Read Mizo Lushai RORELTUTE 3 Bible Online

RORELTUTE 3 - Mizo Lushai bible

RORELTUTE 3

¹Kanan ram rûnnaa tel pha lote fiah nân hêng hnam ṭhenkhat hi LALPA chuan a la zuah a ni.

²Israel thlah, ṭhang lo thar zêl te, indonaa la tel ngai lohoten indo an zir theih nân a zuah a ni.

³Chûngte chu: Filistia lal panga te, Kanan mi zawng zawng te, Zidon mi te, Lebanon tlâng, Baal-hermon leh Hamat kalkhâna awm Hiv-ho te an ni.

⁴An pate hnêna LALPA thupêk, Mosia a hrilh kha, Israel-te chuan an zâwm dâwn nge dâwn lo tih tilang chiang tûrin hêng mite hi a ruat a ni.

⁵Israel-te chu Kanan mi te, Hit mi te, Amor mi te, Periz mi te, Hiv mi te leh Jebus mi te zîngah an chêng a.

⁶Chûnghote nên chuan nupui pasal an inneih pawlh a, an pathiante chu an be ve ta a.

⁷Tichuan, Israel-te chuan LALPA ngaihmawhzâwng thil sual an ti a, an Pathian, LALPA chu an hawisan a, Baal-te leh Aseri-te chu an be ve ta a.

⁸Chuvângin, LALPA chu Israel-te chungah a thinur a, Aram-Naharaim ram lal Kusan-risathaima a hnehtîr a. Israel-ho chu a thuhnuaiah kum riat an awm a.

⁹Israel-te chuan LALPA chu an au va; Kenaza fapa, Kaleba nau, Othniela chu LALPA chuan Israel-te chhan chhuak tûrin a tîr a.

¹⁰LALPA thlarau chu a chungah a awm a, Israel-te chu a ho ta a. Indo tûrin a thawk chhuak a, LALPA chuan Aram-Naharaim lal Kusan-risathaima chu a hnehtîr a, a kut ata Israel-te chu a chhan chhuak ta a.

¹¹An ram chu kum sawmli chhûng a râlmuang a. Kenaza fapa Othniela chu a thi ta a.

¹²Israel-te chuan LALPA ngaihmawhzâwng thil sual an ti leh a. LALPA chuan Moab lal, Eglona chu Israel-te ai chuan a tichak ta a.

¹³Amon mite leh Amalek mite a ṭanrualpui a, Israel-te chu a bei a, a hneh a; tûmzâwl khawpui Jeriko chu a chhuhsak a.

¹⁴Israel-te chu Moab lal Eglona hnuaiah kum sâwm leh kum riat an awm a.

¹⁵Mahse, Israel-ten LALPA chu an au va, chhantu tûr a pe a. Chu mi chu Benjamin thlah, Gera fapa, Ehuda, veikhawr a ni. Israel mite chuan Moab lal Eglona chu thilpêk an thawn a.

¹⁶Ehuda chuan chemte hriam tawn, tawng khat dâwn laia sei a chher a, a puan hnuai, a malpui ding lamah chuan a thukru a.

¹⁷Moab lal Eglona chu pa thau zet hi a ni a. Ehuda chuan thilpêk chu a han pe a;

¹⁸thilpêk a pêk zawh chuan a kengtute chu a tîr haw a.

¹⁹Gilgal lung khur aṭangin ani chu a kîr leh a, “Lalber hnênah thurûk thlen tûr ka nei e,” a ti a. Ani chuan a ṭhuihruaite hnênah, “Min chhuahsan teh u,” a ti a. An chhuahsan ta a.

²⁰A pindan chungnung thawveng takah chuan amah chauhvin a lo ṭhu a. Ehuda chuan, “I hnênah Pathian thuchah sawi tûr ka nei,” a ti a. A ṭhutna ata chu a lo tho va.

²¹Ehuda chuan a vei lam chuan a khêl ding lama chemte chu a phawi a, a dulah chuan a vit ta thawih a.

²²Chemte fawng chu a tlum hial a, a fawng a pil avâng chuan a phawi lo; hnung lamah chemte lu chu a lawr tut mai a.

²³Bathlarah Ehuda chu a chhuak a, pindan chungnung chu a khâr a, a kalh hnan ta a.

²⁴A chhuah daih hnu chuan lal chhiahhlawhte chu an lo kal a, pindan kawngka chu a lo inkalh a. ‘A pindan rilah a daikal a ni ngei ang,’ an ti a.

²⁵Rei tâwk ta nia an hriat hnu chuan chabi an la a, kawngka chu an han hawng a, an pu chu a thi a; chhuatah a lo lum reng a.

²⁶An buai liai liai chhûng chuan Ehuda chu a chhuak a, lung khur a kal pêl a, Seira-ah a tlân ta a.

²⁷Efraim tlângram a han thlen chuan tawtawrâwt a hâm a, Israel-te chuan tlângram aṭang chuan an zui chhuk a, anin hma a hruai a.

²⁸An hnênah, “Min zui rawh u, in hmêlma Moab-ho chu in kutah LALPA chuan a pe ta e,” a ti a. Ani chu an zui chhuk a, Jordan lui kai chu Moab-ho an chhuhsak a, tu mah an kaitîr lo.

²⁹Chumi ni chuan Moab-ho chu mi sîngkhat lai an that a ni, mi hleitling tak tak, an pasalṭha rualte chu; tu mah tlân chhuak an awm lo.

³⁰Chumi ni chuan Israel-te chuan Moab-ho chu an titlâwm a. Ramah chuan kum sawmriat chhûng râlmuangin an awm a.

³¹Ani thih hnu chuan Anata fapa Samgara pawhin Filistia mi zaruk zet bâwng chhunna tiangin a vaw hlum a, ani pawhin Israel-te chu a chhan chhuak ve a ni.