Read Mizo Lushai RORELTUTE 20 Bible Online

RORELTUTE 20 - Mizo Lushai bible

RORELTUTE 20

¹Israel mi zawng zawng chu thukhat vuain Mizpa khuaah LALPA hmaah an pung khâwm a, Dan leh Beer-seba khaw inkâra mi zawng zawng leh Gilead ram mite nên an lo kal khâwm a ni.

²Israel hnam tin hruaitute pawh Pathian mite pungkhâwmho zîngah chuan an tel a. Khandaih lek thei ṭhalh mi nuai li an tling a.

³Benjamina thlahte chuan Israel-te chu Mizpa khuaah an pung khâwm tih an lo hria a. Israel mite chuan, “Engtin nge he thil ṭha lo tak hi a lo thlen dân han sawi chiang teh,” an ti a.

⁴Levia chi, an thah tak hmeichhe pasal chuan, “Benjamin-ho khua Gibea ka va thleng a, ka hmei nên hian kan riak a.

⁵Gibea mite chu zânah mi bei tûrin an lo thawk a, ka thlen in an rawn hual a; min thah an tum a, ka hmeinu chu an sual lui a, a thi ta hial a ni.

⁶Ka hmei chu inah ka hâwn a, a fuke chu ka chan a, Israel ramah ka thawn darh a nih kha; hetiang khawpa tenawmin an hur a ni.

⁷Ngai teh u, Israel fate u, hetah in awm kim vek a, engtia tih tûr nge in ngaih dân sawi teh u,” a ti a.

⁸Mipui zawng zawng chu thukhat vuain an tho va, “Puan ina awm kan ni emaw, ina awm kan ni emaw, tu mah kan haw lo vang.

⁹Hetiang hian Gibea chu kan sawisa ang: ṭhumvâwrin kan inbeih chhâwk ang a.

¹⁰Israel-te zinga mi sawma pakhat zelin mipuite ei tur an hlân ang a, mi dang chuan Gibea mite chu hetiang hurna thil tenawm hi an tih avâng hian an ching nek dâwn a ni,” an ti a.

¹¹Tichuan, Israel rama mipa zawng zawng chu lungrual takin khua chu tihchhiat tumin an pung khâwm a.

¹²Israel hnamte chuan Benjamin-ho hnam ram tinah zualko an tîr a, “Engtizia nge hetiang thil sual hi in tih le?

¹³Gibea khaw mi, hetiang mi khawloho hi han hruai ula, kan lo that ang e, hetiang thil sual hi Israel zîngah kan tiboral tûr a ni,” an ti a. Mahse, Benjamin-ho chuan Israel-ho thu chu engah mah an ngai lo va.

¹⁴Benjamin-ho khaw tin aṭang chuan Israel mi dangte lo bei tûrin Gibea khuaah an lo kal khâwm a.

¹⁵Gibea khuaa mite bâkah Benjamin mi khaw hrang hrang aṭanga lo kalte chu khandaih keng ṭhalh sînghnih leh sângruk an ni. Gibea mi pawh, thlan chhuah ṭhalh zasarih an ni.

¹⁶Hêng mi thlan chhuah zînga zasarih chu veikhawr an ni a, virvawmin samzai pawh ṭhelh lovin an vawm chhum thei a ni.

¹⁷Israel mi, Benjamin-ho bei tûr chu mi nuaili, khandaih keng ṭhalh, indonaa kal tawh vek an ni.

¹⁸Israel mite chu an tho va, Bethel-ah an kal a, Pathian an râwn a, “Benjamin-ho bei tûrin tu hnam nge kal hmasa ang?” an ti a. LALPA chuan, “Juda thlahte kal hmasa rawh se,” a ti a.

¹⁹Israel mite chu zîngah an tho va, Gibea khua hualin bûk an khuar a.

²⁰Benjamin-ho bei tûr chuan an thawk chhuak a, khaw ep chuan an sipaite an tlar a.

²¹Benjamin-ho chu Gibea khua aṭang chuan an lo chhuak a, chumi ni chuan Israel mite chu mi sînghnih leh sânghnih an that a.

²²Israel mite chu an infuih sauh sauh va, a hma nia bei tûra an han insiamna hmunah vêk khân an han intlar a.

²³Chumi ni hma chuan Israel-te chu LALPA hmaah ṭapin tlai thlengin an awm a, “Kan unau Benjamin-ho bei tûrin kan thawk leh ang em?” tiin an zâwt a. LALPA chuan, “Bei leh rawh u,” a ti a ni.

²⁴A ni hnih ni pawh chuan Israel-te chu Benjamin-ho bei tûr chuan an thawk leh a.

