Read Mizo Lushai LEHKHABU PAKHATNA SAMUELA 11 Bible Online

LEHKHABU PAKHATNA SAMUELA 11 - Mizo Lushai bible

LEHKHABU PAKHATNA SAMUELA 11

¹Amon mi Nahasa chu Gilead rama Jabes khua bei tûrin a lo thawk a, a rawn hual a. Jabes mi zawng zawng chuan, “Kan hnênah thu thlung la, i rawng kan bâwl ang e,” an ti a.

²Amon mi Nahasa chuan, “In hnêna thu ka thlun dân tûr chu hetiang hi a ni ang: In mitmu ding lam ka kher chhuak vek ang a, chu chu Israel mi zawng zawng ka tihmualpho dân tûr a ni,” a ti a.

³Jabes khaw upaho chuan a hnênah, “Israel ram pumah zualko kan tlântîr theih nân ni sarih chhûng hun min pe rawh; chutah min chhantu tûr tu mah an lo lan loh chuan i hnênah kan inpe ang,” an ti a.

⁴Tin, zualkote chuan Saula awmna Gibea khua an va thleng a, mipui hnênah chuan chu thu chu an hrilh a. Mi zawng zawng chu mangangin an ṭap ta chuah chuah a.

⁵Chutih lai chuan Saula chu a bâwng khalhin lo lam aṭangin a lo hâwng a. Saula chuan, “Engati nge mipui chu an ṭah chuah chuah le?” a ti a. Jabes khaw mite thu rawn thlen chu an hrilh a.

⁶Chûng thu chu Saulan a hriat veleh Pathian thlarau chu a chungah a lo thleng chiam a, a thin a rim ta hle a.

⁷Bâwngpa pahnih a talh a, a sa chu a chansawm a, ram pumah a semtîr a, “Tu pawh Saula leh Samuela zui duh lo chu an bâwng hetianga tihsak a ni ang,” tiin a hrilh vek a. Mipui chuan LALPA chu an hlau ta hle a, thukhat vuain an lo thawk chhuak a.

⁸Tin, Bezek hmunah a lo chhiar a, Israel mi chu nuaithum an ni a, Juda mi chu sîngthum an ni.

⁹Mi tirhte hnênah chuan, “Jabes mite chu ‘Naktûk ni tlângsân hmain kan chhan chhuak ang che u,’ tiin va hrilh rawh u,” an ti a. Mi tirhte chu an hâwng ta a, Jabes mite chu an va hrilh a; anni chu an lâwm ta hle a.

¹⁰Jabes mite chuan, “Naktûkah in hnênah kan inpe ang a; tichuan, in duh duhin min ti dâwn nia,” an ti a.

¹¹A tûkah chuan Saula chuan mipui chu pâwl thumah a ṭhen a, vârṭianah Amon mite riahhmun an luhchilh a, ni tlângsân fe thlengin an that ta chiam a. An thah bangte chu an tlân darh vek a, pahniha awm dûn rêng rêng an awm lo.

¹²Mite chuan Samuela hnênah, “ ‘Saulan kan chungah ro a rêl tehlul ang maw’ titute kha tute nge ni? Chûng mite chu rawn hruai la, kan lo that ang e,” an ti a.

¹³Saula erawh chuan, “Vawiinah tu mah tihhlum tûr a ni lo; vawiinah hian Israel-te chu LALPAN a chhan chhuak ta si a,” a ti a.

¹⁴Samuela chuan mipui hnênah, “Hawh u, Gilgal-ah kal ila, chutah chuan lal neih hi i tinghet ang u,” a ti a.

¹⁵Mipui chu Gilgal-ah chuan an kal ta a, Saula chu LALPA hmaah lal atân an tinghet ta a; tin, LALPA hnênah inthawina an hlân ho va, Saula leh Israel mi zawng zawng chu an lâwm hle a.