Read Mizo Lushai JOHANA HNENA ISUA KRISTA THU PUAN CHHUAH 4 Bible Online

JOHANA HNENA ISUA KRISTA THU PUAN CHHUAH 4 - Mizo Lushai bible

JOHANA HNENA ISUA KRISTA THU PUAN CHHUAH 4

¹Chûng hnu chuan ka han en a, vâna kawngka inhawng ka hmu a, tawtawrâwt ri ang aw, mi bia ka hriat tawh khân, “Hetah hian lo chho la, tûn hnua thil lo awm ngei tûr ka entîr ang che,” mi ti a.

²Thlarauvin ka awm ta nghâl a. Vânah chuan lalṭhutthlêng a lo awm a, tah chuan mi pakhat a ṭhu a.

³A hmêl chu Jaspi leh Sardion lung ang a ni a, lalṭhutthlêng vêlah chuan Samaragdin lung rawng ang chhimbâl a zâm kual a.

⁴Lalṭhutthlêng hual chuan lalṭhutthlêng dang sawmhnih leh pali a inhûng a, tah chuan upa sawmhnih leh pali an ṭhu a, a vârin an inthuam a, rangkachaka siam chawimawina lukhum an khum bawk a.

⁵Lalṭhutthlêng aṭang chuan kâwl a phe a, aw te, khawpui te a lo ri chhuak dur dur a. Lalṭhutthlêng hmaah chuan meichher pasarih a alh hluah hluah a, chûng chu Pathian thlarau pasarihte an ni.

⁶Lalṭhutthlêng hma lamah chuan tuifinriat ang dârthlalang, krustal lung anga fîm a awm bawk a. A laia lalṭhutthlêng vêlah chuan hnung lam leh hma lam mita khat, thilnung pali an ding kual a.

⁷Thilnung pakhatna chu Sakeibaknei ang a ni a, thilnung pahnihna chu bâwngpa ang a ni a, thilnung pathumna chu mihring hmêl ang pu a ni a, thilnung palina chu mupui thlâwk lai ang a ni.

⁸Thilnung palite chuan thla paruk an nei ṭheuh va, an pâwn lam leh an chhûng lam chu mitin a khat bawk a: “Lalpa Pathian, Engkimtitheia, awm tawha leh awm mêka leh lo kal tûra chu a thianghlim e, a thianghlim e, a thianghlim e,” tia auvin chhun leh zân an châwl lo.

⁹Thilnung palite chuan lalṭhutthlênga ṭhu, chatuana nung renga chu an chawimawia, an faka, lâwmthu an hrilh apiangin,

¹⁰lalṭhutthlênga ṭhu-a hmaah chuan upa sawmhnih leh palite chu an bawkkhup a, chatuana nung renga chu chibai an bûk ṭhîn a.

¹¹Lalṭhutthlêng hmaah chuan an lu-a chawimawina lukhum chu an dah a, “Nang, kan Lalpa leh kan Pathian, Ropuina te, chawimawina te, Thiltihtheihna te nei tlâk i ni e, Thil engkim i siam a, I thuin an lo awm a, din chhuah an lo ni,” an ti a.