Read Mizo Lushai RORELTUTE 8 Bible Online

RORELTUTE 8 - Mizo Lushai bible

RORELTUTE 8

¹Efraim mite chuan Gideona hnênah, “Midian-ho bei tûra min sâwm ve lo hi engtizia nge?” an ti a, an hau na hle a.

²Ani chuan, “Nangnin in tih ṭhin ai chuan ka thil tih ve chhun hi eng tham mah a ni nêm! Nangni Efraim-hovin in tih chhunte pawh keini hnam tê, Abiezer-ho tih ai chuan a ropui daih alâwm.

³Pathianin in kutah Midian hotu lian Oreba te, Zeeba te a pe che u a, kei chuan eng tham mah tih ka nei hlei nem,” a ti a. Chutianga a ṭawng hnu chuan an thinur pawh chu a dai ta a.

⁴Gideona leh a mi zathum chuan Jordan an kai a, an chau hle mai a, hmêlmate chu an ûm zêl bawk si a.

⁵Sukoth khaw mite hnênah chuan Gideonan, “Midian lal Zeba leh Zalmuna kan ûm a, ka hote hi an hah hle tawh a, khawngaih takin ei tûr lo pe teh u,” a ti a.

⁶Sukoth khaw hotute chuan, “Zeba leh Zalmuna chu in kuta awm em an nih a, i sipai chaute ei tûr kan han pêk na tûr?” an ti a.

⁷Gideona chuan, “LALPAN Zeba leh Zalmuna ka kuta mi pêk hun chuan thlalêra hlîng leh râlsamkuaiin in vun ka kai thlêr vek ang maw le,” a ti a.

⁸Chuta ṭang chuan Penuel-ah an kal a, an hnênah chuan Sukoth mite a tih ang bawk khân a ti a; anni pawh chuan an chhân ang bawk khân an lo chhâng a.

⁹Penuel-a mite hnênah pawh chuan, “Ralmuanga ka lo kîr leh hun chuan in khua hi ka tichim ngei ang maw le,” a ti a.

¹⁰Zeba leh Zalmuna chu Karkor khuaah, an sipaite nên an awm a. Thlalêra chêngho chu mi nuaikhat leh sînghnih indonaah an thi tawh a, a thi bâng mi sîngkhat leh sângnga lai chuan an la zui zêl a ni.

¹¹Gideona chu Noba leh Zogbeha chhak lam thingtlâng kawngah a kal a, hmêlma inring lo chu a bei thut a.

¹²Midian lal Zeba leh Zalmuna chu an tlân bo va; mahse, an ûm a, an man a; an sipaite chu an buai ta nuai nuai a.

¹³An inbeih zawh chuan Gideona chu Heres kalkhân lamah a lo haw a.

¹⁴Sukoth tlangvâl pakhat hi a man a, an khaw hotute leh upate hming a zâwt a, tichuan Sukkoth khuaa mi lianhote leh upate hming chu a ziaksak vek a, sawmsarih pasarih an ni a.

¹⁵Sukoth a thlen chuan an hnênah, “Zeba leh Zalmuna hi en teh u, ‘Zeba leh Zalmuna chu in kuta awm em an niha i sipai chaute ei tûr kan han pêk na tûr’ tia min tihel vei kha,” a ti a.

¹⁶Thlalêr hlîng leh râlsamkuai a la a, khaw hotute chu a man a, Sukoth mite hmaah hlîng chuan a hrût ta nek a.

¹⁷Penuel kulh bangte chu a tichim bawk a, a chhûnga mite chu a that a.

¹⁸Gideona chuan Zeba leh Zalmuna chu, “Tabor tlânga in mi thahte mi eng ang nge an nih?” tiin a zâwt a. Anni chuan, “An ang khawp mai che, lal fa ni âwm tak an ni,” an ti a.

¹⁹Ani chuan, “Ka unau, ka nu hrin ve te ngei an nih chu. LALPA hming chhâlin ka sawi hi, zuah ula chuan nangni pawh ka that lo tûr che u,” a ti a.

²⁰A fapa upa ber Jethera hnênah, “Tho la, that teh,” a ti a. Mahse, khandaih chu a phawi lo, a that ngam lo a ni, a la naupang êm a ni.

²¹Zeba leh Zalmuna chuan, “Nangmah kha lo tho la, pa leh pa inbeih tûr alâwm,” an ti a. Gideona chu a tho va, Zeba leh Zalmuna chu a that a, an sanghâwngsei nghâwngawrh pawh a lâksak a.

²²Israel mite chuan Gideona hnênah, “Midian-ho lakah min chhanhim a, kan chunga rorêltuah ṭang rawh, i fate, i tute pawh ṭang zêl rawh se,” an ti a.

²³Gideona chuan, “In chunga rorêltuah ka ṭang lo vang; ka fate pawh an ṭang lo vang. In chunga rorêltu tûr chu LALPA a ni,” a ti a.

²⁴Gideona chuan an hnênah, “Mi tinin râl bengbeh in lâk kha pakhat min pe ṭheuh ula ka va ti êm!” a ti a. Râlte chu Ismael mi an nih avângin rangkachak bengbeh an lâksak ṭeuh a ni.

²⁵Anni chuan, “Kan ui hauh lo, kan pe ang che,” an ti a. Puan an phah a, râl bengbeh an lâk chu an pe ṭheuh va.

²⁶Chutianga an pêk khâwm rangkachak bengbeh chu kg. sawmhnih dâwn lai a ni. Midian lalho incheina, ṭhi te, puan senduk te leh an sanghâwngsei nghâwngawrh a neih te chu chûng zîngah chuan chhiar tel a ni lo.

²⁷Gideona chuan chûng chuan Efod a siam a, a awmna khua Ofra-ah a dah a. Israel-te chuan an pên bo phah a, Gideona leh a chhûngte tân thang hlauhawm tak a lo ni ta a.

²⁸Midian-ho chu Israel-te chuan an tudawl a, a inlek leh ngai tawh lo. Gideona dam chhûng zawng kum 40 chhûng ram chu a râlmuang a.

²⁹Gideona, Zerubaala an tih bawk chu, ama inah a haw a.

³⁰Gideona chuan nupui a ngah hle a; fapa sawmsarih a nei a.

³¹Sekem khuaa a hmei chuan fapa a hrinsak bawk a, a hmingah Abimeleka a sa a.

³²Joasa fapa Gideona chu a tar hle hnu chuan a thi a, Abiezer mite ram Ofra khuaah, a pa Joasa thlânah an phûm ve ta a.

³³Gideona chu a thi ta chauh tihin Israel mite chu Baal lamah an pêng leh a, Baal-berith chu pathianah an neih ta a.

³⁴Kil tina an hmêlmate kut ata chhanchhuaktu LALPA, an Pathian chu Israel-te chuan an hre reng duh lo va;

³⁵Gideonan Israel-te a khawngaih ṭhîn ang khân anni chuan Gideona chhûngte chu an khawngaih ve duh lo va.