Read Mizo Lushai JOHANA HNENA ISUA KRISTA THU PUAN CHHUAH 6 Bible Online

JOHANA HNENA ISUA KRISTA THU PUAN CHHUAH 6 - Mizo Lushai bible

JOHANA HNENA ISUA KRISTA THU PUAN CHHUAH 6

¹Berâmno chuan chhinchhiahna pasarih zînga pakhat a phelh lai chu ka hmu a, thilnung pali zînga pakhat chuan khawpui ri ang maia auvin, “Lo chhuak rawh,” a tih ka hria a.

²Ka han en a, sakawr vâr ka hmu a, a chunga chuang chuan thalngul a keng a, chawimawina lukhum an khumtîr a, hneh zêl tûrin hnehtu chu a chhuak ta a.

³Chhinchhiahna pahnihna a han phelh a, thilnung pahnihna chuan, “Lo chhuak rawh,” a tih ka hria a.

⁴Ka han en a, sakawr dang, a sen a lo chhuak a. A chunga chuang chu insâmpui a thlen theih nân lei ata remna lâk bo theihna an pe a, khandaih lian pui mai an pe bawk a.

⁵Chhinchhiahna pathumna a han phelh leh a, thilnung pathumna chuan, “Lo chhuak rawh,” a tih ka hria a. Ngai teh, kan han en chuan sakawr dum ka hmu a. A chunga chuang chuan a kutin bûkna a keng a.

⁶Thilnung palite zîng aṭanga chhuak ni âwm tak aw ka hria a, “Ni khat hlawhin buhpui kg. khat, ni khat hlawhin barli kg. Thum; uain leh hriak chu khawih tel suh,” tiin.

⁷Chhinchhiahna palina a han phelh a, thilnung palina chuan, “Lo chhuak rawh,” a tih ka hria a.

⁸Ka han en a, ngai teh, sakawr dâng ka hmu a, a chunga chuang hming chu Thihnaa a ni a, Mitthikhuaan a rawn zui a. Ngûnhnâm te, ṭâm te, hri te, ram sakawlh te hmanga tihlum tûrin lei hmun li-a ṭhena hmun khat chunga thuneihna an pe a.

⁹Chhinchhiahna pangana a han phelh a, Pathian thu avâng leh an thu hrilh avânga thah, mi thianghlimte thlarau chu maichâm hnuaiah ka hmu a.

¹⁰Anni chu aw ring takin an au va, “Aw Lalpa ropui, mi thianghlim leh mi dik tak, engtikah nge lei mite chunga ro i rêl anga, kan thisen phuba chu min lâksak dâwn?” an ti a.

¹¹Kawrfual vâr an pe ṭheuh va, an bawihpuite leh an unaute, anmahni ang bawka thah an nih hma chu lo nghâk rih tûrin an hrilh ta bawk a.

¹²Chhinchhiahna parukna a han phelh chuan lîr a nghîng ta chiam a, sahmul puan dum ang maiin ni a lo thim a, thla chu thisen angin a sen bawk a.

¹³Thlipuiin theipui hel a nuai ṭîl ang maiin arsite chu leiah a tla chum chum a.

¹⁴Vân chu lehkhabu anga zial bo a ni a, tlângte leh thliarkâr zawng zawng chu sawn an ni ta vek a.

¹⁵Tichuan, leia lalte, hotute, sipai hotute, mi hausa leh mi thiltitheite leh mi dang, bawih leh bawih lote pawh chu pûkah te, tlânga lungpui phênah te an biru a.

¹⁶Tlâng leh lungpui te hnênah chuan, “Lalṭhutthlênga ṭhu-a mit hmuh ata leh Berâmno thinurna lak ata min delh ula, min khuh rawh u.

¹⁷An thinurna râpthlâk tak chu a lo thleng ta si a, tu nge tuar zo vang?” an ti a.