Read Mizo Lushai LEHKHATHAWN JUDA 1 Bible Online

LEHKHATHAWN JUDA 1 - Mizo Lushai bible

LEHKHATHAWN JUDA 1

¹Isua Krista bawih leh Jakoba unau Juda chuan, Pa Pathian khawngaihna leh Isua Krista vênhimnaa awm, kohte chu chibai ka bûk e.

²Khawngaihna te, remna te, hmangaihna te in chungah tihpunin awm rawh se. Zirtîrna dik lo chungchâng (2 Pet. 2:1-17)

³Duh takte u, chhandamna kan dawn tlân chungchâng hi in hnêna ziak ka châk êm êm ṭhîn a; Pathianin a mi thianghlimte hnêna rinna thu vawi khat a kawl nghehtîr tawh hi ṭan tlat tûra fuih tûr che uin in hnênah ziak lo thei ka ni ta lo.

⁴In zîngah sakhaw pawisa lo mi tute emaw an inzep lût ru a, Pathian khawngaihna thu hi an hurna sawi mawi nân an hmang a, kan hotu leh Lalpa neih chhun Isua Krista an pawm duh hek lo, chûng mite chu thiam loh chang tûra ruat daih tawh an ni.

⁵In hriat tawh sa vek ni mah se, hêng hi han hriat nawntîr che u ka duh a ni. Lalpan Aigupta ram aṭangin Israel mite a chhan chhuak a; mahse, an zînga ring lotute chu a tihboral leh tâk dân te,

⁶Vântirhkohte pawh an awmna chhuahsana, an hna tlânsante chu, an chungthu Rorêlna Ni ropuia ngaihtuah atân, chatuan khaidiata phuarin thim hnuaia dah an nih thu te,

⁷chutiang bawka Sodom leh Gomora khuate pawh, an kiang vêl khuate nên, hurna bawlhhlawhah an inpumpêk avânga mi dangte zilh lâwk nân kumkhaw meia hrem an nih thu te kha.

⁸Hêng mite pawh hi chutiang bawkin an che ṭhîn a ni. Zêl an hmu chawp a, an taksa an tibawlhhlawh a, thuneitu an pawisa lo va, vân mi ropuite an sawichhe ṭhîn.

⁹Mikaela, vântirhkoh chungnung ber meuh pawhin, Diabola nên Mosia ruang chungchânga an inhnial lai khân, ṭawng chhiain a hau duh lo va, “Lalpan hau che rawh se,” a ti mai zâwk a ni.

¹⁰Hêng mite erawh hi chuan an hriatthiam loh apiang an sawi chhe ṭhîn a; ngaihtuahna nei lo ramsaten an pianpui hriatna an zui ang maia anni pawh hian an zui avângin anmahni a tichhia a ni.

¹¹An va khawngaihthlâk tak êm! Kaina kawng chu an zawh a, tangka ûmin Balaama sualna kawngah an tlân a, Kora angin an hel a, an boral ve ta!

¹²Chûngho chu hmangaihna ruai in ṭheh tihmêlhemtu an ni, zak lovin an kîl ve a. Mahni chauh an inngaihtuah a, chhûm ruahtui pai lo, favâng thing rah lo, a zung chawpa tlu kar vek tawh ang;

¹³tuifinriat invawrh phuan, mahni inmualpho, arsi vâkvai, chatuan thim chhah mup khêksakte ang chu an ni.

¹⁴Adama thlah kal zêl pasarihna, Enoka chuan hêng mite chungchâng hi a lo hril lâwk a, “En teh u, Lalpa chu a mi thianghlim sâng tam tak nên a lo kal e.

¹⁵Sakhaw pawisa lo zawng zawngten Pathian ṭih lova an thil tih zawng zawng leh, amah dodâla thu khauh tak tak an sawi zawng zawng chungchângah, sakhaw pawisa lo mi sualte thiam loh chantîr tûr leh mi zawng zawng chunga rorêl tûrin a lo kal dâwn a ni.”

¹⁶Chûng mite chuan phunnawi leh mi sawisêl chauh an hrât a, anmahni châkna sual chauh an ûm a, pâwr tak takin an uang a, hlâwkna ûmin mi tlawn an peih êm êm a.

¹⁷Duh takte, u, nangni zawngin kan Lalpa Isua Krista tirhkohten thu an hril lâwk kha hre reng rawh u.

¹⁸“Hun hnuhnûngah chuan, nuihsantute, sakhaw ngaihsak lova mahni châkna ang zêla khawsate an lo la awm ang,” tia an hrilh che u kha.

¹⁹Chûngho chu inṭhenna tichhuaktu, tisa mi, Thlarau nei lote an ni.

²⁰Duh takte u, nangni zawng in rinna thianghlim takah chuan mahni inrem chho tlat ula; Thlarau Thianghlima ṭawngṭaiin,

²¹Pathian hmangaihnaah chuan invawng ṭha ula, chatuan nun nân kan Lalpa Isua Krista khawngaihna chu nghâk rawh u.

²²Ringhlelte chu khawngaih ula,

²³ṭhenkhat mei ata chhan chhuah ngaite chu hnûk chhuak thuai rawh u; ṭhenkhat chu hlau chungin khawngaih ula, an tisa bawlhhlawh kai silhfênte chu ten rawh u.

²⁴Tlu lo tûra vêng thei che u, a ropuina hmaa sawisêlbo leh hlim êm êma dintîr thei che u,

²⁵Pathian awm chhun, min chhandamtu hnênah chuan, kan Lalpa Isua Krista zârah, ropuina te, lalna te, thiltihtheihna te, thuneihna te, hun kal tawh zawng zawng ata tûnah leh chatuan thlengin awm zêl rawh se. Amen.