Read Mizo Lushai JOHANA HNENA ISUA KRISTA THU PUAN CHHUAH 22 Bible Online

JOHANA HNENA ISUA KRISTA THU PUAN CHHUAH 22 - Mizo Lushai bible

JOHANA HNENA ISUA KRISTA THU PUAN CHHUAH 22

¹Tin, nunna lui mi entîr a; krustal anga fîm a ni, Pathian leh Berâmno lalṭhutthlêng aṭangin a lo luang chhuak a,

²khawpui lai taka kawtthlêrah chuan a luang tlang a, a kam tuakah chuan nunna thing, rah chi hrang sâwm leh pahnih nei a awm, thla tin a rah a, a hnahte chu hnam tin tihdamna a ni.

³Ânchhe dawng thil eng mah a awm tawh lo vang; tah chuan Pathian leh Berâmno lalṭhutthlêng a inhûng ang a, a bawihte chuan a rawng an bâwl ang a,

⁴a hmêl an hmu reng ang; an chalah chuan a hming a chuang bawk ang.

⁵Zân a awm tawh lo vang a, khâwnvâr leh ni êng an ngai tawh hek lo vang, Lalpa Pathian chuan a ên dâwn si a, chatuan chatuanin an lal tawh ang.

⁶Ka hnênah, “Hêng thute hi a rinawmin a dik a ni, Lalpa Pathian, zâwlneitea thu sawitu chuan thil lo thleng thuai tûr a bawihte entîr tûrin vântirhkoh a rawn tîr a ni.

⁷Ngai teh, ka lo kal thuai dâwn e; he lehkhabua hrilhlâwkna thu zâwmtute chu an nihlawh e,” a ti a.

⁸Hêng hretu leh hmutu hi kei Johana hi ka ni. Ka hriata ka han hmuh chuan hêng thil mi entîrtu vântirhkoh ke bulah chuan chibai bûk tûrin ka bawkkhup a.

⁹Ani chuan “Khatin ti suh, kei chu i bawihpui, zâwlneite leh he lehkhabu thu zâwmtute bawihpui ve mai ka nih hi, Pathian chibai bûk zâwk rawh,” mi ti a.

¹⁰Ani chuan ka hnênah, “He lehkhabua hrilhlâwknate hi zêp suh, a hun a lo thleng ṭêp a ni.

¹¹Mi sualte chu sual zêl sela, mi bawlhhlawhte chu bawlhhlawh zêl sela, mi ṭha chu ṭha zêl sela, mi thianghlim pawh thianghlim zêl mai rawh se,” a ti a.

¹²Ngai teh, ka lo kal thuai dâwn e; mi tin an thiltih ang zêla pêk tûrin lâwmman ka hnênah a awm.

¹³Kei hi Alfa leh Omega, hmasa ber leh hnuhnûng ber, a bul leh a tâwp chu ka ni.

¹⁴An puan su faite chu an nihlawh e, khawpui chhûnga lûtin nunna thinga mi an ei thei dâwn si a.

¹⁵Ui te, dawithiam te, inngaih chîng te, tual that te, milem bia te, dâwt sawi chîng leh ngaina zawng zawngte erawh chu a pâwnah an awm ang.

¹⁶“Kei Isua hian, kohhrante hêng thu hrilh tûrin ka vântirhkoh ka rawn tîr a nih hi; Davida zungzâm, a thlah, vârparh arsi êng chu ka ni,” a ti a.

¹⁷Thlarau leh mo chuan, “Lo kal rawh,” an ti a. A hria apiang pawhin, “Lo kal rawh,” ti ve rawh se. Tuihâl apiang lo kal sela, nunna tui duh apiangin a thlâwnin han in rawh se.

¹⁸He lehkhabua hrilhlâwkna thu hria apiang ka hriattîr e: miin hêng thute hi an belhchhah chuan, Pathianin he lehkhabua hremna sawite hi a belhchhah ve ang.

¹⁹Tu pawhin he lehkhabua hrilhlâwkna thute hi an lâk bo chuan, he lehkhabua ziak nunna thinga mi leh khaw thianghlima an chan tûr chu Pathianin a lâksak ve ang.

²⁰Hêng thu puangtu hian, “A ni, ka lo kal thuai dâwn e,” a ti a. Amen, Lalpa Isu, lo kal ta che.

²¹Lalpa Isua khawngaihna chu mi tin hnênah awm rawh se.