Read Mizo Lushai JOHANA HNENA ISUA KRISTA THU PUAN CHHUAH 16 Bible Online

JOHANA HNENA ISUA KRISTA THU PUAN CHHUAH 16 - Mizo Lushai bible

JOHANA HNENA ISUA KRISTA THU PUAN CHHUAH 16

¹Tempul aṭanga lo chhuak aw ring tak chuan vântirhkoh pasarihte hnênah, “Kal ula, Pathian thinrimna berhbu pasarihte chu leiah leihbaw rawh u,” a tih ka hria a.

²A hmasa ber chu a kal a, a berhbu chu leiah a leihbua a; tichuan, sakawlh leh a chhinchhiahna pute leh a lim betu mihringte tân pânchhia na takah a chang ta a.

³A pahnihna chuan a berhbu chu tuifinriatah a leihbua a; tichuan, thisen, mitthi thisen ang maiah a chang ta a; tuifinriata nungcha awm zawng zawng chu an thi zo ta a.

⁴A pathumna chuan a berhbu chu luiahte leh tuikhurahte a leihbua a, thisenah a lo chang ta a.

⁵Tui vântirhkoh chuan, “Awm mêk leh Awm tawh, Nang, mi thianghlim, ro i rêl dik ngei mai;

⁶mi thianghlimte leh zâwlneite thisen chhuahtute chu thisen i intîr ve tâk thung hi; in âwm rêng an ni,” a tih ka hria a.

⁷Maichâm aṭang chuan, “Ni e, Lalpa, Pathian Engkimtithei, i rorêlna chu a dikin a fel a ni,” tih aw ka hre bawk a.

⁸A palina chuan a berhbu chu ni-ah a leihbua a; ni chu mei saa mihringte em uh an phalsak a.

⁹Tichuan, mei sa-in mite chu a em ût ta a; mahse, chûng hremna chunga thuneitu Pathian hming chu an sawichhia a, an sim lo va, amah an fak duh hek lo.

¹⁰A pangana chuan a berhbu chu sakawlh lalṭhutthlêngah a leihbua a, a ram chu a lo thim ta vek a; an na tuar chu an ṭhen tlawk tlawk a.

¹¹An pân vei leh an na tuar avâng chuan vân Pathian chu an sawichhia a, an thiltihte chu an sim chuang lo.

¹²A parukna chuan a berhbu chu Eufretis luipuiah chuan a leihbua a, a tui chu a kang ta a; khawchhak lam aṭanga lal lo kal tûrte tân kawng a inhawng ta a ni.

¹³Tin, Dragon kâ aṭang te, sakawlh kâ aṭang te, zâwlnei der kâ aṭangtea lo chhuak thlarau bawlhhlawh pathum, chungu ang ka hmu bawk a. Chûng chu ramhuai thlarau an ni a, thil mak pawh an ti ṭhîn.

¹⁴Pathian Engkimtitheia ni ropuia indonaa hruai khâwm tûrin khawvêl lal zawng zawng hnênah an kal a.

¹⁵Ngai teh u, rûkru angin ka lo kal e, inringa inchei peih diama awm chu a nihlawh e, saruaka a awm miten an hmuha a zah loh nân.

¹⁶Hebrai ṭawnga Harmegadon an tih hmunah an rawn hruai khâwm a.

¹⁷A pasarihna chuan a berhbu chu boruakah a leihbua a, tempula lalṭhutthlêng aṭang chuan aw ring tak a lo chhuak a, “A zo ta,” tiin.

¹⁸Kâwl a phe a, aw a lo chhuak a, khawpui a ri dur dur a, lîr na takin a nghîng a, mihring awm china lîrnghîng azawngah a la na ber.

¹⁹Khaw ropui chu hmun thumah a lo phel a, Jentail khawpuite a chim a, Babulon khaw ropui chu Pathianin a hre reng a, a thinurna no chu a intîr ta a ni.

²⁰Thliarkâr zawng zawng a bo va, tlângte pawh hmuh tûr a awm tawh lo.

²¹Vân aṭangin rial lian pui pui, kg. sawmnga dâwn laia rit, mihring chungah a tla a. Riala hremna avâng chuan Pathian chu miten an sawichhia a, hremna chu a na êm êm mai si a.