Read Mizo Lushai RUTHI 3 Bible Online

RUTHI 3 - Mizo Lushai bible

RUTHI 3

¹Chumi hnu chuan a pi Naomi chuan a hnênah, “Ka fanu, ngaihngam taka i khawsak theihna tûr ka ngaihtuahsak ang che.

²A chhiahhlawh nulate nêna hna i va thawhna pa kha kan laichîn bul Boaza a ni. Ngai teh, zânin hi hruihah barli a zah fai zân a ni a.

³Inbual la, rimtui te inchulh la, i thawmhnaw ṭha ber inbelin hruihah chuan zu kal rawh. Amaherawhchu, a eia a in zawh hma chuan a hnênah inlan suh ang che.

⁴A mut hunah a mutna chhinchhiah la, a ke chu hlim la, mu ve ang che. Tichuan, i tih tûr chu a lo hrilh mai ang che,” a ti a.

⁵Ruthi chuan, “I sawi ang chuan ka ti ang e,” a ti a.

⁶Tichuan, hruih lamah chuan a chhuk a, a pi hrilh ang chuan a ti ta a.

⁷A eia a in zawh hnu chuan Boaza chu hlim takin buh vûm sirah chuan a mu ta a. Nakinah chuan Ruthi chu dîm têin a va kal a, a ke chu a hlîm a, a mu ve ta a.

⁸Zanlaiah chuan Boaza chu a lo ṭhangharh a, a han hawi a, a ke bula hmeichhe lo mu reng chu a hmu ta a.

⁹“Tu nge i nih?” a ti a. Ani chuan, “I chhiahhlawhnu Ruthi ka ni. Kan laichîn bul i ni bawk a, i puan kha mi han zâwn teh,” a ti a.

¹⁰Ani chuan, “LALPA chuan malsâwm che rawh se; tlangvâl rethei emaw, hausa emaw i zui mai mai loh dânah hian, tûnhma ai mahin tûnah hian i chhûngte laka i rinawmzia i tilang ta a ni.

¹¹Hlauthâwng suh aw, i thil duh chu ka tihsak vek ang che. Kan khaw mipuite hian hmeichhe fel tak i nih an hria asin.

¹²Eng pawh ni se, in laichîn bul chu ka ni ngei mai; amaherawhchu, kei aia bul zâwk a la awm.

¹³Zânin chu hetah mu ve phawt la, naktûkah laichîn bul tih tûr a tih duh loh erawh chuan keiman ka ti ang tih LALPA chhâlin tûnah ka tiam a che, khawvâr hma chu mu ve phawt mai rawh,” a ti a.

¹⁴Khawvâr hma chu a ke bulah chuan a mu a, zîng takah tu ma hriat hmain a tho va; Boaza chuan, “Hruiha i lo kal hi tu man hre suh se,” a ti a.

¹⁵Tin, a hnênah, “I puan bah lai kha han la la, dawh rawh le,” a ti a. Tichuan, a phah a, barli ṭîn khat zet a ruhsak a, puanah chuan a chhûng a, Ruthi chuan khuaah a hâwnpui ta a.

¹⁶A pi hnên a han thlen chuan, “Ka fanu, eng nge i an le?” a lo ti a. Ruthi chuan a chunga Boaza thil lo tih zawng zawng chu a hrilh a.

¹⁷“I pi hnênah chuan saruakin haw suh, tiin he barli ṭîn khat hi min pe a ni,” a ti a.

¹⁸Naomi chuan, “Ka fanu, thil inher dân tûr i hriat hma chu nghâk hle hle mai rawh; thil a chin fel hma chu a ngawi mai mai dâwn si lo,” a ti a.