Read Mizo Lushai LEHKHABU PAKHATNA SAMUELA 14 Bible Online

LEHKHABU PAKHATNA SAMUELA 14 - Mizo Lushai bible

LEHKHABU PAKHATNA SAMUELA 14

¹Ni khat chu Saula fapa Jonathana chuan a râlthuam kengtu hnênah, “Hawh, râl lehlama Filistia sipai hmunah sâwn i va kal teh ang,” a ti a. A pa chu a hrilh lo va.

²Saula chu Gibea ram hmâwr Migron hmuna theibuhfai buk hnuaiah a awm a. A hnêna awm sipaite chu zaruk lai an ni.

³Puithiam Ahija pawh puithiam kawr hain a awm bawk a. Ani hi Silo khuaa LALPA puithiam, Elia fa Finehasa fapa Ikaboda unaupa Ahituba fa a ni. Jonathana chu râl lehlamah a kal tawh tih tu mahin an hre lo.

⁴Filistia sipai bûk Jonathanan a panna khân sîr tawnah chuan lungpui tohlâwt a awm a: a pakhat hming chu Boze a ni a, pakhat dang chu Senea a ni.

⁵Pakhat chu hmâr lam Mikmas lam hawi zâwngin a awm a, pakhat chu chhim lam Geba hawi zâwngin a awm a.

⁶Jonathanan a râlthuam kengtu tlangvâl hnênah chuan, “Hawh, serh tan lohho awmnaah sâwn i kal teh ang, LALPAN min ṭanpui ngei ang. An tam emaw, an tlêm emaw LALPA tân min hnehtîr harsatna eng mah a awm lo,” a ti a.

⁷A râlthuam kengtu chuan, “I duh ang chuan ti la, ka zui zêl ang che. Ka phatsan lo vang che,” a ti a.

⁸Jonathana chuan, “Aw le, hnaih ila, hmuh tûrin i va inlan ang.

⁹‘In hnêna kan lo kal hma chu lo awm rawh u,’ min tih chuan kan hmunah kan awm reng ang a, an hnênah kan chho lo vang.

¹⁰‘Lo chho teh rêng u,’ min tih chuan kan chho vang a, chu chu LALPAN anni chu kan kutah min pe tawh a ni tih chhinchhiahna a ni ang,” a ti a.

¹¹Tichuan, an pahnihin Filistia sipaiho hmuh tûrin an va inlan a. Filistia mite chuan, “En teh u, Hebrai mite an bihrûkna hmun ata an lo chhuak e,” an ti a.

¹²Vênbûka sipaite chuan Jonathana leh a râlthuam kengtu chu an au va, “Lo chho teh rêng u, in hre mai ang,” an ti a. Jonathana chuan a râlthuam kengtu hnênah chuan, ‘Mi rawn zui chho rawh, LALPA chuan anni chu Israel-te kutah a pe ta e,” a ti a.

¹³Jonathana chu a vâk chho ta a, a râlthuam kengtu chuan a zui zêl a. Jonathana hmaah chuan anni chu an tlu ta zawih zawih a, a hnungah a râlthuam kengtu chuan a rawn that zêl a.

¹⁴Inbeih hmasak ber ni chuan Jonathana leh a râlthuam kengtu chuan fîng chanve vêl chhûngah chauh mi sawmhnih lai an that a.

¹⁵Sipai zawng zawng, riahbûka awm te, phûla awm te, vênbûka awm te, hmatâwng pâwlte chu an chiai a, an buai ta mur mur a. Lîr te a nghîng a, Pathianin manganna nasa tak a thlentîr ta a.

¹⁶Benjamin bial Gibea khuaa Saula râlvengtu sipaite chuan an han thlîr a; ngai teh, Filistia-ho chu mangang takin an tlân darh chum chum a.

¹⁷Saula chuan a sipaite hnênah, “Inchhiar ula, tute nge kim lo han en teh u,” a ti a. An han inchhiar chuan Jonathana leh a râlthuam kengtu chu an lo awm ve lo va.

