Read Mizo Lushai JOHANA HNENA ISUA KRISTA THU PUAN CHHUAH 5 Bible Online

JOHANA HNENA ISUA KRISTA THU PUAN CHHUAH 5 - Mizo Lushai bible

JOHANA HNENA ISUA KRISTA THU PUAN CHHUAH 5

¹Lalṭhutthlênga ṭhu-a ding lamah chuan, pâwn lam leh chhûng lama ziak lehkhabu zial, chhinchhiahna pasariha châr tlat ka hmu a.

²Vântirhkoh thiltithei tak ka hmu bawk a, “Tu nge lehkhabu zial hi hawnga, a chhinchhiahnate hi phelh tlâk awm?” tiin ring takin a tlângau va.

³Lehkhabu zial chu phelha, a chhûng en thei vânah tu mah an awm lo va, leiah leh lei hnuaiah pawh tu mah an awm hek lo.

⁴Lehkhabu zial chu phelha en tlâk tu mah an awm loh avâng chuan ka ṭap ta zawih zawih a.

⁵Upa zînga pakhat chuan, “Ṭap teh suh, ngai teh, Juda hnama sakeibaknei, Davida thlaha mi khân chhinchhiahna chu phelh tûr leh, lehkhabu zial chu pharh tûrin a hneh ta,” a ti a.

⁶Tin, thilnung pali leh upaho ṭhut hual, a laia lalṭhutthlêngah chuan, Berâmno talh tawh ni âwm tak ding ka hmu a. Berâmno chuan mit pasarih leh ki pasarih, lei hmun tina tirh chhuah ṭhin, Pathian thlarau pasarih chu a nei a.

⁷Lalṭhutthlênga ṭhu-a ding lama lehkhabu zial chu la tûrin a lo kal a.

⁸A han lâk chuan thilnung palite leh upa sawmhnih leh palite chu Berâmno hmaah chuan an bawkkhup a, perhkhuang leh rangkachak berhbu, rimtui mi thianghlimte ṭawngṭainaa khat chu an keng ṭheuh va,

⁹hla thar an sa a: “Nang, lehkhabu zial chu laa, a chhinchhiahna phelh tlâk i ni e. I thi a, i thisenin hnam tin, ṭawng tin, mi tin leh Jentail-te, Pathian tân i lei a;

¹⁰Lalah te, kan Pathian tân puithiamah te i siam a. Lei chungah an lal ang,” tiin.

¹¹Ka en reng a, lalṭhutthlêng leh thilnung leh upaho din huala vântirhkoh rual, a sînga sîng, a sânga sâng rual tam tak aw ka hria a, ring takin an au va,

¹²“Berâmno talh tawha chu, Thiltihtheihna te, hausakna te, finna te, chakna te, chawimawina te, Ropuina te, fakna te dawng tlâk a ni e,” an ti a.

¹³Thil nung tinrêng, vâna mi te, leia mi te, lei hnuaia mi te, tuifinriat leh a chhûnga awm zawng zawng te au thâwm ka hre bawk a, “Lalṭhutthlênga ṭhu-a leh Berâmno chuan fakna te, chawimawina te, ropuina te, Thiltihtheihna te chatuanin nei rawh se,” an ti a.

¹⁴Thilnung palite chuan, ‘Amen,’ an lo ti a, upate pawh chuan bawkkhupin chibai an bûk a.