Read Mizo Lushai LEHKHABU PAKHATNA SAMUELA 13 Bible Online

LEHKHABU PAKHATNA SAMUELA 13 - Mizo Lushai bible

LEHKHABU PAKHATNA SAMUELA 13

¹Saula chuan kum hnih chhûng Israel ramah ro a rêl a.

²Saula chuan Israel mi sângthum a thlang chhuak a. Mikmas-ah leh Bethel tlângramah a hovin an awm a, sângkhat chu Benjamin bial Gibea khuaah Jonathana hovin an awm a, mi dang chu a hâwntîr vek a.

³Jonathana chuan Geba hmuna Filistia sipai hmun chu a la a; chu chu Filistia mite chuan an lo hria a, Saula chuan “Hebrai mite khân lo hre rawh se,” tiin ram pumah tawtawrâwt a hamtîr a.

⁴Israel mi zawng zawng chuan, “Saulan Filistia sipai awmna hmun a bei a, Israel-te chungah chuan Filistia mite chu an thinur hle,” tih thu an lo hria a. Tichuan, Saula pui tûrin Gilgal-ah mipui an lo kal khâwm ta chiam a.

⁵Filistia mite pawh Israel-te do tûrin an lo pung khâwm bawk a; tawlailîr sîngthum, sakawr chungchuang mi sângruk leh sipai, tuifinriat kama ṭiau zât lai an ni, Beth-aven chhak lam Mikmas hmunah an lo chho va, ṭanhmun an khuar a.

⁶Israel mite chuan an dinhmun hlauhawmzia leh dan chêp an nih an inhriatin pûkah te, lei kuaah te, lungpui phênah te, tuichhunchhuahah te an biru a.

⁷Hebrai mi ṭhenkhat chu Jordan râla Gad ram leh Gilead ramah te an tlânchhia a. Saula chu Gilgal-ah a awm reng a, a hnêna sipai awm zawng zawng chu hlauvin an khûr an khûr a.

⁸Samuelan a lo tiam angin ni sarih a nghâk a, mahse, Samuela chu Gilgal-ah a lo kal lo va; tichuan, mite chuan an tlânchhiatsan ta a.

⁹Saula chuan, “Hâlral thilhlan tûr leh remna thilhlan tûrte chu ka hnênah han la rawh u” a ti a, hâlral thilhlan chu a hlân ta a.

¹⁰Hâlral thilhlante a hlân zo chiah tihah Samuela chu a lo thleng a, lo dawngsawng tûrin Saula chu a chhuak a.

¹¹Samuela chuan, “Eng nge i tih le?” a ti a. Saula chuan, “Miten min tlânsan tawh tih ka hria a, nang lah chu i ni ruatah i lo thleng bawk si lo. Filistia mite chu Mikmas-ah an pung khâwm luih tawh mai si a.

¹²Gilgal-ah min rawn bei ṭêp a ni a; min pui tûrin LALPA ka la ngên bawk si lo; chuvângin, hâlral thilhlan chu hlân lo thei ka ni lo va ni,” a ti a.

¹³Samuela chuan, “I thil tih dân hi a âtthlâk hle a ni. LALPA, i Pathianin dân a pêk che hi i zâwm lo va, zâwm la chu LALPAN Israel-te chungah kumkhuain a laltîr tûr che a ni a le.

¹⁴Nimahsela, i lalna chu a tâwp dâwn ta, LALPA thupêk i zawm loh avângin LALPA chuan a mi duhzâwng tak a zawng a, a mite chunga rorêltu tûr a ruat tawh a ni,” a ti a.

¹⁵Samuela chuan Gilgal chu a chhuahsan a, Benjamin biala Gibea khuaah chuan a chho va, Saula chuan a hnêna la awm ve chu a chhiar a, zaruk lai an la ni.

¹⁶Saula leh a fapa leh an hnêna mi la awmte chuan Benjamin biala Gibea khuaah ṭan an la a, Filistia-ho erawh chuan Mikmas-ah ṭanhmun an khuar a.

¹⁷Filistia zînga râl hrât zualte chu pâwl thumah an inṭhen a, an bûk aṭang chuan pâwl khatin Sual rama Ofra lam an pan a,

¹⁸pâwl khatin Beth-horon lam an pan a; pâwl dang leh chuan thlalêr dep Zeboim ruam lam hawi ramri kawng an zawh a.

¹⁹Filistia mite chuan Israel ram pum puiah thîrdêng awm an phal lo va, “Hebrai mite hian, khandaih te, fei te an siam dah ang e,” an ti a ni.

²⁰Israel mite chu bâwngtuthlawh te, leilehna thîr te, hreipui te, leilehna hmanrua te tah hriamtîr tûrin Filistia mite hnênah an chhuk ṭhîn.

²¹Bâwngtuthlawh leh lungrâl tihhriam man chu duli pahnih a ni a. Thîr hmâwr zum te, hreipui te, chhuntiang te tihhriam man chu duli a ni.

²²An indo ni chuan Saula leh a fapa Jonathana chauh lo chuan an hote tu mahin khandaih emaw, fei emaw an nei lo.

²³Filistia mite chuan an sipai pâwl khat chu Mikmas kalkhân vêng tûrin an tîr a.