Read Mizo Lushai RORELTUTE 5 Bible Online

RORELTUTE 5 - Mizo Lushai bible

RORELTUTE 5

¹Chumi ni chuan Debori leh Abinoama fapa Baraka chuan hetiang hian hla an sa a:

²Hotu ṭhaten an ho meuh chuan Mipuiin an zui dûl dûl mai, châk takin, LALPA chu fak rawh u.

³Lalte u, ngaithla ula, Hotute u, bengchhi teh u; LALPA fakin zai ka vâwr dâwn e. Israel-te Pathian, LALPA chu ka chawimawi ang.

⁴Aw LALPA, Seir tlâng i kalsan a, Edom ram i chhuahsan khân, Lîrpui a nghîng a, khuangruah a sûr a, Ruahthimpui a lo hâwn kha.

⁵ LALPA hmaah chuan tlângte an khûr a, A saw Sinai tlângpui meuh pawh saw A sai hlawk hlawk e, Israel-te Pathian, LALPA hmaah.

⁶Anata fa Samgara leh Jaeli vânglai khân Lampui a ṭhing ṭhuap a, Khualzinte chuan kawngṭum an zawh.

⁷Debori a lo chêt hmaa, Israel-nu a lo thawh hma khân, An awm lo ve, Israel zîngah, An awm lo thusa thei.

⁸Miten pathian dang biak an thlang, Kan ramah hian indo a chhuak ta a. Israel mi sîngli zîngah Phawsial leh fei chawi awm maw?

⁹Ka va han lainat êm, Israel hruaitute; Châk taka zuitute pawh chu: LALPA chu fak rawh u.

¹⁰Sabengtung vâr chunga chuang ṭhînte u, Nangni ṭhutphah dûpa ṭhute pawhin. Lamtluang zawhtute nên he thu hi puang rawh u.

¹¹Tuikhura zai mite thâwm chu: LALPA thil tih ṭhatzia an sawi, Israel rama thil ropui a tih chu an hril, Kulh kawngkaahte pawh an pung khâwm e.

¹²Harh teh, harh teh, Debor, Harh la, zai han vâwr teh: Abinoama fapa, tho teh, Barak, tho teh, Râl tam tak salah hruai dum dum rawh.

¹³Mi lian rualte pawh chuan an zui ve a, Hmêlma dopui tûrin LALPA mite an chhuk thla.

¹⁴Efraim ram aṭangin lui lam an pan, An unau Benjamin-ten an rawn pui a, Makir-ho mi liante an chhuk thla ve Zebulon-ho lal liante nên.

¹⁵Isakar mi lianten Debori an zui; Berâm huanga ṭhut mai a hun ta lo, An sûl zuiin luipui kamah an pung.

¹⁶Ran rual awihna phênglâwng tum ngaithlaa, Berâm huanga ṭhut mai a hun ta lo, Reuben-ho lah an inhnial buai e.

¹⁷Gad-ho pawh Jordan râlah an awm daih si. Dana chuan lawng chauh a lungkham a, Aser pawh tuipui kamah, Vaukamah a vuaicha hle.

¹⁸Zebulun leh Naftali erawh chuan Thih dâwn lovin an bei.

¹⁹An lalte chuan an rawn bei ve, Kanan ram lalte chu an ṭang hle a, Megido lui kam Tanak-ah chuan Râllâk tûr rêng an nei lo ve.

²⁰Vâna arsite pawh an che ve a, Lamtluang an zawh pahin Sisera chu an bei.

²¹Kison lui lian chuan a la a, A ni, hmânlai Kison lui chuan a lên a, Khawi nge, ka’n ûm duai duai teh ang.

²²Sakawrten phei an vâwr a, An ter ut ut mai e.

²³‘Meroz khua chu ânchhia lawh r’u; A chhûnga mite chu lawh bawrh bawrh r’u,’ LALPA pui tûrin an lo kal duh lo va, hmêlma an bei duh lo va ni.

²⁴Jaeli nge nge a chhuanawm e, hmeichhia azawngah, Hebera nupui, Ken-nu mawlh hi Puan ina chêng zîngah a lawr fâl e.

²⁵Tui a dîl a, hnutetui a intîr a, No mawi takin a dak a rawn kensak.

²⁶Puan in khenbehna a rawn keng a, Themthiam tuboh a chawi, Dim lo lêkin a chhu, Sisera chu, a tuboh chuan Thlunglu pawpin a chhu, A bekbawrah a khêng tlang zawk.

²⁷A awp rup a, a let thla e, A ke bulah a thal dêr a, A thi bul mai.

²⁸Sisera nu chuan a lo thlîr a, Tukverhah te a bih thla a, ‘A tawlailîr a lo va haw har ve, A sakawrte chu an va muang awm vei êm,’ a ti.

²⁹A ṭhiannu fing ber chuan a lo hnêm a, Mahni a inṭawng thlamuan ta a.

³⁰‘Man belh tûr an zawng a ni ngei ang, An insem khawtlai a ni phawt ang: Nula pahnih khat man belh tûr an vai a ni ang e, Sisera hawn atân puan mawi deuh an dap a ni ang, Lalnu bah tûr an zawng khawtlai a ni ang e,’

³¹Aw, LALPA, i hmêlmate chutiang chuan ral sela, I ṭhiante erawh chu ni chhuak angin êng phût rawh se,’ tiin. Kum sawmli chhûng a ram chu a râlmuang a.