¹⁸Saula chuan Ahija hnênah, “Puithiam kawr kha han phawrh teh,” a ti a. Ani chuan puithiam kawr chu Israel-te hmaah a ha a ni.

¹⁹Saulan puithiam a biak lai chuan Filistia riahhmuna an buaina chu a zual tawlh tawlh a, Saulan puithiam hnênah chuan, “Dah leh mai rawh,” a ti a.

²⁰Tichuan, Saula leh a hnêna mipui awmte chu an pung khâwm a, indona hmunah an kal ta a. Ngai teh, Filistia mite chu anmahni leh anmahni khandaihin an lo inbei chiam a, an buai nuai nuai a.

²¹Tûn hma lama Filistia ṭan ṭhîn Hebrai mite leh riahhmuna lo awmte chu Israel lamah an lo pakai a, Saula leh Jonathana lamah an ṭang ta a.

²²Chutiang bawkin Efraim tlângrama Israel mi, biru zawng zawng pawh chu Filistia mite an tlânchhia tih an hriatin indonaah chuan an lo tel ve a, an rawn ûm ve nghâl a.

²³Chumi ni chuan Israel-ho chu LALPAN a hnehtîr a, Beth-aven thleng rawkin an bei zui a.

²⁴Saulan mipuite chu a vau va, “Ka hmêlmate chunga phuba ka lâk ni hian khaw thim hmaa chaw ei chuan ânchhia dawng rawh se,” a tih avângin chumi ni chuan tu man eng mah an ei lo, Israel-te chu an chau hle a.

²⁵Mipui chuan ngaw an va thleng a, khawizu a lo tam hle a.

²⁶Mipuiin ngaw chhûng an luh chuan khawizu chu a lo far zawih zawih a, ânchhe dawn an hlauh avângin tu man an pir lo.

²⁷Jonathana erawh chuan a pain mipui a vauna kha a hre ve lo va, tiang hmawrin khawithlâr chu a chhun a, a han tem a, a lo harh ta sawt a.

²⁸An zînga mi pakhat chuan a hnênah, “I pain hetiangin min vau asin, ‘Tu pawh, vawiina chaw ei apiangin ânchhia dawng rawh se,” a tih avângin mite chu an chau zo ta a nih hi,” a ti a.

²⁹Jonathana chuan, “Ka pa hian mite tân harsatna a siam mai mai a nih hi; en ta che u, kei pawhin khawizu tlêm tê ka han tem a, ka harh tâk hi,” a ti a.

³⁰“Mite hian an hmêlmate laka an thil lâk hi an duh duhin vawiin hian ei sela chu an chak phah ang a, Filistia mite hi kan that tam lehzual tûr’” a ti a.

³¹Chumi ni chuan Filistia mite chu an hneh a, Mikmas aṭangin Aijalon thlengin an ûm a, Israel-te pawh chu an chau ve ta hle a.

³²Mite chuan an râllâk thil: berâm te, bâwngpa te, bâwngno te chu an la sawk sawk a, leiah an phet thlu a, an talh a, a thisen chawpin an ei ta mai a.

³³Saula hnênah, “Mite chuan thisen chawpin sa an ei a LALPA lakah thil an tisual ta e,” tiin an sawi a. Ani chuan, “Dik lo takin thil in ti ta a ni, hetah hian lung min han lâk teh u,” a ti a.

³⁴Saulan chûng mite hnênah chuan, “Vâk darh ula, mi hnênah, ‘mi tinin bâwngpa leh berâm han la sela, hetah hian talh sela, ei rawh se. A thisen chawpa eiin LALPA chungah thil tisual suh u,’ tiin hrilh rawh u,” a ti a. Chumi zân chuan an bâwngpa an rawn kai ṭheuh va, chutah chuan an talh a.

³⁵Saula chuan LALPA tân maichâm a siam a, chu chu LALPA tâna a maichâm siam hmasak ber a ni.

