.

²⁵Mite chuan a thu an ngaithla duh lo va; chutichuan, kha mi khân a hmei chu a hruai chhuak a, an lo pâwl a, zânkhuain an sawisa a, zîng a lo niha, ni a lo lan dâwn chuan an chhuah ta a.

²⁶Hmeichhia chu zîngah a pasal thlenna inah chuan a lo kal a, kawngka bulah chuan a tlu tawp a, khaw ên hma chu a awm ta a.

²⁷A pasal chu zîngah a tho va, kal chhuah tumin kawngka chu a han hawng a, a hmei chu kawngka bulah chuan a lo let dêr a, a kut chuan kawngka chu a ban a.

²⁸A hnênah, “Tho teh, i kal ang,” a ti a; chhâng tûr a lo awm tawh lo va. A sabengtung chungah chuan a dah a, a tho va, a in lamah chuan a haw ta a.

²⁹In a va thlen chuan chem a la a, a hmei fuke chu sâwm leh pahnihah a chan sawm a, Israel ram chhûngah chuan a thawn darh ta vek a.

³⁰A lo hmu apiang chuan, “Israel-te zîngah Aigupta ram ata an lo chhuah aṭanga tûn thlengin hetiang thil hi a la awm ngai lo; ngaihtuah ula, inrawn khâwmin ngaih dân i sawi teh ang u,” an ti a.