Read Mizo Lushai JOHANA HNENA ISUA KRISTA THU PUAN CHHUAH 13 Bible Online

JOHANA HNENA ISUA KRISTA THU PUAN CHHUAH 13 - Mizo Lushai bible

JOHANA HNENA ISUA KRISTA THU PUAN CHHUAH 13

¹Tuifinriat aṭang chuan sakawlh lo chhuak ka hmu a, ki sâwm leh lu sarih a nei a, a ki-ahte chuan lallukhum sâwm an târ bawk a, a lu-ahte chuan Pathian sawichhiatna hming a chuang ṭheuh va.

²Ka sakawlh hmuh chu keite ang a ni a, a ke chu savawm ke ang a ni a, a kâ chu sakeibaknei kâ ang a ni. Dragon chuan sakawlh chu a thiltihtheihna te, a lalṭhutthlêng te, a thuneihna nasa tak te chu a pe a.

³Sakawlh lu pakhat chu thihpui khawp hialin a hliam a; thihpui khawp hiala hliam chu a dam leh ta mai a. Khawvêl mi zawng zawngin mak an ti a, an zui huai huai a.

⁴Sakawlh hnêna thuneihna a pêk avâng chuan mi tinin Dragon chu chibai an bûk a. Sakawlh pawh chu chibai an bûk bawk a, “Sakawlh ang hi tu nge awm? Tu nge do thei ang?” an ti a.

⁵Pathian huatthu chaltlai taka sawia, thla sawmli leh pahnih chhûng duh tâwka a chêt an phalsak a.

⁶Tichuan, Pathian a sawichhe ta a, a hming te, a tempul te, vâna chêng zawng zawng te a sawichhe ta buan buan a.

⁷Mi thianghlimte a do leh a hneh phal a ni a, hnam tin, mi tin, ṭawng tin leh Jentail-te chunga thuneihna pêk a ni bawk a.

⁸Lei leh vân siam hmaa talh tawh Berâmno Nunna Lehkhabua hming chuangte chauh lo chuan khawvêla mi zawng zawngin amah chu an be dâwn a ni.

⁹Tu pawh hriat theihna beng nei chuan ngaithla ngun rawh se.

¹⁰Sala tâng tûr chu salah an tâng ang a, khandaiha thi tûr chu khandaihin an thi ang; hetah hian mi thianghlimte chu chhel tak leh rinawm taka an awm a ṭûlzia a lang.

¹¹Tin, sakawlh dang, berâm ki ang ki pahnih nei, Dragon anga thâwm na, lei aṭanga lo chhuak ka hmu a,

¹²sakawlh hmasa thuneihna nasa tak chu a hmaah a lek ta a; sakawlh, thihpui khawp hial hliam dam leh kha, lei leh a chhûnga mi zawng zawng a biak luihtîr ta a.

¹³Sakawlh pahnihna chuan thil mak a ti ṭeuh va, mi tin hmuhah vân ata mei te leiah a ko thla a,

¹⁴sakawlh hmasa hminga thil mak tam tak a tih phalsak a nih avângin leia mi zawng zawng a bum a; sakawlh, khandaih hliam tuar dam leh ta-a lim chu a dintîr a.

¹⁵Sakawlh lim chu a lo ṭawng theihna tûr leh, sakawlh lim be duh lo apiang a tihhlum theihna tûrin sakawlh lim tihnun theihna thu pêk a ni a.

¹⁶Sakawlh chuan mi zawng zawng, milian leh mitê, hausa leh rethei, bawih leh bawih lo te pawh an kut ding lamah emaw, an chalah emaw chhinchhiahna a nemsak a;

¹⁷chuvângin, sakawlh hming emaw, a hming tlukpui nambar emaw chhinchhiahna pu lo chuan tu mahin thil an leiin an hralh thei lo vang.

¹⁸Hetah hian fin a ṭûl hle. Chhût thiam chuan sakawlh nambar chu chhût rawh se, mihring nambar a ni si a, a zât chu zaruk leh sawmruk leh paruk a ni.