Read Mizo Lushai JOHANA HNENA ISUA KRISTA THU PUAN CHHUAH 9 Bible Online

JOHANA HNENA ISUA KRISTA THU PUAN CHHUAH 9 - Mizo Lushai bible

JOHANA HNENA ISUA KRISTA THU PUAN CHHUAH 9

¹Tin, Vântirhkoh pangana chuan a han ham ve a, vân aṭanga leia tla arsi ka hmu a. A hnênah chuan leilâwt chabi an pe a.

²Leilâwt chu a han hawng a, a kua aṭang chuan meikhu ang mai a lo khu chhuak ngut ngut a, meikhu lo chhuak avâng chuan ni leh boruak a thim zo ta a.

³Meikhu aṭang chuan khau rual leiah an lo chhuak a, leia khawmualkaikuang thiltihtheihna ang thiltihtheihna an pe a.

⁴An chala Pathian chhinchhiahna pu lo mihringte sawisak an phal a; leia hnim rêng rêng, thlai te, thing te erawh chu tichhe lo tûrin an hrilh a.

⁵Chhinchhiahna pu lote chu an tihhlum mai an phalsak lo, thla nga chhûng tihnat chauh an phalsak a; khawmualkaikuang angin an seh a na a ni.

⁶Chûng ni-ah chuan miten thihna an zawng ang a, an hmu si lo vang; thih an châk ang a; mahse, thihna chuan a tlân bosan ang.

⁷Khau lan dân chu indona atân sakawr an thuam ang hi a ni; an lu-ah chuan rangkachaka siam chawimawina lukhum ang hi a awm a, mihring hmêl ang an pu a;

⁸hmeichhe sam anga sei sam an nei a, an hâ chu sakeibaknei hâ ang a ni;

⁹phuhlip, thîr-phaw ang an nei a, an thla zâp thâwm chu sakawr-tawlailîr tam tak indonaa tlân ri dur dur ang hi a ni.

¹⁰Mei an nei bawk a, khawmualkaikuang angin mi an seh thei a, an seh chu thla nga chhûng a na a ni.

¹¹An lal chu leilâwt huai a ni a, Hebrai ṭawnga a hming chu ‘Abadona’ a ni, Grik ṭawng chuan ‘Apoluona,’ a ni, chu chu ‘Tiboraltua,’ tihna a ni.

¹²Thil râpthlâk pakhat chu a liam ta a, hêng zawhah hian thil râpthlâk dang pahnih a lo la awm dâwn.

¹³Vântirhkoh parukna chuan a han hâm ve leh a; Pathian hmaa rangkachak maichâm ki pali aṭang chuan aw ka hria a;

¹⁴tawtawrâwt keng vântirhkoh parukna hnênah chuan, “Eufretis luipuia vântirhkoh pali phuarte khu chhuah rawh,” a ti a.

¹⁵Tichuan, he kum, he thla, he ni leh dârkâra mihring hmun thuma ṭhena hmun khat that tûra buatsaih vântirhkoh palite chu an chhuah ta a.

¹⁶An sipai sakawr chungchuang mite chu vaibêlchhetak hnih an ni tih mi sawi ka hria.

¹⁷Tin, inlârnaah chuan sakawr leh a chungchuangte chu hetiang hian ka hmu: mei anga sen, huakintho lung anga dumpâwl, kât anga êng âwmphaw an nei a; chûng sakawr lu chu sakeibaknei lu ang a ni a, an kâ aṭang chuan mei te, meikhu te, kât te a chhuak sung sung a.

¹⁸An kâ aṭanga hremna lo chhuak mei te, meikhu te, kât te avâng chuan mihring hmun thuma ṭhena hmun khat chu an thi a.

¹⁹Chûng sakawr thiltihtheihna chu an kâah leh an meiah a awm; an mei chu rûl ang a ni a, lu an nei a, chu chuan mi an tina ṭhîn a ni.

²⁰Hêng hremna tihhlum bâk mihringte hian anmahni thilsiam biak an sim chuang lo; rangkachak te, tangkarua te, dâr te, lung te leh thinga an milim siam - eng mah hmu thei lo, eng mah hre thei lo, kal pawh kal thei hlei lote biak leh ramhuai biak an bâng chuang lo.

²¹Tual thah an chîn te, an dawi hman te, an hurna te, an rûkrûk te an sim hek lo.