Read Mizo Lushai RUTHI 2 Bible Online

RUTHI 2 - Mizo Lushai bible

RUTHI 2

¹Naomi chuan a pasal Elimeleka laichîn, a hming Boaza, mi neinung tak chhûng hnai a nei a.

²Moab mi Ruthi chuan Naomi hnênah, “Ka va feh ang a, buhṭo ka va zawng ang e, min lo khawngaih thei an lo awm mahna,” a ti a. Naomi chuan, “Kal ta che, ka fanu,” a ti a.

³Tichuan, a kal ta a, buhsengtute buh lâk hmaih chu a va zawng a. Elimeleka laichîn Boaza lovah a va kal fuh hlauh va.

⁴Boaza pawh Bethlehem aṭang chuan a lo thleng ve a, buhsengtute hnênah chuan, “LALPA in hnênah awm rawh se,” a ti a. Anni chuan, “LALPA chuan malsâwm che rawh se,” tiin an lo chhâng a.

⁵Boaza chuan a chhiahhlawh, buhseng hotu hnênah chuan, “Hei, khawi lam hmeichhia nge ni le?” a ti a.

⁶A chhiahhlawh, buhseng hotu chuan, “He mi hi Moab hmeichhia, Naomi ruala Moab ram aṭanga lo kal kha a ni.

⁷‘Buhsengtute buhphal khâwm hmaih ka zawng ang e,’ tiin min dîl a; rei lo tê bûka a han châwl zawk tih loh chu zîng aṭangin tûn thlengin rim takin a thawk reng a nih hi,” a ti a.

⁸Boaza chuan Ruthi hnênah chuan, “Ka fanu, ka hrilh a che. Lo dangah buhṭo zawng suh la, heta ta hi kal sawn suh ang che. Chhiahhlawh nulate hnênah hian awm ve reng la;

⁹khawi lamah nge buh an seng en thlithlai la, nulate hi zui zêl ang che. Tlangvâlte pawh eng mah tih lo tûr chein thu ka pe a; i tui a hâl chângin tuibêla tlangvâlte tui chawi sa hi i in ṭhîn dâwn nia,” a ti a.

¹⁰Tichuan, ani chu hmai lei siin a kûn a, “Kei hnam dang mi lehnghâl min hre duh a, heti taka min khawngaih hi engtizia nge ni le?” a ti a.

¹¹Boaza chuan heti hian a chhâng a, “I pasal thih a chin tûn thlengin i pi chunga i thil tih zawng zawng miin min hrilh a; i nu te, i pa te, i pianna ram te kalsana, i la hriat loh mite zînga chêng tûra i lo kal dân te pawh min hrilh a ni.

¹²LALPA chuan i thiltih man rûl che sela; LALPA, Israel-te Pathian, inhumhim nâna a thlahnuai i rawn chuha chuan i ṭhat man pe ṭeuh che rawh se,” tiin.

¹³Ani chuan, “Ka pu, nangin min khawngaih avângin ka thla a muang ta. I chhiahhlawh nulate zînga mi ni lo mah ila, i chhiahhlawhnu hi ṭha takin i be ta si a,” a ti a.

¹⁴Chawfâk a lo hun chuan Boaza chuan a hnênah, “Hetah lo kal la, chhang te hi ei ve la, chhang hi uain thûrah te han chiah ve rawh khai,” a ti a. Tichuan, buhsengtute kiangah chuan a ṭhu ve a, chhangpêr a lo pe a, puar taka a ei hnuin a la ei bâng ta cheu va.

¹⁵Buhṭo chu a han zawng leh a, Boaza chuan tlangvâlte hnênah chuan, “Buh ahna zînga mi pawh la sela, hau suh ang che u.

¹⁶A têl aṭangin buhvuite phawichhuahsak ula, a chhar tûrin hnutchhiah ang che u, hau rêng rêng suh u,” a ti a.

¹⁷Lovah chuan tlai thlengin buhṭo chu a zawng a, a zawn sa chu a vua a, efa khat lai a ni.

¹⁸A phur a, khuaah a hâwnpui ta a, a pi chuan a buhṭo lâk chu a lo hmu a, Ruthi chuan an chhang ei bâng chu a phawrh a, ani chu a pe a.

¹⁹A pi chuan a hnênah, “Vawiinah khawi lama buhṭo nge i zawn a, tu lovah nge i va thawh le? A lo khawngaihtu che chu malsâwmin awm rawh se,” a ti a. Ruthi chuan a pi hnênah chuan a va thawhna chu hetiang hian a hrilh a: “Vawiina ka va thawhna pa chu a hming Boaza a ni,” a ti a.

²⁰Naomi chuan a monu hnênah chuan, “LALPA, mi nung leh mitthi chunga a khawngaih bâng chuang ngai lova chuan ani chu malsâwm rawh se, chu mi chu kan chipûi, kan laichîn hnai tak a ni asin,” a ti a.

²¹Moab mi Ruthi chuan, “ ‘Buh hi an seng zawh thlengin hnathawktute zîngah hian thawk ang che’ min ti nghe nghe asin,” a ti a.

²²Naomi chuan a monu Ruthi hnênah chuan, “A ṭhat chu, a hnathawk nulate zîngah hlîr thawk la, lo dangah zawng an khawih buai palh ang che,” a ti a.

²³Tichuan, Ruthi chu Boaza nula chhawrte zîngah chuan barli leh huit seng zawh thlengin buhṭo zawng chuan a awm a, a pi hnênah chuan a awm ta reng a.