Read Mizo Lushai JOHANA HNENA ISUA KRISTA THU PUAN CHHUAH 8 Bible Online

JOHANA HNENA ISUA KRISTA THU PUAN CHHUAH 8 - Mizo Lushai bible

JOHANA HNENA ISUA KRISTA THU PUAN CHHUAH 8

¹Tin, chhinchhiahna pasarihna a han phelh chuan dâr chanve lai vân chu a reh ta ṭhup a.

²Pathian hmaa vântirhkoh pasarih ding ka hmu a, tawtawrâwt pasarih an pe a.

³Vântirhkoh dang, rangkachak berhbu keng, lalṭhutthlêng hmaa rangkachak maichâmah chuan a lo kal a, mi thianghlimte ṭawngṭaina belhchhah nân rimtui hâl tûr an pe ṭeuh va.

⁴Vântirhkoh kuta rimtui hâl khu chu mi thianghlim ṭawngṭainate nên chuan Pathian hmaah a khu chho ta a.

⁵Vântirhkoh chuan berhbu chu a la a, maichâma meiling chu a khatin a rût a, leiah a paih thla a. Tichuan, khawpui a ri a, aw a lo chhuak a, kâwl a lo phe a, lîr te a lo nghîng ta dur dur a.

⁶Tin, vântirhkoh pasarihte chuan tawtawrâwt an kente chu hâm tûrin an insiam a.

⁷A hmasa ber chuan a han hâm a, rial leh mei, thisen nêna inpawlh leiah a tla ta chiam mai a. Lei hmun thuma ṭhena hmun khat leh thing hmun thuma ṭhena hmun khat chu a kâng ral a, hnimhring zawng zawng pawh a kâng ral vek bawk a.

⁸Vântirhkoh pahnihna chuan a han hâm ve a, thil eng emaw, tlâng lian pui kâng hluah hluah ang hi tuifinriatah an paih thla a.

⁹Tuifinriat hmun thuma ṭhena hmun khat chu thisenah a chang ta a, tuifinriata nungcha awm zawng zawng hmun thuma ṭhena hmun khat chu an thi a, lawngte pawh hmun thuma ṭhena hmun khat chu a chhe ta a.

¹⁰Vântirhkoh pathumna chuan a han hâm ve a; arsi lian tak, meichher anga alh hluah hluah hi vân aṭangin a tla a, lui zawng zawng hmun thuma ṭhena hmun khatah leh tuikhurahte chuan a tla a.

¹¹Chu arsi hming chu ‘Khâ’ a ni. Chu chuan tui hmun thuma ṭhena hmun khat chu a tikhâ a, a khâk tâk êm avângin a in tam tak chuan an thih phah ta a.

¹²Vântirhkoh palina chuan a han hâm ve leh a; ni hmun thuma ṭhena hmun khat, thla hmun thuma ṭhena hmun khat, arsi pawh hmun thuma ṭhena hmun khat chu a chhia a, hmun thuma ṭhena hmun khat chu a thim ta a; ni pawhin a ênna hmun thuma ṭhena hmun khat a hloh va, zân pawhin chutiang bawkin.

¹³Ka han en a, vânlaizâwlah mupui a lo thlâwk duai duai a, ring takin a hrâm tuar tuar a, “Vântirhkoh pathumten an tawtawrâwt an ham hun chuan leia chêngte tân a va râpthlâk dâwn êm! A va râpthlâk dâwn êm! A va râpthlâk dâwn êm!” a ti a.