Read Mizo Lushai RORELTUTE 21 Bible Online

RORELTUTE 21 - Mizo Lushai bible

RORELTUTE 21

¹Israel-te Mizpa khuaa an pun khâwm khân LALPA hmaah thu an tiam tlat a, “Tu mahin kan fanute Benjamin-ho kan neihtîr lo vang,” an ti a.

²Israel mite chu Bethel-ah an kal a, Pathian hmaah tlai thlengin an ṭhu a, ring tak leh lungchhe takin,

³“Aw LALPA, Israel-te Pathian, hetiang thil hi engtia lo thleng nge ni le, Israel-te zîngah Benjamin thlah an boral mai bîk dâwn hi,” an ti a.

⁴A tûkah chuan zîng takah maichâm an siam a, remna thilhlan leh hâlral thilhlan an hlân a.

⁵“Israel hnam zîngah Mizpa khuaa kal khâwmnaa tel ve lo an awm em?” tiin an inzâwt a. Mizpa khuaa kal lo chu tihhlum tûr an ti a, kal lo an awm lo a ni.

⁶Israel-te chuan an unau Benjamin-ho chu an khawngaih a, “Vawiin hian Israel-te chuan kan zînga hnam pakhat kan chân dâwn alâwm.

⁷Benjamin hnam la damte tân nupui engtin nge kan zawnsak ang? LALPA hmaah kan fanute chu neihtîr tawp lo tûrin thu kan lo tiam tlat tawh si a,” an ti a.

⁸Mizpa khuaa inkhâwmpuia kal ve lo hnam an awm em tia an han inzawh chian chuan Gilead ram, Jabes khaw mi lo chu an awm vek a.

⁹Hming an han lam khân Jabes khaw mi chhâng tûr an awm lo.

¹⁰Pungkhâwmho hotute chuan an zînga mi huaisen sîngkhat leh sânghnih an tîr a, “Kal ula, Jabes khuaa mi zawng zawng, hmeichhia leh naupang lamin va that rawh u.

¹¹Mipa that vek ula, hmeichhia pawh, mipa pâwl tawh chu that vek ang che u,” an ti a.

¹²Jabes-ho zîngah chuan nula, mipa la pawl loh zali an hmu a, Silo-ah Kanan ramah chuan an rawn hruai a.

¹³Rimon pûka awm Benjamin-ho hnênah palai an tîr a, beih an tum tawh loh thu an hrilh a.

¹⁴Benjamin-ho chu an lo kîr a, Israel-te chuan Jabes nula, an thah lohho chu, nupuiah an pe a; mahse, an indaih lo.

¹⁵LALPA chuan Israel inpumkhatna a tihdarh tâk avângin mite chuan pawi an ti a, Benjamin-ho chu an lainat a.

¹⁶Pungkhâwm hotute chuan, “Benjamin zîngah nupui tûr hmeichhia an awm tawh si lo,

¹⁷nupui tûr la nei ve lote tân engtin nge nupui kan zawnsak ang? Israel-te hian kan zînga hnam pakhat mang kan phal tûr a ni lo.

¹⁸Benjamin-ho din chhuah lehna ngaihtuahpui tûr a ni; kan fanute lah kan neihtîr thei si lo: ‘mahni fanu Benjamin mi neihtîr chu ânchhia dawng rawh se,’ kan lo ti tawh si a,” an ti a.

¹⁹“Ngai teh u, LALPA tâna kum tin Silo khuaa kût awm ṭhîn chu a hun leh ṭêp tawh alâwm,” tiin an ngaihtuah a. (Silo hi Bethel hmâr lam, Bethel aṭanga Sekem panna lamlian khawchhak lama awm, Lebona chhima awm a ni).

²⁰Benjamin thlahte chu thu an pe a, “Kal ula, grep huanah te lo châng ru ula,

²¹Silo khaw nulate lâm tûr an lo chhuak ang a, grep huan aṭang chuan lo chhuak ula, Silo nulate chu mahni nupui tûr ṭheuh lo man ula, Benjamin ramah in hâwnpui dâwn nia.

²²An paten emaw, an nuṭaten emaw an rawn sawi buai dâwn pawhin, ‘Khawngaih takin neih hlentîr mai teh u, râl anga inbeiin nupuiah an man pawh a ni lo va; nangni lahin in duh thu-a in pêk a ni hek lo va, in thutiam pawh in bawhchhe hlei nem,’ kan lo ti ang e,” an ti a.

²³An sawi ang chuan Benjamin-ho chuan an ti a, Silo khuaa nula lâm zînga mi mahni nupui tûr ṭheuh an man a, an ramah an hâwnpui a, an awm ta a.

²⁴Israel dangte chu mahni ram chanpualah an chi leh hnam ram ṭheuhvah an haw ta a.

²⁵Chutih lai chuan Israel ramah lal an awm lo, ṭha an tih ang angin mi tin an awm mai a ni.