Read Mizo Lushai JOHANA HNENA ISUA KRISTA THU PUAN CHHUAH 3 Bible Online

JOHANA HNENA ISUA KRISTA THU PUAN CHHUAH 3 - Mizo Lushai bible

JOHANA HNENA ISUA KRISTA THU PUAN CHHUAH 3

¹“Sardis khaw kohhran tirhkoh hnênah pawh heti hian ziak rawh: ‘Pathian Thlarau pasarih leh arsi pasarih neia chuan heti hian a ti.

²I thil tihte ka hria; thi reng siin nunga i than hi; intiharh la, i thil neih thi lek lekte chu tinung leh rawh. I thiltihte chu ka Pathian mit tlung zo a awm lo va ni.

³Tichuan, an zirtîr che leh i thu dawnte kha hre rengin zâwm la, i sual kha sim rawh. I harh loh erawh chuan rûkru angin ka lo kal ang a, i hnên ka lo thlen hun i hre lo dah ang e.

⁴Sardis khuaa mi ṭhenkhat erawh chu an thawmhnaw tibawlhhlawh lo an awm, chûng chu kawrfual vâr ha-in ka hnênah an lêng ve ang, chutianga awm tlâk chu an ni si a.

⁵Hnehtute chuan chutiang chuan kawrfual vâr an ha ang a, nunna bua an hming chuang chu ka thai bo lo vang. Ka Pa leh vântirhkohte hmaah anni chu ka ṭan ang.

⁶Thlarauvin kohhrante hnêna thu a sawi hi hriat theihna beng nei chuan ngaithla ngun rawh se.’

⁷“Filadelfia khaw kohhran tirhkoh hnênah pawh heti hian ziak rawh: ‘Thianghlima leh Dika, Davida chabi neia, tu ma khâr theih loh tûra kawngkhâr hawnga, tu ma hawn theih loh tûra khâra chuan heti hian a ti:

⁸I thiltihte ka hria, chakna tlêm tê chauh i nei na a, ka thu i vawng tlat a, tu ma khâr theih loh tûr i hmaah kawngka ka hawng a.

⁹Tin, Setana sunagog-a mi, mi dawthei, Juda ni si lova Juda intite chu hruaiin i hmaah ka rawn kûntîr dâwn; nang hi ka hmangaih chu i ni tih an hre tawh ang.

¹⁰Chhel taka awm tûra thu ka pêk che i vawn avângin leia chêng zawng zawng fiah nân khawvêl puma hremna lo thlen hunah kei pawhin ka humhim ang che.

¹¹Ka lo kal thuai dâwn e, i thil neih sa kha vawng tlat la; tichuan, tu man chawimawina lukhum i chan tûr chu an chhuhsak lo vang che.

¹²A hnehtu apiang chu ka Pathian Tempul banah ka phun ang a, chuta ta chu sawn an ni tawh lo vang. Pa Pathian hming anmahniah chuan a chuang ang a, Pathian khawpui Jerusalem thar, ka Pathian hnên ata lo chhuk hming leh ka hming thar chu anmahniah ka ziak bawk ang.

¹³Thlarauvin kohhrante hnêna thu a sawi hi hriat theihna beng nei chuan ngaithla ngun rawh se.’

¹⁴“Laodikei khaw kohhran tirhkoh hnênah pawh heti hian ziak rawh: ‘Amena, Thuhretu rinawma leh Dika, Pathian thil siam zawng zawng bula chuan heti hian a ti:

¹⁵I thiltihte ka hria, i vâwt lo va, i lum hek lo; i vawh emaw, i lum emaw ka duh a ni.

¹⁶Vawt si lo, lum pep pup chauh i nih avângin ka kâ ata ka chhâk chhuak ang che.

¹⁷‘Ka hausa a, engkim ka ngah a, tlâkchham ka nei lo,’ i ti vei a; rethei khawngaihthlâk, pachhia, mitdel leh saruak mai i ni tih i inhre si lo.

¹⁸Tichuan, i hausak theih nân rangkachak meia rawh thianghlim ka hnên aṭanga lei tûrin ka râwn a che. I saruak zahpuiawm tak khuh tûrin i hâk atân kawr vâr lei la, i hmuh theih nân mit na damdawi lei bawk rawh.

¹⁹Ka hmangaihte chu ka zilhin ka thunun ṭhîn; chuvângin, ka thu awih la, sim rawh.

²⁰Ngai teh, kawngkhâr bula dingin ka kik hi, tu pawh ka aw hriaa kawng mi hawnsaktu hnênah chuan ka lût ang a, zanriah ka ei ang a, ani pawhin ka hnênah a ei bawk ang.

²¹A hnehtute apiang ka lalṭhutthlêngah ka ṭhuttîr ang a; kei pawhin ka hneha, ka Pa bulah a lalṭhutthlênga ka ṭhu ang hian.

²²Thlarauvin kohhrante hnêna thu a sawi hi hriat theihna beng nei chuan ngaithla ngun rawh se.’ ”