Read Mizo Lushai JOHANA HNENA ISUA KRISTA THU PUAN CHHUAH 10 Bible Online

JOHANA HNENA ISUA KRISTA THU PUAN CHHUAH 10 - Mizo Lushai bible

JOHANA HNENA ISUA KRISTA THU PUAN CHHUAH 10

¹Tin, Vântirhkoh dang, thiltithei tak, vân aṭanga lo chhuk ka hmu a, chhûmin a inthuam a, a lu-ah chhimbâl a zâm a, a hmêl chu ni ang a ni a, a kete pawh chu mei ban ang a ni.

²Lehkhabu zial te tak tê inphelh sa hi a keng a. A ke ding lamin tuifinriat a rap a, a vei lam chuan khawmual a rap a.

³Sakeibaknei hâhum anga ringin a au va, a han au chuan khawpui ri pasarihte chuan aw an chhuah a.

⁴Khawpui ri pasarihte thu sawi chu ka han ziak dâwn a, vân aṭangin aw ka hre ta a, “Khawpui ri pasarihte thu sawi kha zêp tlat la, ziak suh,” mi rawn ti a.

⁵Tuifinriat leh khawmual kârin Vântirhkoh chu a ding a, a kut ding lam chu vân lamah a phar a,

⁶chatuana nunga, vân leh a chhûnga awm te, lei leh a chhûnga awm te leh tuifinriat leh a chhûnga awm te siamtu hming chhâlin a chham a, “A rei tawh lâwng,

⁷vântirhkoh pasarihnain a tawtawrâwt a ham hun chuan Pathian thurûk, a bawih zâwlneite hnêna a puan chu, a lo thleng tawh ang,” a ti a.

⁸Vân aṭanga aw ka hriat khân mi rawn be leh a, “Tuifinriat leh khawmual kâra ding vântirhkoh kuta lehkhabu zial inphelh sa saw va la rawh,” a ti a.

⁹Vântirhkoh hnênah chuan ka kal a, lehkhabu zial tê chu ka va dîl a. Ani chuan, “La la, ei rawh, i pumah chuan a kha ang a, i kâah erawh chuan khawizu angin a thlum ang,” a ti a.

¹⁰Vântirhkoh kuta lehkhabu zial chu ka la a, ka ei a; ka kâah chuan khawizu angin a thlum a, ka han lem a, ka pumah chuan a kha ta êm êm a.

¹¹Ka hnênah, “Mi te, Jentail te, ṭawng hrang hrang te leh lal tam takte hnênah Pathian thu i puang leh tûr a ni,” mi ti a.