Read Mizo Lushai RORELTUTE 6 Bible Online

RORELTUTE 6 - Mizo Lushai bible

RORELTUTE 6

¹Israel mite chuan LALPA ngaihmawhzâwng thil sual an ti a; kum sarih chhûng Midian-ho hnuaiah a awmtîr a.

²Midian-ho chu Israel-te ai chuan an chak a, tlâng pangah bihrûkna tûr kua an siam a, pûkah te an biru a, kulh te an siam a.

³Midian-ho te, Amalek-ho te leh thlalêra chêngho te chu an lo kal ṭhîn a.

⁴Bûk an khuar a, Israel-te thlai chînte chu an tichhe zêl a, Gaza thlengin Israel ramah chuan ei tûr a awm lo; berâm te, bâwng te, sabengtung te an la zêl a ni.

⁵An ran rualte an rawn khalh a, puan inte an rawn keng a, khau puang ang mai an ni; ram chu an tikawlh fer fur a.

⁶Israel-te chu an rethei ta êm êm a. Israel-te chuan LALPA an au va.

⁷Midian-ho vânga Israel-te mangang au chu LALPAN a lo hria a,

⁸Israel-te hnênah zâwlnei pakhat a tîr a, “Israel-te Pathian, LALPA chuan heti hian a ti: ‘Aigupta ram aṭangin bawiha in awm kha ka hruai chhuak che u a.

⁹Aigupta hotu leh nangmahni tiduhdahtute kut ata ka chhan chhuak che u a, he ram hi ka pe che u a ni:

¹⁰LALPA, in Pathian chu ka ni. Amor-ho rama awm in ni a, an pathiante chu zah suh u ka ti che u a, ka thu in awih duh lo,’ a ti e” a ti a.

¹¹ LALPA Vântirhkoh chu Ofra khuaah a kal a, Abiezer mi Joasa sasaw bulah chuan a ṭhu ta a; Joasa fapa Gideona chuan uain sâwr khurah Midian-ho hmuh loh tûrin buh a chîl a.

¹²LALPA Vântirhkoh chu a hmu a, ani chuan a hnênah, “Nang mi huaisen, LALPA chu i hnênah a awm.” a ti a.

¹³Gideona chuan, “Ka pu, LALPA chu kan hnêna a awm si chuan hêng thil zawng zawng hi engtizia nge kan chunga a thlen le? Kan paten a thiltih ropui tak tak min hrilhte kha khawiah nge a awm tâk? LALPA chuan Aigupta ram aṭangin min hruai chhuak maw? Tûnah zawng, LALPA hian min paihthla a, Midian-ho kutah min pe ta a nih hi,” a ti a.

¹⁴ LALPA chuan a lam a hawi a, “I chak khawp alâwm, Israel-te chu Midian-ho kut ata hi chhan chhuak ta che, ka tîr che a ni lâwm ni?” a ti a.

¹⁵Gideona chuan, “Ka pu, engtin nge Israel-te chu ka chhan chhuah ang le? Manasea thlah zînga pachhe ber chhûng kan ni a, kan chhûng zîngah lah a naupang ber ka ni si,” a ti a.

¹⁶ LALPA chuan, “Ka awmpui zêl dâwn che alâwm. Midian-ho chu mi pakhat ang lekin i hneh mai ang,” a ti a.

¹⁷Gideona chuan, “Min khawngaih la, LALPA chu i ni ngei tih hriatna tûr min tihsak ang che.

¹⁸Kal bo mai lo la, thilpêk ka han la ang a, i ke bulah ka han dah ang e,” a ti a. Ani chuan, “I lo kal leh hma loh chu ka lo awm reng ang e,” a ti a.

¹⁹Gideona chu inah a lût a, keltê a talh a, dawidim telh loh chhangphut kg. sâwm a keng bawk a. Sa chu fawngah a dah a, a tui chu bêlah. Sasaw thing hnuaiah chuan a rawn kensak a.

²⁰LALPA Vântirhkoh chuan, “A sa leh chhang dawidim telh loh kha la la, lung chungah khân dah la, a tui kha leih rawh,” a ti a. Chutiang chuan a ti a.

