Read Mizo Lushai RORELTUTE 9 Bible Online

RORELTUTE 9 - Mizo Lushai bible

RORELTUTE 9

¹Gideona fapa, Abimeleka chu Sekem khuaa a nu inah chuan a kal a, a nu chhûngte leh a nu pa chhûngte hnênah,

²“Sekem mite hian, ‘Gideona fa sawmsarihten in chungah rorêl se nge in tih pakhat chauhvin, sawi rawh u,’ in ti dâwn nia; kei hi a fate zînga in thisen zawmpui awm chhun ka nih hi hre reng bawk ang che u,” a ti a.

³A nu nuṭate chuan Sekem mite hnênah chûng thu chu an hrilh a, Abimeleka hnung zui chu an châk ta a, “Kan unaupa a ni tak alâwm,” an ti a.

⁴Tichuan, Baal-berith an biakna in ata tangkaraw tlang sekel sawmsarih an pe a. A ṭhuihruai atân mi bengtlalo leh pâwngpawrh tak tak chu Abimeleka chuan tangka chuan a ruai a.

⁵A pa chhûngte awmna Ofra khuaah chuan a va kal a, Gideona fa sawmsarihte chu lung pakhat chungah a that a; an naupang ber Jothama erawh chu a biru a, a that ve lo.

⁶Sekem mi leh Beth-milo mi zawng zawng chu an pung khâwm a, Sekem bula sasaw thing hnuaiah Abimeleka chu lalah an siam ta a.

⁷Chu chu Jothama an hrilh a, Gerizim tlângchhîpah chuan a kal a, theihtâwpin a au va, heti hian a ti a, “Sekem mite u, ka thu hi ngaithla teh u; tichuan, Pathian pawhin in thu a ngaithla dâwn nia.

⁸Vawi khat chu lal thlan tumin thing zawng zawng an pung khâwm a, Oliv thing hnênah ‘Kan lalah ṭang ta che’ an ti a.

⁹Oliv thing chuan, ‘In lal ka niha, ka tei ka tei chuan ka hriak, Pathian leh mihring chawimawi nâna an hman ṭhin chu, ka nei thei tawh lo vang asin,’ a ti a.

¹⁰Theipui hnênah, ‘A nih, nang lo kal la, kan lalah lo ṭang ta che,’ an ti a.

¹¹Mahse, theipui chuan, ‘In lala ṭangin tei tei ila, thlum tak tak leh tui tak takin ka rah hman hlei ang,’ a ti a.

¹²Grep hrui hnênah an kal a, ‘Nang tal lo kal la, kan lalah lo ṭang rawh,’ an ti a.

¹³Grep hrui chuan, ‘In lalah ṭangin tei tei ila, Pathian leh mihring tilâwmtu uaina sâwr tûr grep rah ka nei hman nâng,’ a ti a.

¹⁴“Thing zawng zawng chu hmupa hnênah an kal a, ‘Nang hi zawng kan lalah i ṭang ngei tûr a ni,’ an ti a.

¹⁵Hmupa chuan, ‘Lala min duh tak meuh chuan ka buk hnuaiah lo kal rawh u; in lo kal loh chuan ka ṭang hlîng ata mei a lo chhuak ang a, Lebanon sidarte lam a kang fai ang,’ a ti a.”

¹⁶Jothama chuan a sawi zêl a, “Abimeleka lala in siam hi duh tak meuhva ti em in nih? Gideona chu ngaisângin a phu ang ngeiin a chhûngte pawh tihtakmeuhvin in chawimawi duh em ni?

¹⁷Ka pa, Gideona chuan Midian-ho lakah a chhan chhuak che u a, thih huamin a ṭang a nih kha.

¹⁸Tûnah zawng, ka pa chhûngte chungah in inlek a, a fapa sawmsarih chu lung pakhat chungah in that a, a chhiahhlawhnu fapa, in chipui fa a nih avângin lalah in siam tâk hi.

¹⁹Gideona leh a chhûngte chunga thil dik tak ti nia in inhriat chuan Abimeleka chu lâwm takin zui ula, ani pawhin lâwm takin ho che u rawh se.

²⁰Chutiang a nih loh chuan Abimeleka aṭangin mei lo chhuak sela, Sekem leh Beth-milo khua chu kâng rawh se. Sekem leh Beth-milo kâng chuan Abimeleka chu kâng rawh se,” a ti a.

²¹A unaupa Abimeleka chu a hlauh avângin Jothama chu a tlân bo va, Beer khuaah a awm ta a.

²²Abimelekan Israel-te chu kum thum a ho va.

²³Abimeleka leh Sekem mite chu Pathianin a inhuattîr a, Sekem mite chuan Abimeleka chu vervêk takin an ti ta a.

²⁴Gideona fa sawmsarih râwng taka a thah avângin an thisen mawh chu Abimeleka leh amah thlâwptu Sekem mite chungah chuan a tla ta a ni.

²⁵Sekem mite chuan tlângah, rawlrâlin Abimeleka chângtute an dah a, chûng mite chuan lo kal apiang an lo rawk ṭhîn. Chu chu Abimeleka an hrilh a.

²⁶Ebeda fapa Gaala chu a unaute nên Sekem-ah an lo kal a; Sekem mite chuan an lo ring hle a.

²⁷Lovah te an kal a, grep rah te an lo va, kût an hmang a, an pathian inah an lût a, an eiin an in a, Abimeleka chu ânchhia an lawh a.

²⁸Ebeda fapa Gaala chuan, “Sekem mite hian eng nge maw an hriata Abimeleka rawng an bâwl le? Gideona fapa kha a ni lâwm ni? Zebula lah hi a thu thu-a awm a ni si a. In pu Hamora thlahte rawng bâwl ta zâwk che u.

