Read Mizo Lushai JOHANA HNENA ISUA KRISTA THU PUAN CHHUAH 7 Bible Online

JOHANA HNENA ISUA KRISTA THU PUAN CHHUAH 7 - Mizo Lushai bible

JOHANA HNENA ISUA KRISTA THU PUAN CHHUAH 7

¹Chûng hnuah chuan lei kil li-ah vântirhkoh pali ding ka hmu a, lei chungah te, tuifinriat chungah te, thing chungah te thli a tleh loh nân thli palite chu an chelh tlat a.

²Vântirhkoh dang, Pathian nung chhinchhiahna keng, khawchhak lama lo chhuak ka hmu bawk a; lei leh tuifinriat tihchhiat theihna an pêk vântirhkoh palite chu ring takin a han au va,

³“Kan Pathian bawihte chala kan chhinchhiah zawh hma chu lei te, tuifinriat te, thing te eng mah tih suh u,” tiin.

⁴Israela fa, hnam sâwm leh pahnih zînga mi an chhinchhiah zât chu, mi nuaikhat leh sîngli leh sângli an ni tih an sawi ka hria; hetiangin:

⁵Juda hnama mi sîngkhat leh sânghnih, Reubena hnama mi sîngkhat leh sânghnih, Gada hnama mi sîngkhat leh sânghnih,

⁶Asera hnama mi sîngkhat leh sânghnih, Naftalia hnama mi sîngkhat leh sânghnih, Manasea hnama mi sîngkhat leh sânghnih,

⁷Sumeona hnama mi sîngkhat leh sânghnih, Levia hnama mi sîngkhat leh sânghnih, Isakara hnama mi sîngkhat leh sânghnih,

⁸Zebuluna hnama mi sîngkhat leh sânghnih, Josefa hnama mi sîngkhat leh sânghnih, Benjamina hnama mi sîngkhat leh sânghnih.

⁹Chûng hnuah chuan mipui nasa tak tu ma chhiar sên loh, Jentail-te leh hnam tin, mi tin, ṭawng tina mi ka hmu a, tûmkaute kenga kawrfual vâr ha-in lalṭhutthlêng leh Berâmno hmaah chuan an ding a.

¹⁰Ring takin an au va: “Chhandamna chu kan Pathian Lalṭhutthlênga ṭhu leh Berâmno hnêna mi a ni,” an ti a.

¹¹Vântirhkoh zawng zawng chu lalṭhutthlêng leh upate leh thilnung palite hualin an ding a, lalṭhutthlêng hmaah chuan an bawkkhup a, Pathian chibai an bûk a:

¹²Amen, Fakna te, ropuina te, finna te, Lâwmthu sawina te, chawimawina te, thiltihtheihna te leh Chakna te kumkhuain kan Pathian ta a ni, Amen,” an ti a.

¹³Upa zînga pakhat chuan, “Hêng kawrfual vâr hate hi tute nge ni-a, khawi lam aṭanga lo kal nge an nih?” tiin mi zâwt a.

¹⁴Kei chuan ka chhâng a, “Ka pu, nangin i hre zâwk ang,” ka ti a. Ani chuan, “Hêng mite hi hrehawm nasa tak ata chhuak hote kha an ni a, an puante su faia, an silhfênte Berâmno thisena tivâr tate an nih hi.

¹⁵Chuvâng chuan, Pathian lalṭhutthlêng hmaah an awm a, a tempulah chuan a chhûn a zânin a rawng an bâwl ta a ni: Lalṭhutthlênga ṭhu-a chuan an chungah a puan in a zârsak dâwn si a.

¹⁶An rilṭâm leh tawh ngai lo vang a, an tuihâl tawh hek lo vang, ni sa an tuar ngai tawh lo vang a, khaw lumin a tihrehawm tawh hek lo vang.

¹⁷Lalṭhutthlêng laia awm Berâmno chu anmahni vêngtu a ni ang a, nunna tuikhurah te chuan a hruai ang. Pathian chuan an mit ata mittui zawng zawng a hru fai ang,” a ti a.