²⁵Benjamin-ho chu a ni hnih ni pawh chuan Gibea khua aṭangin an lo chhuak a, khandaih keng ṭhiau mi sîngkhat leh sângriat an that leh ta a.

²⁶Israel mi zawng zawng chu Bethel-ah an chho va, LALPA hmaah an ṭap a, an ṭhu a, tlai thlengin chaw an nghei a, hâlral thilhlan leh remna thilhlan an hlân a.

²⁷Chûng lai chuan Pathian Thuthlung Bâwm chu chutah chuan a awm a, LALPA chu an râwn a.

²⁸Arona fa Eleazara fapa Finehasa chu bâwm hmaah chuan a ding a, “Benjamin-ho, kan unaute bei tûrin kan thawk leh dâwn nge dâwn lo?” tiin a zâwt a. LALPA chuan, “Kal leh rawh u, naktûk chuan in kutah ka pe ang,” a ti a.

²⁹Israel mite chuan Gibea khaw bulah chângrutu an dah a. Ni dang ang bawkin Israel-te chu, a ni thum ni chuan Benjamin-ho bei tûr chuan an han intlar a.

³⁰Benjamin-ho chu bei lêt tûrin an lo thawk a, khua ata chu an tlân chhuak a; ni dang ang bawk khân lovah te, kawngpui - Bethel leh Gibea panna kawngah te chuan Israel mi sawmthum zet an that leh ta mai a.

³¹Benjamin-ho chuan, “Tûn hma ang bawk khân kan that leh ta e,” an ti a.

³²Israel-te chuan, “Tlânchhia ila, khawpui ata kawngpuiah hian min rawn ûm sela, lo chhuak teh se,” an ti a ni.

³³Israel sipai nâwlpui chu Baaltamar-ah an tlân khâwm a, ṭan an lo la ta a; tin, Gibea khaw huala lungpui kâra biruho kha an lo zuang chhuak bawk a.

³⁴Chûng mi thlan bîk sîngkhat chuan Gibea khua chu an bei ta chiam a, Benjamin-ho chuan an ralthum dâwn tih rêng an inhre lo.

³⁵LALPA chuan Israel-te chu Benjamin-ho a hnehtîr a, Israel-te chuan mi sînghnih leh sângnga leh za lai an that.

³⁶Benjamin-ho chuan an chan a chhe ta dêr tih an inhre ta a. Israel sipai bupui chuan Gibea khua huala châng rutu an dahte kha rinchhanin an tawlh kîr a ni.

³⁷Gibea khuaah chuan an tlân lût a, an insem darh a, an hmuh apiang an that a.

³⁸Israel sipai bupui leh biruho khân rem an insiam a, khua aṭangin mei khu luih luih an hmuh chuan,

³⁹indona hmuna Israel awmte chu lo lêt tûr an ni. Benjamin-ho khân Israel mi sawmthum an that hman tawh a, “Tûn hmaa kan tih ang bawkin kan ti leh dâwn e,” an ti a.

⁴⁰Khua aṭanga mei a khûk chhoh ngut ngut veleh Benjamin-ho chuan an han thlîr lêt a, khua a kâng ta vek tih an hmuh chuan mak an ti êm êm a.

⁴¹Israel-te pawh an lo lêt a; Benjamin-ho chuan tihhlum vek an ni mai dâwn tih an inhriat chuan an chiai zo ta a.

⁴²Israel-ho lak aṭang chuan an tawlh kîr a, tu ma awm lohna lamah tlân an tum a; mahse, an tlân chhuak thei lo, sipai nâwlpui leh khua aṭanga lo tlân chhuakte khân lehlam lehlamah an bei a ni.

⁴³Israel-te chuan an hmêlmate chu ruangchaicheh an thlâk hnan a, Gibea chhak lamah an tlân a, an ûm a, an that zêl a.

⁴⁴Benjamin sipai ṭha ṭha mi sîngkhat leh sângriat an that a.

⁴⁵A ṭhen chu Rimon pûk panin an tlân a, kawngah mi sângnga lai chu an thi bawk a. Israel-te chuan Gidom thlengin an ûm a, mi sânghnih chu an that a.

⁴⁶A vaiin Benjamin-ho chu mi sînghnih leh sângnga, indo mi hlîr, an thi a ni.

⁴⁷Mi zaruk erawh chu Rimon pûkah an tlân a, thla li lai chutah chuan an awm a.

⁴⁸Israel-te chu Benjamin-ho chungah chuan an che zêl a, mipa pawh, hmeichhia pawh, naupang pawh, an rante chenin an that fai vek a. Chûng lai vêla an khua zawng chu an hâl vek bawk a.