Read Mizo Lushai RORELTUTE 4 Bible Online

RORELTUTE 4 - Mizo Lushai bible

RORELTUTE 4

¹Ehuda thih hnu chuan Israel-ten LALPA ngaihmawhzâwng thil sual an ti leh ta a.

²LALPA thuin Kanan lal Jabina chuan Israel-te a hneh a, Hazor khuaah a lal a; a sipai hotu chu Haroset-goim-a awm Sisera a ni.

³Thîr-tawlailîr zakua a nei a, kum sawmhnih chhûng chu Israel-te a tirethei êm êm a, Israel-te chuan LALPA an au va.

⁴Zâwlneinu, Debori, Lapidota nupui chu Israel-ho zînga thusa ber a ni.

⁵Efraim tlângrama Bethel leh Rama khaw inkâr, Debora khuaa tûm thing hnuaiah a ṭhu a, Israel mite chuan a hnênah thu an rawn thlen ṭhîn.

⁶Kedes-naftali-a awm Abinoama fapa Baraka chu a ko va, a hnênah, “Israel-te Pathian chuan ‘Naftalia leh Zebulun thlahte aṭangin mi sîngkhat hruaiin Tabor tlâng lamah kal rawh,’ a ti che a ni lâwm ni?

⁷Kanan lal Jabina sipai hotu Sisera chu a thîrtawlailîrte leh a sipaite nên Kison luiah ka rawn hruai ang a, i kutah ka rawn pe dâwn a che a tih kha,” a ti a.

⁸Baraka chuan, “I kal ve dâwn chuan ka kal ang a, i kal dâwn loh chuan ka kal bîk lo vang,” a ti a.

⁹Debori chuan, “Ka kal ve nâng e; i kal pawhin i ropui phahna tûr a nih dâwn loh hi; LALPA chuan Sisera chu hmeichhia a thahtîr dâwn e,” a ti a. Debori chu a tho va, Baraka nên Kedes an pan a.

¹⁰Baraka chuan Naftali leh Zebulun-ho a ko khâwm a, mi sîngkhat chuan an zui a, Debori pawh a kal ve a.

¹¹Ken mi Hebera chu Mosia puzawn Hobaba thlah a ni a, Ken-ho zîng ata chu a tla hrang a, Elon-Bazananim bul Kedes vêlah chuan bûk a rawn khuar a.

¹²Tabor tlâng lamah Abinoama fapa Baraka a kal thu Sisera chu an hrilh a.

¹³Sisera chuan a thîr-tawlailîr zakua chu a khalh khâwm a, Haroset-goim aṭanga a sipai zawng zawng chu Kison luiah chuan a hruai a.

¹⁴Debori chuan Baraka hnênah, “Tho teh, vawiin hian LALPA chuan i kutah Sisera hi a pe dâwn. LALPA chuan i hma a hruai a ni lâwm ni?” a ti a. Tichuan, Baraka chu Tabor tlâng aṭang chuan a sipai sîngkhat nên an chhuk a.

¹⁵Baraka chuan Sisera chu khandaihin a bei thut a, LALPA chuan Sisera chu a thîr-tawlailîrte leh a sipaite nên a tichiai zo ta a. Sisera chu a tawlailîr ata a chhuk a, kein a tlânchhia a.

¹⁶Baraka chuan tawlailîrte leh sipaite chu a ûm a, Haroset-goim thlengin a ûm a, Sisera sipaite chu a sât hlum vek a, pakhat mah tlân chhuak an awm lo.

¹⁷Sisera chu Ken mi, Hebera nupui Jaeli puan inah a tlân lût a, Hazor lal Jabina leh Hebera chhûngte chu an inrem rêng a ni.

¹⁸Sisera hmuak tûrin Jaeli chu a tlân chhuak a, “Lo tlân teh, ka pu, ka hnênah lo biru rawh; hlau rêng rêng suh,” a ti a. A puan inah chuan a tlân lût a, puanin a khuh a.

¹⁹Sisera chuan, ‘Tui in tûr mi han pe teh, ka tui a hâl e,” a ti a. Bâwnghnute bûr a hawng a, a intîr a; amah chu a khuh leh ta a.

²⁰Sisera chuan, “Puan in kawngkaah khân awm la, mi an lo kala, ‘Hetah awm an awm êm?’ tia an zawh che chuan, ‘awm lo’ i ti dâwn nia,” a ti a.

²¹Hebera nupui chuan puan in khenbehna leh tuboh a la a; a muthilh hnu chuan zawi têin a va lût a; a bekah khenbehna chu a khêng lût a, leiah a khêngbêt ta tlat a; a mu nghet hle a, a thi nghâl ta a.

²²Baraka chuan Sisera chu a rawn ûm a, Jaeli chu hmuak tûrin a lo chhuak a, a hnênah, “Lo kal teh, i mi zawn chu ka entîr ang che,” a ti a. An lût dûn ta a, Sisera chu a lo thi reng a, puan in khenbehna chu a bekah a bûr ngur mai a.

²³Chumi ni chuan Israel-te hmaah Kanan lal Jabina chu LALPA chuan a titlâwm a.

²⁴Kanan lal Jabina chu Israel-te chuan an hneh zui ta zêl a, a tâwpah phei chuan an tiboral thei ta a.