Read Mizo Lushai RUTHI 1 Bible Online

RUTHI 1 - Mizo Lushai bible

RUTHI 1

¹Rorêltuten ro an rêl lai khân, Israel ramah ṭâm a tla a. Judai ram Bethlehem khuaa mi pakhat chu a nupui leh a fapa pahnih nên Moab ramah ṭâm tlân tûrin an kal a.

²Chu mi hming chu Elimeleka a ni a, a nupui hming chu Naomi a ni; an fate hming chu Mahlona leh Kiliona a ni. Judai ram Bethlehem khuaa Efrata mi an ni. Moab ramah chuan an kal a, chutah chuan an awm ta reng a.

³Naomi pasal Elimeleka chu a thi a; tichuan, Naomi chu a fapa pahnihte nên chauh an awm ta a.

⁴A fate chuan Moab mi nupuiah an nei a, pakhat hming chu Orpi a ni a, a dang hming chu Ruthi a ni. Chuta kum sâwm lai an awm hnu chuan

⁵Mahlona leh Kiliona chu an thi ve leh ta a, chu nu chu a pasal leh a fapate chuan an thihsan ve leh ta a.

⁶Tin, LALPA chuan a mite a ṭanpui a, ei tûr a pe tih Moab ram aṭang chuan an lo hria a, a mote nên chuan Moab ram ata haw tûrin an insiam ta a.

⁷A mo pahnih nên chuan an awmna hmun chhuahsanin Judai ram an pan ta a.

⁸Nakinah chuan Naomi chuan a mo pahnihte hnênah chuan, “In nute in lamah haw ve ve zâwk rawh u, ka chungah leh in pasal thi tate chunga khawngaihna in lantîr ang khân, LALPA chuan khawngaih che u rawh se.

⁹LALPAN in pahnihin thlamuang taka pasal te hmua in awm theih nân khawngaih che u rawh se,” a ti a. Anni chu a fâwp a, râwl chhuah meuhvin an ṭap ta a.

¹⁰A mote chuan, “Kan haw lo vang, i mite hnêna i kal tûr hi kan zui ve zâwk ang che,” an ti a.

¹¹Naomi chuan, “Ka fanute u, haw zâwk rawh u. Engah nge ka hnênah chuan in kal ve kher ang? In pasal tûr fapa ka nei leh thei dâwn em ni?

¹²Ka fanute u, in in lamah haw leh rawh u. Pasal han nei tûrin ka upa lutuk tawh si a, ‘ka bei a la sei reng e,’ tiin zâninah pawh hian pasal neiin fapa te pawh han nei tehrêng ila,

¹³an puitlin thlengin in nghâk dâwn em ni ang? Pasal lovin in awm reng dâwn em ni? Ni lul lo ve, ka fanute u, nangmahni avâng hian ka rilru a na êm êm a ni, LALPA kut ka tuar ta si a,” a ti a.

¹⁴Chu veleh râwl chhuah meuhvin an ṭap leh ta a, Orpi chuan a pi chu a fâwp a, a kîrsan ta a. Ruthi erawh chuan a vuan tlat a.

¹⁵Naomi chuan, “En teh, i mopui pawh a chite leh a pathian hnênah a hâwn leh tâk saw, i mopui saw zui haw ve rawh,” a ti a.

¹⁶Ruthi erawh chuan, “Nangmah ṭhen tûr leh kîrsan tûr che chuan min thlêm lo hrâm rawh; i kalna apiangah ka kal ang a, i riahna apiangah ka riak ang; i chite chu ka chite an ni ang a, i Pathian chu ka Pathian a ni ang.

¹⁷I thihnaah ka thi ang a, chutah chuan min phûm ve mai rawh se. Nang leh kei hi thihna chauh lo chuan thil dangin min ṭhen dâwn ai chuan LALPAN eng ang pawhin; a duh duhin min ti rawh se,” a ti a.

¹⁸A hnêna kal ve a tum tlat tih a hriatin Naomi chuan a ngawihsan ta a.

¹⁹Tichuan, Bethlehem thlengin an kal dûn ta a. Bethlehem an han thlen chuan a khuain an phu ta mur mur a, nuho chuan, “Hei Naomi kha a ni maw?” an ti a.

²⁰Naomi chuan an hnênah, “Naomi min ti tawh suh u, Marai min ti zâwk rawh u. Engkimtitheia chuan na takin min thunun ta si a.

²¹Kokim takin kan kal chhuak a, LALPA chuan kutbêngin min hruai hâwng leh ta a nih hi. Engati nge, Naomi min la tih cheu le, LALPA chuan min thunun a, Engkimtitheia chuan ka chungah chhiatna a thlentîr ta si a,” a ti a.

²²Naomi chu a monu Moab mi nên Moab ram aṭangin an lo kîr a, barli seng ṭan tirh laiin Bethlehem khua chu an lo thleng a ni.