Read Mizo Lushai JOHANA HNENA ISUA KRISTA THU PUAN CHHUAH 18 Bible Online

JOHANA HNENA ISUA KRISTA THU PUAN CHHUAH 18 - Mizo Lushai bible

JOHANA HNENA ISUA KRISTA THU PUAN CHHUAH 18

¹Chûng hnuah chuan vântirhkoh dang vân aṭanga lo chhuak ka hmu leh a. Thuneihna nasa tak a nei a, a ropuina chuan lei pum pui a ên a.

²Ring takin, “A tlâwm ta, Babulon khaw ropui chu a tlâwm ta. Ramhuaite chênna, thlarau bawlhhlawhte inkulhna leh sava bawlhhlawh tenawm tinrêng tawm khâwmna hmun a lo ni ta.

³A uirena, thinurna uain chu Jentail-ten an in a, leia lalte chuan ani chu an tawmpui a, a nawmsak bâwlna chu leia sumdâwngtuten an hausak phah ṭhîn,” tiin a au va.

⁴Vân aṭanga aw dang ka hre leh a: “Ka mite u, chhuahsan rawh u, A sualnaahte tel ve suh u, hremna hi in tuar ve dah ang e.

⁵A sualna chuan vân a tawng a, Pathianin a thil sual tih chu a hre reng a ni.

⁶In chunga a tih ang chiahin a chungah ti ve ula, a thiltih zawng zawng a lêtin thungrûl rawh u. In tûra a buatsaih leh hniha tak a novah chuan chhûnsak rawh u.

⁷A intihropui leh a nawmsak bâwl ang hu tuarna leh lungngaihnain thungrûl rawh u. ‘Lalnuah ka ṭhu a, hmeithai ka ni lo ve, lu ka sûn ngai lo ve,’ a ti rilru vei a.

⁸Chuvâng chuan, ni khat chhûng maiin hremna a tuar dâwn, thih te, lusûn te, ṭâm te, meia hâl ral te a tuar bawk ang. Thiam loh chantîrtu chu Lalpa Pathian Chaka a ni,” tiin.

⁹Leia lal, amah uirepuitu, nawmsak bâwlpui ṭhîntute chuan a kâng khu an hmuh chuan an ṭap ang a, khawpui chu an ṭah ang.

¹⁰A hremna chu tuar ve an hlauh avângin hla takah an thlîr ang a, “E heu! A va râpthlâk êm! Babulon khaw ropui leh chak tak chu, Dârkâr khat chhûng lekin a chhiat tâk hi!” an ti ang.

¹¹Leia sumdâwngtute pawhin an ṭah ang a, amah an sûn ang; tu man an zawrh sumte an leisak ta si lo.

¹²Rangkachak te, tangkarua te, lungmantam te leh tuikeplung te, puan zai sîn te, puan senlâr leh duk te, maimaw puan te, thing rimtui chi hrang hrang te, saingho te, dâr te, thîr te leh sailungvâra siam thil chi hrang tinrêng te,

¹³thakthîng te, mawsawla te, beraw te, mura te, rimtui hâl chi te, uain leh oliv hriak te, chhangphut leh a hûm te; sebâwng leh berâm te, sakawr leh tawlailîr te, bawih te leh mihring nunna an zawrh ṭhin te chu tu man an leisak tawh lo.

¹⁴Sumdâwngtute chuan, “I thei duhzâwng, i châk ṭhinte kha a awm ta lo; i ropuina leh i mawina zawng zawng a bo ta, i nei leh ngai tawh hauh lo vang,” an ti a.

¹⁵Chutianga sumdâwng mi, khawpuia sumdâwnga intihausate chuan a hremna tuar chu tuar ve an hlauh avângin hla takah an ding a:

¹⁶“E heu! A va râpthlâk êm! Khawpui ropui, puan zai sîn, senduk leh senlâra inthuama, Rangkachak ṭhi te, lungmantam te leh tuikeplung tea Inchei ṭhîn chu!

¹⁷Dârkâr khat chhûng lekin a hausakna a ral tâk vek hi!” an ti a. Lawng hotu te leh a chhûnga khualzin te, lawng khalhtu te leh tuifinriata hna thawktu te pawh hla takah an ding a.

¹⁸A kâng khu an hmuh chuan an au va, “He khua ang khawpui ropui dang a awm dâwn em ni?” an ti a.

¹⁹An lu-ah vaivut an phul a, an ṭah a, “E heu! A va râpthlâk êm! Tuifinriat lawng zawng zawng chu, He khawpui hausak zâra hausa an ni a, dârkâr khat chhûng lekin A ram tâk hi!” an ti a.

²⁰Aw vân te, mi thianghlim te, tirhkoh te, zâwlnei te u, a chhiat tâk avângin lâwm rawh u; in chunga a thil tihte avângin Pathianin a hrem ta a nih hi.

²¹Vântirhkoh chak tak hian chhangphut râwtna lung tiat zeta lian lung a la a, tuifinriatah a paih a, “Babulon khaw ropui chu hetiang hian vawm pil a ni ang a, tu man an hmu leh tawh hauh lo vang.

²²Ṭingṭang te, phênglâwng te, tawtawrâwt te I chhûngah an tum ri dâwn tawh lo. Thil tinrêng siam thiam hmuh tûr tu mah an awm lo vang a, Buh her thâwm hriat tûr a awm hek lo vang.

²³Khâwnvâr êng hmuh tûr a awm lo vang a, Mo leh a pasal hlim thâwm hriat tûr a awm hek lo vang. I sumdâwngtute khawvêl milian an ni a, I dawiin Jentail-te i bum si ṭhîn,” a ti a.

²⁴Mi thianghlim te, zâwlnei te leh leia an thah zawng zawng thisen a chhûngah chuan chhuah a ni ṭhîn.