Read Mizo Lushai JOHANA HNENA ISUA KRISTA THU PUAN CHHUAH 21 Bible Online

JOHANA HNENA ISUA KRISTA THU PUAN CHHUAH 21 - Mizo Lushai bible

JOHANA HNENA ISUA KRISTA THU PUAN CHHUAH 21

¹Tin, vân thar leh lei thar ka hmu a, vân hmasa leh lei hmasa chu a awm tawh lo va, tuifinriat pawh a awm tawh hek lo

²Khaw thianghlim, Jerusalem thar chu, mo pasal nei tûra inchei diam anga inpeih, Pathian hnên ata vân aṭanga lo chhuk ka hmu a.

³Lalṭhutthlêng ata aw ring tak ka hria a, “Ngai teh, Pathian chênna chu mihring zîngah a lo awm ta: An zîngah a chêng ang a, a mite an ni ang. Pathian ngei chu an hnênah a awm ang a, an Pathian a ni bawk ang.

⁴An mit ata mittui zawng zawng a hru hul ang a, Thih a awm leh tawh lo vang. Lu sûn te, ṭah te, nat te pawh a awm tawh hek lo vang. Thil hluite chu a liam ta a,” a ti a.

⁵Lalṭhutthlênga ṭhu chuan, “Ngai teh, thil engkim ka siam thar e,” a ti a. “Ziak rawh, hêng ka thute hi a rinawmin a dik a ni,” a ti leh a.

⁶Ka hnênah, “A lo thleng ta, kei Alfa leh Omega, a bul leh a tâwp ka ni. Tuihâl apiang hnênah nunna tuikhura mi a thlâwna in tûr ka pe ang.

⁷A hnehtute chuan hêng hi an chang dâwn: An Pathian ka ni ang a, ka tân fapa an ni bawk ang.

⁸Mi dawihzep te, ring lo te, tenawm te, tual that te, inngaih chîng te, dawithiam te, milem bia te leh dawthei zawng zawng te chan tûr erawh chu kâta kâng meidîl a ni, chu chu thih hnihna chu a ni,” a ti a.

⁹Tin berhbu pasarih, hremna hnuhnûng pasariha khat keng vântirhkoh pasarih zînga pakhat chu ka hnênah a lo kal a, “Lo kal teh, Berâmno nupui, a mo chu ka lo entîr ang che,” mi ti a.

¹⁰Thlarauvin tlâng lian pui sâng takah mi hruai a, Jerusalem, khawpui thianghlim chu Pathian hnên ata vân aṭanga lo chhuk mi entîr a.

¹¹Pathian ropuina a khum a, a ên dân chu lungmantam jaspi lung, krustal anga fîm a ni.

¹²Kulh bang chhah tak, sâng tak a nei a, kawngkhâr sâwm leh pahnih a awm a, kawngkhârte chu vântirhkoh sâwm leh pahnihin an vêng a; chûng kawngkhârahte chuan hming ziak a awm - Israel fa hnam sâwm leh pahnihte hming chu.

¹³Chhak lamah kawngkhâr pathum, hmâr lamah kawngkhâr pathum, chhim lamah kawngkhâr pathum, thlang lamah kawngkhâr pathum a awm ṭheuh va.

¹⁴Khawpui kulh bang chuan innghahna lungphûm sâwm leh pahnih a nei a, chutah chuan Berâmno tirhkoh sâwm leh pahnihte hming a chuang bawk a.

¹⁵Mi betu chuan khawpui leh a kawngkhârte leh kulh bang teh nân rangkachaka siam tehna tiang a keng a.

¹⁶Khawpui chu kil li nei, a dung lam leh a vâng lam inbial a ni a, tiang chuan a han teh a. Km. sânghnih leh zali a sei a ni. A dung leh a vâng leh a sân lam chu a inchen vek a.

¹⁷A kulh bang chu mihring tehna hmangin vântirhkoh chuan a han teh a, metar sawmruka chhah a ni.

¹⁸A kulh bang atân jaspi lung an hmang a, khawpui chu dârthlalang anga fîm rangkachak thianghlima din a ni.

¹⁹Khawpui kulh bang lungphûm chu lungmantam chi hrang hrang a ni a, lungphûm pakhatna chu jaspi lung a ni a, a pahnihna chu safir lung a ni a, a pathumna chu kalkedon lung a ni a, a palina chu smaragdin lung a ni a,

²⁰a pangana chu sardonuk lung a ni a, a parukna chu sardoni lung a ni a, a pasarihna chu kruso lung a ni a; a pariatna chu berul lung a ni a, a pakuana chu topaz lung a ni a, a sâwmna chu krusopras lung a ni a, a sâwm leh pakhatna chu huakintho lung a ni a, a sâwm leh pahnihna chu amethus lung a ni.

²¹Kawngkhâr sâwm leh pahnihte chu tuikeplung sâwm leh pahnih, tlang khat ṭheuhva siam a ni. Khawpui kawtlai chu rangkachak thianghlim dârthlalang anga fîm a ni.

²²Khawpui chhûngah chuan tempul ka hmu lo. Lalpa Pathian Engkimtitheia leh Berâmno chu an tempul a ni.

²³Khawpui ên tûrin ni leh thla a ngai lo, Lalpa ropuina chuan a ên a, an khâwnvâr chu Berâmno a ni.

²⁴Jentail-te chu a êngah chuan an lêng ang a, leia lalte pawhin an ropuina an rawn luhpui ang.

²⁵A kawngte chu chhûnah an khâr ngai lo vang a, zân a awm tawh hek lo vang.

²⁶Jentail-te chuan an ropuina leh chawimawina an rawn luhpui ang.

²⁷Thil bawlhhlawh eng mah a lo lût thei hek lo vang a, thil tenawm tite leh dâwt chîngte an lo lût thei hek lo vang; Berâmno nunna bu-a hming chuangte chauh an lût thei ang.