²¹LALPA Vântirhkoh chuan a tiang ken hmâwr chuan sa leh chhang dawidim telh loh chu a khawih a; lung aṭang chuan mei a lo chhuak a, sa leh chhang chu a kâng ral ta a. LALPA Vântirhkoh chu a kal bo ta a.

²²Gideona chuan LALPA Vântirhkoh ngei a ni tih a hre ta a, “Khai aw, Aw LALPA PATHIAN, LALPA Vântirhkoh nên inhmachhawnin kan inhmuh tâk chu!” a ti a.

²³LALPA chuan, “Thlaphâng suh, thlamuang takin awm rawh, i thi lo vang,” a ti a.

²⁴Chutah chuan Gideona chuan LALPA tân maichâm a siam a, LALPA Salom a vuah a. Abiezer mite rama Ofra khuaah chu chu tûn thlengin a la awm.

²⁵Chumi zân chuan LALPAN a hnênah, “I pa bâwngpa leh bâwngpa dang kum sariha upa kai la, i pa siam Baal maichâm chu tichhia la, a bula Aseri phun pawh chu kit rawh.

²⁶Maichâm chhe chim vûm chungah chuan i Pathian, LALPA tân maichâm rinawm tak siam la, bâwngpa pahnihna kha hâlral thilhlanah hlân rawh; a hâlna thingah i kih thlûk Aseri kha hmang ang che,” a ti a.

²⁷Tichuan, Gideona chuan a chhiahhlawh sâwm a hruai a, LALPA sawi ang chuan a ti a. A chhûngte leh khuaa mite a hlauh avângin chhûnah chuan a ti lo, zânah a ti ta a.

²⁸A tûk zînga mite an han thawh chuan Baal maichâm chu a lo chim a, a bula Aseri lim thing phun a lo tlu chu an hmu a; maichâm tharah chuan bâwngpa pahnihna kha hâlral thilhlanah an lo hlân a.

²⁹“Tu tih nge?” an inti a. An han zâwt chiang a, “Joasa fapa Gideona tih a ni,” an ti a.

³⁰Khuaa mite chuan Joasa hnênah, “I fapa kha han hruai chhuak rawh, kan that dâwn a ni. Baal maichâm a ṭhiat a, a bula Aseri phun pawh a kit a ni,” an ti a.

³¹Joasa chuan chutia rawn titute chu a chhâng a, “Baal hi in ṭan a, chhan in tum em ni? Baal ṭan apiang chu tûkin zîngah la la hian thah in ni ang. Pathian a nih tak tak chuan amah inhum ang hmiang, ama maichâm alâwm an tihchhiatsak,” a ti a.

³²Chuvângin, chumi ni chuan a hmingah Jerubaala an sa ta a, ‘a maichâm a tihchhiat avângin Baala chuan rawn bei ang hmiang’ an ti a ni.

³³Midian-ho te, Amalek-ho te leh thlalêra chêng te chu an pung khâwm a, Jezreel ruamah bûk an rawn khuar a.

³⁴LALPA thlarau chu Gideona hnênah a awm a, Abiezer mite koh khâwm nân tawtawrâwt a hâm a.

³⁵Manase-ho te, Aser-ho te, Zebulun-ho te leh Naftali-ho te chu a chah khâwm a, amah tâwk tûrin an lo kal a.

³⁶Gideona chuan LALPA hnênah “Min hmanga Israel mite hi chhan chhuah i duh tak meuh a nih chuan,

³⁷en teh, hruihah berâm hmul hi ka dah ang a, berâm hmulah chauh dai a tlâka, a vêl lei a ro si chuan i sawi angin min hmangin Israel-te hi i chhan chhuak dâwn a ni tih ka hria ang,” a ti a.

³⁸A tûk zîngah an han thawh chuan berâm hmul chu a han sâwr a, no khat dâwn lai dai a sâwr chhuak a.

³⁹Gideona chuan, “Ka chungah thinrim suh aw, ka han sawi leh teh ang, ka han en chhin leh ang e: Zânin chu berâm hmul hi ro phak sela, a vêl lei hi chu daiin huh hnêp teh se,” a ti a.

⁴⁰Chumi zân chuan Pathianin berâm hmul chu a tihul phiang a, leiah erawh chuan dai a tlâktîr ṭeuh va.