²⁹Hruaitu che u ni ila chu Abimeleka hi ka hnawt bo ngei ang; ‘Abimelek, sipai lâk belh la, lo chhuak rawh, inbei ang’ ka ti ngei ang,” a ti a.

³⁰Khaw hotu Zebula chuan Ebeda fapa Gaala thu sawi a hriat chuan a thinur hle a.

³¹Abimeleka hnênah a rûk têin Aruma-ah zualko a tîr a, “Sekem-ah Ebeda fapa Gaala leh a unaute an lo kal a, khuaa mite hi i lakah an tihel zo dâwn.

³²Chuvângin, a zân a zânin lo kal la, i hote kha han hruai la, daiah châng ru ang che u.

³³Zîng takah in tho ang a, khawpui chu rawn ṭhâwng thut ula; bei tûr che ua a mite nêna an lo chhuak chu duh tâwkin in lo ching dâwn nia,” a ti a.

³⁴Abimeleka chu a hote nên a zân a zânin an thawk chhuak a, Sekem khua chu hmun li-ah an châng a.

³⁵Ebeda fapa Gaala chu a lo chhuak a, kulh kawngkaah chuan a ding a. Abimeleka leh a hote chu an bihrûkna aṭang chuan an lo chhuak a.

³⁶Anni chu Ebeda fapa Gaala chuan a han hmuhin Zebula hnênah, “Tlâng aṭangin, saw, mi an lo kal chhuk ka ti,” a ti a. Zebula chuan, “Tlâng hlim saw mi emaw tiin i hmusual a ni ang e,” a ti a.

³⁷Gaala chuan, “En mah teh, tlâng bula saw! Mi an lo chhuk ngei alâwm, pâwl khat dang pawh Meonenim lam aṭangin an lo kal saw!” a ti a.

³⁸Zebula chuan heti hian a ti ta a, “Abimeleka hi tu nge maw a nih a a rawng kan bâwlna tûr!’ i tihna hmui kha khawiah nge a awm tâk? I hmuhsit êm êmte kha an nih saw. Chhuak la, va bei ta che,” a ti a.

³⁹Gaala chuan Sekem mite chu a hruai chhuak a, Abimeleka chu a bei a.

⁴⁰Abimeleka chuan a ûm a, a tlânchhe ta a. Kulh kawngka bul thlengin hliam tam tak an tlu phung a.

⁴¹Abimeleka chu Aruma khuaa awm a ni a. Zebula chuan Gaala leh a unaute chu Sekem aṭang chuan a hnawt chhuak a, an awm thei ta lo va.

⁴²A tûk chuan Abimelekan Gaala leh a unaute chu Sekem khaw pâwnah an tlân chhuak dâwn tih a hriatin

⁴³a mite chu a hruai a, pâwl thumah a ṭhen a, pâwnah chuan a lo châng a. Mite chu an lo chhuak a, a tho va, a bei ta a.

⁴⁴Abimeleka leh a hote chu kulh kawngka bulah an tlân a, a ṭhiante pâwl hnih chuan pâwna chhuak tawhte chu an bei zui a, an that phiar a.

⁴⁵Abimeleka chuan khua chu nilêngin a bei a, a la ta a. A chhûnga mite chu a that a, khua chu a tichhia a, chi a phul chiam a.

⁴⁶Sekem khuaa hotu lian deuh deuhte chu Baal-berith biakna in kulhbîngah chuan an tlân khâwm a.

⁴⁷Khaw hotu deuh deuh an tlân khâwm thu chu Abimelekan a lo hria a.

⁴⁸Zalmon tlângah chuan Abimeleka chu a chho va, a hote zawng zawng chuan an zui a. Abimeleka chuan hreipui a la a, thing ṭang a chêk thla a, a pu chho va; a hote hnênah chuan, “Ka tih ang hian han ti ve sawk sawk teh u,” a ti a.

⁴⁹A hote zawng zawng chuan thing ṭang an thlâk ṭheuh va, Abimeleka tih angin kulhbîngah chuan an dah zêl a, kulhbîng chu a hâl hnan ta a; khaw hotu deuh deuhte pawh chu an thi ve ta vek a, mipa leh hmeichhia sângkhat lai an thi.

⁵⁰Abimeleka chu Thebes khuaah a kal a: a hual a, a la ta a.

⁵¹Khuaah chuan in sâng pakhat, rinawm tak hi a awm a. Chutah chuan mi zawng zawng, a hmei a pa, khaw hotute nên an tlân khâwm a, an inkalhkhum tlat a. In sâng chhîp zâwlah chuan an chho va,

⁵²Abimeleka chu in sâng bulah chuan a lo kal a, kawngka chu hâl tumin a va hnaih a.

⁵³Nu pakhat hian buh râwtna lung chungnung zâwk hi a lu-ah a zu thlâk a, a luruh chu a tlâk keh a.

⁵⁴Tlangvâl, a râlthuam kengtu chu a han ko thuai a, “I khandaih kha phawi la, min that rawh, hmeichhe tihhlum min ti khanglâng dah ang e,” a ti a.

⁵⁵Tlangvâl chuan a chhun hlum ta a. Israel mite chuan Abimeleka a thi ta tih an hriat chuan mahni in lamah an haw ta ṭheuh va.

⁵⁶Chutiang chu a pa leh a unau sawmsarih chunga a thil sual tih avângin Pathianin a tuartîr a;

⁵⁷Sekem mite pawh an thil sual tih avângin Pathianin a tuartîr a, Gideona fapa Jothama ânchhia chu an chungah a tla ta a ni.