Read Mizo Lushai JOHANA HNENA ISUA KRISTA THU PUAN CHHUAH 19 Bible Online

JOHANA HNENA ISUA KRISTA THU PUAN CHHUAH 19 - Mizo Lushai bible

JOHANA HNENA ISUA KRISTA THU PUAN CHHUAH 19

¹Chûng hnuah chuan vânah mipui nasa tak aw ang ka hria a: “Haleluia, chhandamna te, ropuina te, thiltihtheihna te kan Pathian ta a ni.

²A rorêl chu a dik a, a ṭha a ni, Nawhchizuar hmingthang, a hurnaa khawvêl tibawlhhlawhtu chu, Thiam loh a chantîr ta. A bawihte thisen a chhuahsak ṭhin avângin phuba a la ta a nih hi,” an ti a.

³“Haleluia, a kâng khu chu chatuanin a chho vang,” an ti leh a.

⁴Upa sawmhnih leh pali leh thilnung palite chu an bawkkhup a, lalṭhutthlênga ṭhu Pathian chu chibai an bûk a, “Amen, Haleluia,” an ti a.

⁵Tin, lalṭhutthlêng ata aw lo chhuak chuan, “Nangni a chhiahhlawh, milian leh mitê, amah ṭihtute u, kan Pathian hi fak rawh u,” a rawn ti a.

⁶Mipui nasa tak aw ang, tuifinriat ri hum hum ang, khawpui ri hluah hluah ang thâwm ka hria a: “Haleluia, Lalpa kan Pathian Engkimtitheia chuan ro a rêl e.

⁷Hlimin lâwm ila, i chawimawi ang u, Berâmno nupui neih a hun tâk hi; A nupui tûr pawh a inpeih tawh a,

⁸Puan zai sîn vâr tle takin an thuam ta. Puan zai sîn chu mi thianghlimte thil ṭha tihte hi a ni,” tiin.

⁹Tin, ka hnênah, “Ziak rawh, Berâmno nupui neihna ruai ṭheh tûra sâwmte chu an nihlawh e,” a ti a. “Hêng thute hi Pathian thu dik a ni,” a ti bawk a.

¹⁰A ke bula bawkkhupin chibai ka bûk ta a. Ka hnênah, “Khatin ti suh, nang leh Isua thu pawmtu, i unaute nêna in bawihpui mai ka nih hi. Pathian chibai bûk zâwk rawh, Isua thu rawn hril hi thuhriltîrtu thlarau a ni,” a ti a.

¹¹Tin, vân a lo inhawng a, sakawr vâr ka hmu a, a chunga chuang hming chu “Rinawma leh Dika” a ni, dik taka rorêlin râl a bei ṭhîn a ni.

¹²A mit chu meialh ang a ni a, a lu-ah chuan lallukhum tam tak a khum a, tu ma hriat ve loh amah chauhvin a hriat hming ziak a pu a.

¹³Kawr, thisena hnim a ha a, a hming chu ‘Pathian Thu-a’ a ni.

¹⁴Vân sipai rual puan zai sîn vâr tle taka inthuamte chuan sakawr chunga chuangin a hnung an zui a.

¹⁵A kâ aṭang chuan khandaih hriam tawn hriam tak a lo chhuak a, chu chuan Jentail-te a hneh ang a, thîrtiangin an chungah ro a rêl ang. Amah hi a ni Pathian Engkimtitheia thinurna nasa tak uain sâwrna khura rap sâwrtu tûr chu.

¹⁶A kawrah leh a malpuiah chuan hming “Lalte Lal, Hotute Hotu,” tih a chuang.

¹⁷Tin, vântirhkoh pakhat ni-a ding ka hmu a, vânlaizâwla sava thlâwk ṭhîn zawng zawng hnênah ring takin, “Pathian ruai ropui ṭheh tûrin lo kal rawh u;

¹⁸lal sa te, sipai hotu sa te, mi huai sa te, sakawr leh a chungchuang sa te, bawih leh bawih lo, milian leh mitê, an zavaia sa in ei dâwn nia,” a ti a.

¹⁹Sakawlh leh lei lalte chu an sipaite nên chuan sakawr vâr chunga chuang leh a sipaite bei tûrin an kal khâwm ka hmu a.

²⁰Sakawlh chu an man a, a mit hmuha thil mak ti ṭhîn zâwlnei der pawh chu an man a. Chu Zâwlnei chuan a thil tih makin sakawlh nambar pute leh a lim betute chu a bum ṭhîn a ni. An pahnih chuan a nung chungin kâta kâng meidîlah chuan an paih ta a.

²¹Sakawr chunga chuang kâ aṭanga khandaih lo chhuak chuan mi dangte pawh chu thah an ni a; savate chuan an sa chu puar takin an ei ta a.