Read Mizo Lushai JOHANA HNENA ISUA KRISTA THU PUAN CHHUAH 12 Bible Online

JOHANA HNENA ISUA KRISTA THU PUAN CHHUAH 12 - Mizo Lushai bible

JOHANA HNENA ISUA KRISTA THU PUAN CHHUAH 12

¹Vânah chhinchhiahna thil mak tak, hmeichhia - nî-a inthuam, a ke hnuaia thla awm, arsi sâwm leh pahnih chuang chawimawina lukhum khum a lo lang a.

²Nau a pai a, a vei a, a rûm a rûm a.

³Vânah chhinchhiahna mak tak, Dragon sen lian pui, lu sarih leh ki sâwm nei, a lu-ah chawimawina lukhum pasarih khum a lo lang leh a.

⁴A mei chuan vâna arsi hmun thuma ṭhena hmun khat a hâwl a, leiah a hêm thla vek a. Nau a hrin veleha lo dawlh mai tûrin hmeichhe nau vei hmaah chuan a awm ta rûn a.

⁵Jentail-te chunga thîrtianga rorêl tûr fapa a hring a, a fa chu Pathian leh a lalṭhutthlêng hmaah chuan lâk chhoh a ni ta a.

⁶Tin, hmeichhia chu Pathianin a buatsaihsak, thlalêrah chuan a tlân bo ta a, chutah chuan ni sângkhat leh zahnih leh sawmruk chhûng an châwm dâwn a ni.

⁷Tin, vânah chuan indona a lo awm a, Mikaela leh a ho vântirhkohte chuan Dragon chu an bei a, Dragon leh a hote chuan an bei lêt ve a;

⁸mahse, Dragon chuan a hneh ta lo va, vânah chuan an leng ve ta lo va.

⁹Dragon lian pui, rûlpui tar, Diabola leh Setana an tih, khawvêl pum bum ṭhîntu chu an paih chhuak a, a hote nên chuan leiah an paih thla ta a.

¹⁰Tichuan, vânah ring taka au ka hria a, “Tûnah zet chuan kan Pathianin min chhan chhuak ta, a thiltihtheihzia te, a lalzia te, a Mesia thuneihzia te a lo lang ta. Kan Pathian hmaa dinga, a chhûn a zâna kan unaute hêk ṭhîntu chu vân ata paih thlâk a nih tâk hi.

¹¹Berâmno thisen ṭana thu dik an pawm tlat avângin hnehtu an ni a, nun châna thih huam rêng an ni.

¹²Vân te leh a chhûnga chêngte u, lâwm rawh u. Lei leh tuifinriatte u, Diabola chu in hnênah a lo chhuk tâk avângin in chung a pik e, hun tlêm tê chauh a nei tih a hriat avângin a thinur êm êm a ni,” tiin.

¹³Dragon chuan leia paih thlâk a nih a han hriat chuan fapa hringtu hmeichhia kha a ûm ta a.

¹⁴Hmeichhia chu rûlpui hmuh phâk loh thlalêrah, a awmna tûra a thlawh luh theih nân mupui lian tak thla khing hnih an pe a; chutah chuan kum thum leh a chanve an châwm ang.

¹⁵Rûlpui chuan a kâ aṭangin hmeichhe lên bo tûr lui tui anga tam tui a pik chhuak ta puat puat a.

¹⁶Mahse, hmeichhia chu leiin a lo chhan a, a kâ a âng a, Dragon kâ aṭanga lui lo luang chhuak chu a lem zo ta vek a.

¹⁷Hmeichhe chungah chuan Dragon chu a thinur ta êm êm a, a thlah la awmte, Pathian thupêk zâwma, Isua thu rinawm taka puang ṭhîntute chu do tûrin a thawk chhuak a.

¹⁸Dragon chu tuifinriat kamah chuan a ding ta a.