Read Mizo Lushai RUTHI 4 Bible Online

RUTHI 4 - Mizo Lushai bible

RUTHI 4

¹Boaza chu rorêlna hmun kulh kawngkaah chuan a chho va, a ṭhu a. An laichîn bul, a chungchâng Boazan a sawi kha a lo kal a. Boaza chuan, “Unaupa, hetah lo kal la, ṭhu teh khai,” a ti a. A lo kal a, a ṭhu ta a.

²Boaza chuan chu khuaa upa sâwm a khâwm a, an hnênah, “Hetah hian ṭhu teh u khai,” a ti a, an ṭhu ta a.

³An laichîn bul bera hnênah chuan, “Moab ram aṭanga lo kîr Naomi chuan kan unaupa Elimeleka ram kha hralh a duh a;

⁴nang hi hrilh hmasak che ṭhain ka hria a, i tlan duh chuan hêng upaho hriatah hian tlan ta che; i tlan duh loh erawh chuan min hrilh rawh; nang lo chu tu mah tlantu tûr an awm lo; tin, kei hi i dawt chu ka ni,” a ti a. Ani chuan, “Ka tlan ang e,” a ti a.

⁵Boaza chuan, “Naomi hnên aṭanga ram i lei hun chuan mitthi hming dai lova ram chanpual luahtu tûr an awm zêl theih nân Moab hmeichhia, mitthi nupui chu, i nei tel bawk tûr a ni,” a ti a.

⁶An laichînpa chuan, “Ka tân chuan ka tlan thei lo, chutilo zawng, ka roluah chungchângah harsatna ka siam dah ang e, tlantu tûr ka nihna pawh nangman chang mai la, ka tlan thei lo a ni e,” a ti a.

⁷Hmânlaiin Israel-ho zîngah thil an leiin emaw, an inthlengin emaw a nemngheh nân a hralhtuin a pheikhawk a phelh a, a leitu hnênah a pe ṭhîn. Hei hi Israel-te zîngah tih ṭhin dân a ni.

⁸An laichînpa chuan Boaza hnênah, “I tân nangman lei mai rawh,” tiin a pheikhawk a phelh a, a pe a.

⁹Boaza chuan upaho leh mipui zawng zawng hnênah, “Vawiin hian Elimeleka thil neih zawng zawng te, Kiliona leh Mahlona thil neih zawng zawng nên Naomi hnên aṭangin ka lei ta tih hretu in ni e.

¹⁰Chu bâkah, mitthi hming chu dai lova, a ro luahtu siamsak tûr leh mitthi chu a chipuite zîngah leh a awmna khaw kulh kawngkaa hriat reng a nih theih nân, Moab hmeichhia, Mahlona nupui chu, ka nupui atân ka nei ta a; tûnah, nangniho hi a hretute in ni e,” a ti a.

¹¹Tichuan, kulh kawngkaa upaho leh mipui awm zawng zawng chuan, “Hretute kan ni e, i ina hmeichhia lo lawi chu, Israel chhûngkaw dintu pahnih Rakili leh Leaii ang khân LALPA chuan siam rawh se. Nang pawh, he hnam zîngah hian mi ropui tak ni la, Bethlehem mi hmingthang tak ni ang che.

¹²LALPAN he hmeichhe lakah hian fate pe che sela, i chhûngkua chu Juda-in Tamari laka fa a hrin Pereza chhûngkua ang lo ni rawh se,” an ti a.

¹³Boaza chuan Ruthi chu nupui atân a hruai a, an awm dûn ta a. LALPA chuan nau a paitîr a, fapa a hring ta a.

¹⁴Chuta hmeichhiate chuan Naomi hnênah, “Vawiina laichîn bul chham lova awmtîrtu che LALPA chu fakin awm rawh se; I tupa chu Israel ram pum puiah a hming lo thang sela,

¹⁵ani chu i nun tihlimtu leh i tar châwmtu lo ni rawh se. I monu, nangmah hmangaihtu, fapa pasarih aia tama hlu zâwk chuan ani hi a hrinsak ta si che a,” an ti a.

¹⁶Naomi chuan nau chu a la a, a pawm a, a awm ta a.

¹⁷An vênga hmeichhiate chuan a hming an sa a, “Naomi tân fapa a lo piang ta,” tiin a hmingah Obeda an sa a, chu mi chu Davida pu, Jesaia pa a ni.

¹⁸Hei hi Pereza chhûngkua inthlah chhâwn dân chu a ni.

¹⁹Hezrona chu Rama pa a ni, Rama chu Aminadaba pa a ni a.

²⁰Aminadaba chu Nasona pa a ni a, Nasona chu Salmona pa a ni.

²¹Tin, Salmona chu Boaza pa a ni a, Boaza chu Obeda pa a ni,

²²Obeda chu Jesaia pa a ni a, Jesaia chu Davida pa a ni.