Read Mizo Lushai LEHKHABU PAKHATNA SAMUELA 10 Bible Online

LEHKHABU PAKHATNA SAMUELA 10 - Mizo Lushai bible

LEHKHABU PAKHATNA SAMUELA 10

¹Samuela chuan hriak bâwm chu a la a, Saula lu-ah chuan a leih a, a fâwp a, “A mi Israel-te chunga rorêltu atân LALPA chuan hriak a thih ta che. LALPA mite chungah ro i rêl ang a, anni chu an vêla an hmêlmate kut ata i chhan chhuak ang. Tin, hei hi, a mi Israel-te chunga rorêltu atân LALPA chuan hriak a thih che a ni tih chhinchhiahna a ni ang:

²Vawiina min kalsan hnu hian Benjamin ramri Zelza hmun, Rakili thlân kiangah, mi pahnih i tâwk ang a, anni chuan i hnênah, ‘I sabengtung zawnte kha an hmu tawh e; i pa pawhin sabengtungte chu a ngaihtuah tawh lo, nangmah mawlh hi a ngaihtuah che a ni, ‘ka fapa chu engtin tak awm ang maw, a ti a ti mai,’ an ti ang.

³“Chuta ṭang chuan kal zêl la, Tabor hmuna sasaw thing dinna i va thleng ang a, chutah chuan Bethel hmuna Pathian be tûr mi pathumin an tâwk ang che a, pakhat chuan kêlno pathum a pawm ang a, pakhatin chhang tlang thum a keng ang, pakhat leh chuan uain bûr a keng bawk ang.

⁴Chibai an bûk ang che a, chhang tlang hnih an pe ang che a, la ang che.

⁵Chumi hnuah Gibea hmuna Pathian tlâng, Filistia sipaiho hmun i va thleng ang a; tin, khua i luh dâwn chuan zâwlnei rual an hmahruaituten perhkhuang te, benchhek te, phênglâwng te, ṭingṭang te tum chungin hmunsâng aṭanga lo chhuk i tâwk ang, thu an sawi dual dual ang.

⁶LALPA thlarau chu nasa takin i chungah a lo thleng ang a, an ṭawng ang chuan i ṭawng ve ang a; tichuan, i nun a lo danglam ang.

⁷Tin, hêng chhinchhiahna hi i chunga a lo thlen kim hunah Pathianin a awmpui dâwn che a, a hruai ang zêl chein awm ang che.

⁸Gilgal-ah lo zu kal hmasa la, kei pawh hâlral thilhlante leh remna thilhlante hlân tûrin i hnênah ka lo chhuk ve ang. I hnêna ka lo kala, tih tûr ka rawn hrilh hma che chuan ni sarih thleng min lo nghâk ang che,” a ti a.

⁹Saulan Samuela a kalsan veleh Pathianin Saula chu thinlung thar a pe a, chung chhinchhiahna zawng zawng chu chumi ni chuan a chungah a lo thleng ta a.

¹⁰Gibea tlâng an han thlen chuan zâwlneiho chuan an lo tâwk a; tichuan, Pathian thlarauvin a man thut a, anmahni angin thu a sawi a, a lâm ve ta a.

¹¹Tûn hmaa amah lo hre tawhten zâwlneiho angin thu a sawi ve ta tih an hmuh chuan, “Kisa fapa chungah hian eng thil nge lo thleng ta le? Saula chu zâwlnei zîngah a tel ve ta a ni maw?” tiin an inzâwt a.

¹²Chu khuaa mi pakhat chuan a chhâng a, “Hêng zâwlneiho pawh hi, an pate tute nge an nih bîk?” a ti a. “Saula zâwlnei a ni ve ta elo?” tih chu ṭawngkam takah an neih ta a ni.

¹³Zâwlnei anga thu a sawi zawh chuan Saula chu hmunsâng lamah a chho ta a.

¹⁴Saula pami chuan Saula leh a chhiahhlawh chu, “Khawi lamah nge in kal?” tiin a zâwt a. Ani chuan, “Sabengtung kan zawng a; kan hmuh zawh tâk loh avângin Samuela hnênah kan kal ta a ni,” a ti a.

¹⁵Saula pami chuan, “Samuela chuan in hnênah thu eng nge a sawi min hrilh teh,” a ti a.

¹⁶Saula chuan, “Sabengtung chu an hmu leh tawh tih min lo hrilh,” a ti a. Samuelan lal tûra a lo tih thu erawh chu a pami chu a hrilh lo.

¹⁷Samuela chuan mipui chu Mizpa khuaah LALPA be tûrin a ko khâwm a.

¹⁸Israel fate hnênah chuan, “Israel-te Pathian, LALPA chuan heti hian a ti: ‘Israel-te chu Aigupta ram aṭangin ka hruai chhuak a; Aigupta-ho kut ata leh nangmahni tiduhdahtu lal zawng zawng lak ata ka chhan chhuak che u a.

¹⁹In manganna leh chhiatna tinrêng laka chhanchhuaktu che u in Pathian ka ni a; nimahsela, tûnah min duh lo va, rorêlsaktu tûr lal min dîl a. Chuvângin, tûnah, a hnam leh a chi chiin LALPA hmaah rawn inlan ṭheuh rawh u,’ a ti e,” a ti a.

²⁰Samuela chuan Israel hnam zawng zawng chu a rawn inlantîr a; Benjamina hnam chu ṭhumvâwra thlan an lo ni ta a.

²¹Benjamin hnam chu a chhûng chhûngin an rawn inlan leh a, Matria chhûngte chu thlan an lo ni leh ta zêl a. A tâwpah Kisa fapa Saula chu thlan a ni ta a. Ani chu an han zawng a, an hmu ta lo va.

²²LALPA an râwn nawn leh a, “Ani hi a lo kal em ni?” an ti a. LALPA chuan, “Kal e, bungraw zîngah a biru a ni,” a ti a.

²³Tichuan, an tlân a, an va hruai chhuak a, mi zînga a han din chuan a sâng ber a, a koki pêl pawh an awm hauh lo va.

²⁴Samuelan mi zawng zawng hnênah chuan, “LALPA mi ruat hi in hmu em? Mi zawng zawng zîngah amah ang rêng an awm loh hi,” a ti a. Mipui chu an au va, “Lal chu dam reng rawh se,” an ti a.

²⁵Samuela chuan mipuite chu lal dinhmun leh a tih tûrte a hrilh a; lehkhabu-ah a ziak a, LALPA inah a dah ta a. Samuela chuan mite chu an in lamah a hâwntîr ta ṭheuh va.

²⁶Saula pawh Gibea khuaa a inah a haw ve ta a, mi huaisen, an thinlung Pathianin a khawihte chuan an zui a.

²⁷Mi ṭhenkhat, kawhmawhbâwlho erawh chuan, “Engtin nge he pa hian min chhanhim theih tehlul ang?” an ti a. Ani chu an hmusit hle a, thilpêk eng mah an pe duh lo va. Saula erawh chu a ngawi reng a.