Read Mizo Lushai JOHANA HNENA ISUA KRISTA THU PUAN CHHUAH 20 Bible Online

JOHANA HNENA ISUA KRISTA THU PUAN CHHUAH 20 - Mizo Lushai bible

JOHANA HNENA ISUA KRISTA THU PUAN CHHUAH 20

¹Tin, vân aṭanga Vântirhkoh pakhat lo chhuk ka hmu a, leilâwt chabi leh khaidiat lian tak a keng a.

²Dragon, Rûlpui Tar, Diabola leh Setana chu a man a, kum sâng tâng tûrin a phuar a;

³kum sâng a ral hma chu hnamte a bum tawh loh nân leilâwtah chuan a thlâk a, a kalh khum a, a châr hnan ta a. Chumi hnuah erawh chuan rei lo tê an chhuahtîr leh ang.

⁴Tin, Lalṭhutthlêng ka hmu a, a chunga ṭhute chu ro an rêltîr a. Isua thu an hril avâng leh Pathian thu avânga lu tante thlarau ka hmu a, sakawlh leh a lim be ve lo, an chalah emaw, an kutah emaw a chhinchhiahna awm ve lote thlarau ka hmu bawk a. Chûng chu an lo nung leh a, Krista hovin kum sâng ro an rêl ta a.

⁵Mitthi dangte erawh chu kum sâng a ral hma chuan an nung leh ve rih lo. Hei hi thawhlehna hmasa chu a ni.

⁶Thawhlehna hmasaa telte chu an thianghlimin an nihlawh e. Thih hnihna chuan an chungah thuneihna a nei tawh lo. Pathian leh a Krista tân puithiam an ni ang a, a hovin kum sâng an lal ang.

⁷Kum sâng a ral hnu chuan a tânna ata Setana chu an chhuah ang a,

⁸lei kil li-a Jentail-te, Gog leh Magog chu a rawn bum ang a, indonaah a hruai khâwm ang; an tam lam chu tuifinriat kama ṭiauvaivut anga tam an ni.

⁹Lei pum dâpin an lo chho va, mi thianghlimte kulh leh a khawpui duh tak chu an hual a; mahse, vân ata mei a lo sûr a, anni chu a kâng ral ta a.

¹⁰Anmahni bumtu Diabola chu, Sakawlh leh zâwlnei der awmnaah, kâta kâng meidîlah chuan an paih a, chutah chuan a chhûn a zânin hrem an tuar kumkhua tawh ang.

¹¹Lalṭhutthlêng vâr ropui tak leh a chunga ṭhu ka hmu a, a hma ata lei leh vân an tlân bo va, hmuh tûr a awm tawh lo.

¹²Mitthite, milian leh mitê, lalṭhutthlêng hmaa ding ka hmu, lehkhabu zialte an pharh a; tin, lehkhabu zial dang, nunna bu an pharh ka hmu bawk a; mitthite chu chûng lehkhabua an thiltih ziak ang zêl chuan an chungthu rêl a ni a.

¹³Tuifinriat chuan a chhûnga mitthite chu a chhuah a, thihna leh mitthi khua pawh chuan mitthi an kawlte chu an chhuah bawk a; mi tin an thiltih ang zêlin an chungthu rêl a ni ta a.

¹⁴Thihna leh mitthi khua chu meidîlah an paih a.

¹⁵He meidîl hi thih hnihna chu a ni. Tu pawh Nunna bu-a an hming an hmuh loh chu meidîlah chuan an paih a.