³⁶Saula chuan, “Zânah Filistia mite chu bei ila, zîng khaw ên thlengin i bei ang u, tu mah zuah tûr a ni lo,” a ti a. Anni chuan, “Ṭha i tih ang chuan ti rawh,” an ti a. Puithiam erawh chuan, “Pathian i râwn rih ang u,” a ti a.

³⁷Saula chuan, “Filistia mite chu ka zu bei ang em? Israel-te kutah i pe ang em?” tiin a zâwt a. Chumi ni chuan Pathianin a chhâng lo.

³⁸Saula chuan, “Nangni mipui hotu zawng zawngte u, lo hnai ula, vawiin hian eng nge kan tihsual hriat chhuah i tum teh ang.

³⁹LALPA, Israel-te chhanhimtu, mi nunga chhâlin ka sawi e, ka fapa Jonathana tihsual pawh ni se, a thi ngei tûr a ni,” a ti a. Nimahsela, mipui zîng aṭangin tu mahin an chhang lo.

⁴⁰Israel mi zawng zawng hnênah chuan, “Inbûk ila, nangniho hi lehlamah ṭang ula, kei leh ka fapa Jonathana hi lehlamah kan ṭang ang e,” a ti a. Mite chuan Saula hnênah, “Ṭha i tih ang chuan ti mai rawh,” an ti a.

⁴¹Saula chuan Israel-te Pathian hnênah chuan, “A dik tak chu han tar lang ta che,” a ti a. Ṭhumvâwr chu Saula leh Jonathana chungah chuan a tla a, mipui chu an fihlîm ta a.

⁴²Saula chuan, “Kei leh ka fapa Jonathana thlei nân ṭhumvâwr rawh u,” a ti a. Jonathana chungah chuan a tla ta a.

⁴³Saula chuan Jonathana hnênah, “Eng nge i tihsual min hrilh rawh” a ti a. Jonathana chuan a hnênah, “Ka tiang hmâwra khawizu tlêm chu ka tem ngei alâwm; chuvângin, ka thi mai tûr a ni,” a ti a.

⁴⁴Saula chuan, “Jonathan, i thi ngei tûr a ni, i thih loh chuan na deuh pawhin Pathianin a tih tihin min ti rawh se,” a ti a.

⁴⁵Mite chuan Saula hnênah, “Israel-te tâna hnehna ropui tak thlentu Jonathana hi a thi ang maw? A thi tawp lo vang. LALPA nunna chhâlin kan sawi e, a samzai pakhat pawh leiah a tla lo vang,” an ti a. Mipui chuan Jonathana chu thi lo tûrin an chhan chhuak ta a.

⁴⁶Chumi hnu chuan Saulan Filistia mi a ûm chu a kîrsan a, Filistia mite pawh an ram lamah an haw ta a.

⁴⁷Saula chu Israel lal a lo nih chuan kil tina an hmêlma Moab mi te, Amon mi te, Edom mi te, Zoba lal te, Filistia mite chu a do va. A hawina lam apiangah a hneh zêl a.

⁴⁸Huai takin a bei a. Amalek mite pawh a hneh a, Israel-te chu rapbettute kut ata a chhan chhuak a.

⁴⁹Saula fate chu Jonathana te, Isvia te, Malkisua te an ni; a fanu upa zâwk chu Merabi a ni a, a naupang zâwk chu Mikali a ni.

⁵⁰Saula nupui hming chu Ahinoami, Ahimaaza fanu a ni. A sipai hotu ber hming chu Abnera a ni, a pami Nera fapa a ni.

⁵¹Kisa chu Saula pa a ni a, Abnera pa Nera chu Abiela fapa a ni.

⁵²A dam chhûng zawng, Saula chu Filistia mite nên nasa takin an indo ṭhîn a, Saula chuan mi chak emaw, mi huaisen emaw a hmuh apiang lamṭang atân a siam zêl ṭhîn.