Read Mizo Lushai LEHKHATHAWN PATHUMNA JOHANA 1 Bible Online

LEHKHATHAWN PATHUMNA JOHANA 1 - Mizo Lushai bible

LEHKHATHAWN PATHUMNA JOHANA 1

¹Upa chuan duh tak, Gaia, thutaka ka hmangaih chibai ka bûk e.

²Ṭhian duh tak, engkimah i hmuingîla, thlarau lam leh taksa lamah i dam leh i hrisêl theih nân ka ṭawngṭaisak ṭhîn che a ni.

³Unaute an lo kal a, thutaka i rinawmzia leh thutaka i awm tlatzia min rawn hrilh a, ka lâwm êm êm a ni.

⁴Ka fate thutakah an awm tih ka hriat aliama lâwmna nasa zâwk rêng ka nei lo ve.

⁵Ṭhian duh tak, hêng unaute hi, mikhual pawh ni se an chungah i lo ṭha êm êm a.

⁶Kohhran hmaah pawh i ṭhatzia an sawi an sawi mai. An zin kawngah anni hi Pathian lâwm zâwnga i lo ṭanpui zêl theih chuan a ṭha hle ang.

⁷A hming avânga thawk chhuak an ni a, Jentail-te hnên aṭangin eng mah an dawng duh lo.

⁸Chutichuan, thutak ṭana thawk ho kan nih kan hriat theih nân keini hian hêng mite hi kan ṭanpui tûr a ni.

⁹Kohhran hnênah khân lehkha ka ziak tawh a; nimahsela, Diotrefa, an zînga hotu ber nih thlahlel khân ka thu a pawisa lo va ni.

¹⁰Chuvângin, ka lo kal hun chuan a chêt dân, thil râpthlâk pui pui tia mi puh thute ka hrilh vek ang che u. Chu chu tâwk ti lovin amah ngeiin unaute a lâwm duh lo va, a lâwm duhte pawh a khap a, kohhran aṭangin a hnawt chhuak lehnghâl a ni.

¹¹Ṭhian duh tak, a ṭha lo chu zir suh la, a ṭha chu zir zâwk rawh. Thil ṭha titu chu Pathiana chhuak a ni, thil ṭha lo titu chuan Pathian a la hmu ngai lo va ni.

¹²Demetria hi mi tinin an fak a, thutaka fak pawh a hlawh a ni; keini pawhin kan fak ve a, kan fakna chu a dik a ni tih i hria e.

¹³I hnênah thu tam tak sawi tûr ka nei a; mahse, lehkha leh lehkhatuia ziak ka duh lo.

¹⁴Hmuh thuai che ka beisei a, inhmatawnin kan la inbe dâwn nia.

¹⁵Thlamuanna i hnênah awm rawh se. Kan ṭhiante hian chibai an bûk a che. Kan ṭhiante kha an hming lam ṭheuhvin chibai mi bûksak ang che.