Read Mizo Lushai RORELTUTE 2 Bible Online

RORELTUTE 2 - Mizo Lushai bible

RORELTUTE 2

¹Gilgal aṭangin LALPA Vântirhkoh Bokim khuaah a lo kal a, Israel-te hnênah chuan, “Aigupta ram aṭangin ka hruai chhuak che u a, in pate hnêna pêk ka tiam ramah chuan ka thlen che u a; ‘ka thuthlung hi ka bawhchhe ngai lo vang; rama lo awmte nên chuan

²thuthlung in siam tûr a ni lo va, an maichâmte in ṭhiatsak tûr a ni’ ka ti a; mahse, ka thu awih duh lovin eng thil nge in tih tâk le?

³Chuvângin, ka hrilh a che u, in hmaah hêngho hi ka hnawt chhuak dâwn lo: in tân hmêlma an ni ang a, an pathiante be tûrin an zâwl thlu ngei ang che u,” a ti a.

⁴LALPA Vântirhkohvin chûng thu a han sawi zawh chuan Israel-te chu an ṭap ta hawm hawm a.

⁵Chuvângin, chu khua chu Bokim an ti ta a ni. Chutah chuan LALPA hnênah thilhlan an hlân a.

⁶Josua chuan Israel mite chu a ṭintîr a; mahni chan ram ṭheuh luah tûrin an kal ta sang sang a.

⁷Josua dam chhûng zawng chuan Israel mite chuan LALPA rawng an bâwl a. Josua thih hnuah pawh, Israel upaho, LALPA thiltih hmu phâkte dam chhûng chu a rawng an bâwl zêl a.

⁸LALPA chhiahhlawh Nuna fapa Josua chu kum za leh sâwma upa a nihin a thi a.

⁹Gaza tlâng hmâr lam, Efraim tlângrama ama ram chanpual Timnat-heres-ah an phûm ta a.

¹⁰Chûng upaho pawh chu an thi fai a, LALPA hre ngai lo, Israel-te tâna a thiltih hre ve pha lo, ṭhangthar an lo ṭhang lian a.

¹¹Tichuan, Israel-te chuan LALPA ngaihmawhzâwng thil sual an ti a, Baal-te kha an be ve ta mai a.

¹²Aigupta ram aṭanga hruai chhuaktu, an pate Pathian, LALPA chu an hawisan a, an chhehvêla awm pathiante lam chu an hawi a, an be ve ta a: LALPA chu an tithinur ta a ni.

¹³LALPA hawisanin Baal te, Astarte te chibai an bûk ta a.

¹⁴Israel-te chungah, LALPA chu a thinur ta êm êm a, suamhmangte a rawktîr a; an vêla awm hnam dangte kutah a pe a, an ngam ta lo a ni.

¹⁵Indo tûra an thawh chhuah apiangin a sawi ang ngeiin LALPA chu an lamah a ṭang ta awzâwng lo va, an mangang êm êm ṭhîn.

¹⁶LALPA chuan anmahni sawisatute laka chhantu tûr hruaitute zawng a pe ṭhîn;

¹⁷mahse, chûng hruaitute thu chu an ngaithla duh lo va, pathian dang an ûm a, chibai an bûk leh mai ṭhîn. An pate chuan LALPA thupêkte chu an zâwm a; mahse, an pate awm dân chu an zâwm ve duh ṭhîn lo.

¹⁸LALPA chuan hruaitute a rawn pêk khân, a pêka chu a awmpui a, a dam chhûng chu an hmêlmate lakah a hum ṭhîn; anmahni tiretheia rapbettute avânga an rûm chu LALPA chuan a khawngaih ṭhîn a ni.

¹⁹An hruaitu chu a thih chuan an lamlêt a, an pate ai mahin an khawlo zâwk ṭhîn; pathian dang biak leh chibai bûk an uar sauh va, hnam dang tih dân tinrêng an la a, an luhlul a zual ṭhîn.

²⁰Israel-ho chungah LALPA thinrim chu a alh ṭhîn a, “An pate zâwm tûra ka tih ka thuthlung chu he chite hian an bawhchhia a, ka aw lah an ngaithla duh hek lo; Josua a thiha, hnam dang a hnawh chhuah lohte kha

²¹kei pawhin ka hnawt chhuak tawh bîk lo vang;

²²chûngho chu, an pate angin ka kawng an zawh dâwn nge dâwn lo fiah nân ka hmang dawn a ni,” a ti a.

²³Chuvângin, Josua kha, hêngho hi a hnawhchhuahtîr mai lo va, a awmtîr ta zêl a ni.