Read Mizo Lushai RORELTUTE 7 Bible Online

RORELTUTE 7 - Mizo Lushai bible

RORELTUTE 7

¹Jerubaala an tih Gideona chuan a hnêna lo kal zawng zawng chu zîng takah a thawhpui a, Harod bulah bûk an khuar a. Midian-ho chuan an awmna hmâr lam ruam More-ah bûk an khuar ve bawk a.

² LALPA chuan Gideona hnênah, “I mite hi an tam êm mai, in kuta Midian-ho ka pêk chuan, Israel-te hian min uankhum ang e, anmahni hneh emaw an ti mai ang asin.

³Mipui hnênah, ‘Tu pawh, indo huphurha thlaphâng apiang chu Gilead tlâng aṭang hian haw mai rawh se,’ tiin tlângau rawh se,” a ti a. Mi sînghnih leh sânghnih chu an haw a, sîngkhat chu an la awm a.

⁴ LALPA chuan Gideona hnênah, “Mi an la tam lutuk fo, luiah hruai thla la, ka thlan chhuahsak ang che. ‘Hei hi kal rawh se,’ ka tih chu kalpui la, ‘hei chu kal suh se,’ ka tih chu hawtîr ang che,” a ti a.

⁵Tichuan, luiah a hruai thla a, LALPA chuan Gideona hnênah, “Ui anga tui liak chu dah hrang la, ṭhingṭhia tui dâwt chu i dah hrang bawk dâwn nia,” a ti a.

⁶Kuta tui thâla liak chu mi zathum an ni a, mi dang zawng chuan ṭhingṭhiin tui an dâwt a ni.

⁷LALPA chuan Gideona hnênah, “Mi zathum, kuta tui thâla liakho hmang hian ka chhan dâwn che u a, Midian-ho chu in kutah ka pe ang,” a ti a.

⁸Ei tûr kengtute leh tawtawrâwt pûte leh mi zathum tih loh, mi dang chu an in lamah a hâwntîr ta vek a. Midian-ho bûk chu an thlang lawk phaiah a awm a ni.

⁹Zânah LALPA chuan a hnênah, “Tho la, an bûkah zu chhuk rawh, i kutah ka pe tawh a ni.

¹⁰Nangmaha kal i hlauh deuh chuan i tlangvâl hruai Pura kha hruai ang che.

¹¹An titi zu ngaithla la, chumi hnu chuan an bûk zu beih i châk hle ang,” a ti a. Pura nên chuan hmêlma sipai awmna hmâwrtawng berah chuan an zu kal a.

¹²Midian-ho te, Amalek-ho te leh thlalêra chêng te chu zâwlah chuan an awm hmur mai a, khau puang ang mai an ni, an sanghâwngseite pawh ṭiau vaivut anga chhiar sên loh a ni.

¹³Gideona te an zu thlen thlâk chuan mi pakhatin a ṭhian chu a mumang a lo hrilh a, “Mumang ka nei a, kan bûkah hian barli chhang a lo lum a, bûk chu a rawn delh a, a delh thal dêr a, a pêr vek mai zu nia,” a ti a.

¹⁴A ṭhian chuan “Joasa fapa Gideona khandaih lo chu eng nge ni ta ang? Chu Israel-pa kutah chuan Midian-ho hi Pathianin a pe ta a nih chu!” a ti a.

¹⁵Gideonan mumang leh a awmzia an sawi chu a hriatin Pathian chibai a bûk a; Israel-te bûkah a chho va, an hnênah, “Tho teh u, Midian-ho rual chu LALPA chuan in kutah a pe ta,” a ti a.

¹⁶Mi zathum chu pâwl thumah a ṭhen a; bêl ruak leh a chhûnga meichher awm, tawtawrâwt nên a pe ṭheuh va;

¹⁷an hnênah, “Min en ula, ka tih angin ti ve zêl ang che u, an bûk sir ber ka thlen huna ka tih ang chu in ti ve dâwn nia.

¹⁸Kei leh ka kalpuiten tawtawrâwt kan ham chuan kil tinah hâm ve ula, ‘LALPA leh Gideona tân’ tiin au dur dur ang che u,” a ti a.

¹⁹Gideona leh a ho mi za te chu zânlaiah, râl vêng an inthlâk fel hlim hlawlah bûk hmâwrtawng chu an thleng a; an tawtawrâwt chu an hâm a, an bêl ken chu an vaw keh a.

²⁰Pâwl dangte chuan an tawtawrâwt chu an hâm a, bêl chu an tikeh a, meichher chu kut lehlamin an chhi a, tawtawrâwt chu lehlama vuanin an hâm a, “Khandaih chu, LALPA leh Gideona tân!” tiin an au ta chiam a.

²¹Hmêlma bûk hual chuan mahni dinna tûr ṭheuhvah an ding a; bûka sipaite chu an au ruan ruan a, an tlânchhe ta chum chum a.

²²Tawtawrâwt zathum chu an hâm tuar tuar a; LALPA chuan hmêlma zawng zawng chu anmahni leh anmahni a insahtîr ta sawk sawk a. Zarethan lamah Beth-sita thlenga tlânchhiate an awm a, Tabat bul Abel-mehola ri thlenga tlânchhia pawh an awm.

²³Naftalia thlah te, Asera thlah te leh Manasea thlah, Jordan chhak lam leh thlang lama awm te chu Midian-ho ûm tûrin an pun a.

²⁴Gideona chuan Efraim tlângramah mi a tîr chhuak bawk a, “Lo chhuak ula, Midian-ho rawn bei ula, Midian-hovin Jordan leh lui dang an kân tûr lo châng rawh u,” a ti a.

²⁵Midian hotu pahnih Oreba leh Zeeba chu an man a, Oreb lung hmunah Oreba chu an that a, Zeeb grep sâwrkhurah Zeeba chu an that a. Jordan râlah Oreba leh Zeeba lu chu Gideona hnênah an rawn keng a.