Read Mizo Lushai LEHKHABU PAKHATNA SAMUELA 1 Bible Online

LEHKHABU PAKHATNA SAMUELA 1 - Mizo Lushai bible

LEHKHABU PAKHATNA SAMUELA 1

¹Efraim tlângrama Ramathaim-zofim khuaah mi pakhat a awm a, a hming chu Elkana a ni. Chu mi chu Jehorama fapa a ni a, Jehorama chu Elihua fapa a ni. Elihua chu Tohua fapa a ni.

²Nupui pahnih a nei a, pakhat hming chu Hani a ni a, pakhat hming chu Penini a ni. Penini chuan fate a nei a, Hani erawh chuan fa a nei ve lo.

³Chu mi chu Engkim LALPA chibai bûk tûr leh a hnêna thilhlan hlân tûrin kum tin a awmna khua aṭang chuan Silo khuaah a chho ṭhîn. Chutah chuan Elia fapa pahnih, Hofnia leh Finehasa, LALPA puithiamte chu an awm a.

⁴Elkanan thilhlan a hlan ni chuan a fapa te, a fanu te tân chanvo a siamsak ṭheuh va.

⁵Hani chu hmangaih hle mah se, LALPA chuan fa nei thei lova a siam avângin chan khat chauh a siamsak ṭhîn.

⁶Fa a neih theih loh avânga a lungngaihna tizual tûrin amah ertu Penini chuan a deusawh ṭhîn a.

⁷Chutianga kum tin LALPA ina an kal ṭhin lai chuan a ertunu chuan a tilungngai hle ṭhîn a ni. Chuvâng chuan, a ṭap a ṭap a, chaw pawh a ei lo va.

⁸A pasal Elkana chuan, “Hani, engtizia nge chaw i ei duh loh? Engati nge i rilru a nat le? Fapa sâwm aiin i tân ka hlu zâwk lo em ni?” a ti ṭhîn a.

⁹Vawi khat chu Silo khuaa an eia an in zawhin Hani chu a tho va. Chutih lai chuan puithiam Elia chu LALPA in kawngka ban bul ṭhutthlêngah a ṭhu a.

¹⁰Hani chu lungchhe taka ṭap chungin LALPA hnênah a ṭawngṭai a.

¹¹Hetiang hian thu a tiam ta a, “Aw Engkim LALPA, i bawihnu chan chhiatzia hi min hriatsak a, i bawihnu hi thlahthlam lova fapa min pêk chuan a dam chhûng zawng LALPA ka pe ang a, a lu pawh meh a ni rêng rêng lo vang,” a ti a.

¹²Chutianga LALPA hnêna a ṭawngṭai lai chuan a hmui phun chu Elia chuan a lo en reng a,

¹³Hani chu ṭhahnemngai takin a ṭawngṭai a, ri lovin a hmui chauh a phun a, Elia chuan zu a rui emaw a ti a.

¹⁴Elia chuan a hnênah, “Eng chen nge i ruih dâwn le? I uain in chu dah bo teh khai,” a ti a.

¹⁵Hani chuan, “Ka pu, ka rui lo asin, hmeichhe lungngai tak ka nih hi, uain pawh, zupui pawh ka in rêng rêng lo; LALPA hnênah ka rilru natna ka thlen a nih hi.

¹⁶I bawihnu hi hmeichhe sualah puh suh; lungngai leh mangang takin ka ṭawngṭai a nih hi,” a ti a.

¹⁷Elia chuan, “Thlamuang takin kal la, a hnêna i dîl chu Israel-te Pathian chuan pe che rawh se,” a ti a.

¹⁸Ani chuan, “I chhiahhlawhnu hi min duhsak zêl rawh aw,” a ti a. Tichuan, Hani chu a chhuak a, chawte a ei a, lungngai hmêl a pu ta lo va.

¹⁹A tûkah chuan zîng takah an tho va, LALPA hnênah an ṭawngṭai a, Rama khuaa an in lamah chuan an haw ta a. Elkana chuan a nupui Hani chu a pâwl a. LALPA chuan ani chu a hre reng a.

²⁰Chumi hnu chuan Hanin nau a pai a, fapa a hring a, “LALPA hnêna ka dîl chhuah a ni” tiin a hmingah Samuela a sa a.

²¹Elkana leh a chhûngte chu LALPA hnêna an kum tin thilhlan hlân tûr leh an thutiam hlen tûrin an chho va,

²²Hani erawh chu a kal ve lo. A pasal hnênah chuan, “Naupang hian hnute hnêk a bân hunah ani chu ka hruai ang a, LALPA hnênah ka hlân ang a, chutah chuan a awm reng tawh ang,” a ti a.

²³A pasal Elkana chuan a hnênah, “Ṭha i tih ang chuan ti rawh, hnute hnêk i bântîr thlengin awm la, LALPA chuan i tih ang chuan thlentîr rawh se,” a ti a. Hani chuan a fapain hnute hnêk a bân hma chuan inah a awmpui ta a.

²⁴Hnute hnêk a bântîr hnu chuan a fapa chu a hruai a, chhangphut kg. sâwm leh uain bûr khat a keng a, bâwngpa kum thuma upa kaiin Silo khuaa LALPA inah chuan a kal ta a, a fa chu a la naupang hle a.

²⁵Bâwngpa chu an talh a, naupang chu Elia hnênah chuan an hruai a.

²⁶Tin, ani chuan, “Aw ka pu, nangmah ngeiin i hria a; ih e, ka pu, kei hi he laia i hmaa LALPA hnêna ṭawngṭai hmeichhia kha ka ni asin.

²⁷He naupang dîl hian ka ṭawngṭai a; tichuan, LALPAN ka dîl chu min pe ta a.

²⁸Chuvângin, ani chu LALPA hnênah ka hlân a ni. A dam chhûng zawng LALPA tâna hlan a ni,” a ti a. Chutah chuan LALPA hmaah an kûn ta a.