Read Mizo Lushai LEHKHABU PAKHATNA SAMUELA 16 Bible Online

LEHKHABU PAKHATNA SAMUELA 16 - Mizo Lushai bible

LEHKHABU PAKHATNA SAMUELA 16

¹ LALPA chuan Samuela hnênah, “Israel lal atâna Saula ka duh loh avâng hian eng chen nge i lungngaih dâwn le? I hriak ûmah hriak thun khat la, kal rawh. Bethlehem mi Jesaia hnênah ka tîr ang che. A fapate zînga mi lal tûr ka ruat diam tawh e,” a ti a.

²Samuela chuan, “Engtin nge ka kal theih ang, Saulan a lo hriat chuan min that mai ang,” a ti a. LALPA chuan, “Bâwngla kai la, ‘LALPA hnêna thil hlân tûrin ka lo kal a ni,’ ti ang che.

³Thilhlannaah chuan Jesaia sâwm la; tichuan, i tih tûr chu ka hrilh ang che, a hming ka hrilh che chu hriak min thihsak dâwn nia,” a ti a.

⁴Samuela chuan LALPA thupêk ang chuan a ti a, Bethlehem-ah a kal ta a. Chumi khuaa upaho chuan khûr chungin an lo hmuak a, “Ṭha lam thu-a lo kal i ni em le?” an ti.

⁵Ani chuan, “Ṭha lam thilah ni e, LALPA hnêna thil hlân tûra lo kal ka ni. Intifai ula, thilhlannaah chuan lo kal ve rawh u,” a ti a. Jesaia leh a fapate chu a thian fai a, thilhlannaah chuan a sâwm a.

⁶Tin, an lo thlen chuan Eliaba chu ngun takin a en a, “LALPA hmaa ding hi a hriak thiha chu a ni phawt ang,” a ti a.

⁷Nimahsela, LALPAN a hnênah, “A hmêl ṭhat lam emaw, a sân lam emaw en suh, ani hi chu ka duh lo. LALPA chuan mihring thlîr dân angin a thlîr ve si lo; mihring chuan pâwn lam lan dân an en ṭhîn a, LALPA erawh chuan thinlung lam a en ṭhîn” a ti a.

⁸Tichuan, Jesaian Abinadaba a ko leh a, Samuela hnênah a rawn hruai a, ani chuan, “Hei pawh hi LALPA thlan a ni lo,” a ti a.

⁹Jesaia chuan Sama a va kaltîr leh a, ani chuan, “Ani pawh hi LALPA thlan chu a la ni chuang lo,” a ti a.

¹⁰Chutiang chuan Jesaia chuan a fapa pasarihte chu a hmaah a inlantîr a, Samuela chuan Jesaia hnênah, “Hêngho hi LALPA thlan an la ni ta lo cheu mai,” a ti a.

¹¹Samuela chuan Jesaia hnênah, “I fate hetah an awm kim em?” a ti a. Ani chuan, “A tlum ber a la awm ve lo; tûnah hian berâm a vêng a ni,” a ti a. Samuela chuan Jesaia hnênah, “Va kohtîr rawh, a lo thlen hma chu inthawina kan hlân lo vang,” a ti a.

¹²A va ko va, a hmaah a rawn hruai a. Ani chu sâr veng vawng, meng mawi tak, hmêlṭha tak a ni. LALPA chuan, “Hriak thih rawh le, hei ngei hi a ni e,” a ti a.

¹³Samuela chuan a hriak ûm chu a la a, a unaute hmaah ani chu hriak a thih ta a. Chumi ni aṭang chuan LALPA thlarau chu nasa takin Davida chungah a lo thleng ta a. Samuela chu a tho va, Rama khuaah a kal ta a.

¹⁴ LALPA thlarau chuan Saula chu a chhuahsan a, LALPA tirh thlarau sualin ani chu a tibuai ta a.

¹⁵Saula chhiahhlawhte chuan a hnênah, “Ngai teh, Pathian tirh thlarau sualin a tibuai ta che a nih hi.

¹⁶Ka pu, i chhiahhlawh, i tirhkahte hi thu min pe la, ṭingṭang tum thiam kan zawnsak ang che, Pathian tirh thlarau sualin a man hunah che ani chuan ṭingṭang a tumsak ang che a; tichuan, i ṭha leh mai ang,” an ti a.

¹⁷Saula chuan a chhiahhlawhte hnênah chuan, “Chutiang tum thiam tak chu mi zawnsak ula, ka hnênah rawn hruai rawh u,” a ti a.

¹⁸An zînga tlangvâl pakhat chuan a chhâng a, “Ngai teh, Bethlehem mi, Jesaia fapa, ṭingṭang tum thiam tak, mi huaisen, indo thiam, thu sawi thiam tak, hmêlṭha tak a awm a, a hnênah LALPA chu a awm a ni,” a ti a.

¹⁹Saula chuan Jesaia hnênah mi a tîr a, “I fapa, Davida, berâm vênga awm chu, han kaltîr rawh,” a ti a.

²⁰Jesaia chuan sabengtung phur khat chhang leh uain bûr khat leh kêlno, Saula pêk atân a fapa Davida chu a kentîr a.

²¹Davida chu Saula hnênah chuan a va kal a, a bulah chuan a awm ta a. Saula chuan a lo ngaina hle a, a râlthuam kengtuah a ṭang ta a.

²²Saula chuan Jesaia hnênah, “Davida hi ka mit a tlung hle a; chuvângin, ka hnênah awm reng mai rawh se,” tiin mi a tîr a.

²³Pathian tirh thlarau sualin Saula chu a man châng apiangin Davida chuan ṭingṭang a la a, a tumsak ṭhîn a, thlarau sual chuan a chhuahsan a, Saula chu a lo harhin a lo ṭha leh ṭhîn.