Read Mizo Lushai JOHANA HNENA ISUA KRISTA THU PUAN CHHUAH 17 Bible Online

JOHANA HNENA ISUA KRISTA THU PUAN CHHUAH 17 - Mizo Lushai bible

JOHANA HNENA ISUA KRISTA THU PUAN CHHUAH 17

¹Berhbu pasarih keng Vântirhkoh pasarihte zînga pakhat chu a lo kal a, mi rawn bia a, “Hawh teh, tui tam tak chunga ṭhu, nawhchizuar hmingthang tak chunga rorêlna chu ka hmuhtîr ang che.

²Leia lalte chuan an tawmpui ṭhîn a, leia chêngte pawh a hurna zu chuan a hrai rui ṭhîn,” a ti a.

³Tichuan, Thlarauvin thlalêrah mi hruai a, sakawlh senlâr chunga chuang hmeichhia ka hmu a. Sakawlh taksa pumah chuan Pathian huatzâwng hming a chuang buai a, lu sarih leh ki sâwm a nei.

⁴Hmeichhia chu puan senduk leh senlârin a inthuam a, rangkachak ṭhi te, lungmantam te, tuikeplung tein a inchei a. A kutin thil tenawm leh a hur bawlhhlawhnaa khat rangkachak no a keng a.

⁵A chalah chuan awmze rûk nei, ‘Babulon khaw ropui, khawvêl nawhchizuarte nu, mi tenawmte nu,’ tih a chuang a.

⁶Chu nu chu mi thianghlimte thisen leh Isua avânga martarte thisena a rui ka hmu a. Amah ka han hmuh chuan mak ka ti êm êm a.

⁷Vântirhkoh chuan, “Engati nge mak i tih? He nu leh a phurtu sakawlh lu sarih leh ki sâwm nei thurûk chu ka hrilh ang che.

⁸Sakawlh i hmuh hi a awm tawh zet a, a awm leh ta lo va; leilâwt aṭangin a lo chhuak leh ang a, boralnaah a lût leh mai dâwn. Lei leh vân siam hmaa Nunna bu-a hming ziak loh leia chêngte chuan, sakawlh chu a awm tawh zet a, a awm leh ta lo va, a lo awm leh tûr chu mak an ti ang.

⁹Hei hi hriatthiam a ṭûl hle. Lu sarih chu hmeichhe ṭhutna tlâng sarih a ni a, lal pasarih an ni bawk.

¹⁰Panga chu an thi tawh a, pakhat chu a la awm a, a dang erawh chu a la awm rih lo; a lo awm hunah pawh rei lo tê chauh a awm ang.

¹¹Sakawlh, awm tawh zeta awm leh ta lova chu a pariatna a ni, pasarihte zînga mi kha a ni bawk; mahse, tihboral a ni ang.

¹²ki sâwm i hmuh kha lal sâwm, la lal ve lote an ni, anni chuan dârkâr khat chhûng chauh sakawlh nên lal anga thuneihna an nei ang.

¹³Inthurualin an thuneihna leh an thiltihtheihna chu sakawlh hnênah an pe ang.

¹⁴Anni chuan Berâmno chu an do vang a; mahse, Berâmno chuan a hneh ang: a hnung zuitu, a kohva a thlan, mi rinawmte nên chuan anni chu an hneh ang, ani chu lalte Lal, lalberte Lalber a ni si a,” a ti a.

¹⁵Ka hnênah a sawi zêl a, “Nawhchizuar ṭhutna tui tam tak i hmuh kha mi te, mipui te, Jentail-te leh ṭawng hrang hrang te an ni.

¹⁶I sakawlh hmuh leh a ki sâwmte chuan nawhchizuarnu chu an hua ang a, a silhfên an hlîp vek ang a, saruakin an hnutchhiah ang. A sa chu an ei ang a, meiah an rawh ral ang.

¹⁷Pathianin a thiltih tum ti tûrin an rilru a hneh a, Pathian thu a thlen kim hma chu sakawlh hnênah an lalna pêk an remti tlâng a ni.

¹⁸I hmeichhe hmuh kha, khawpui ropui, leia lalte chunga lal chu a ni,” a ti a.