Read Mizo Lushai LEHKHABU PAKHATNA SAMUELA 17 Bible Online

LEHKHABU PAKHATNA SAMUELA 17 - Mizo Lushai bible

LEHKHABU PAKHATNA SAMUELA 17

¹Filistia mite chuan indo tûrin an sipaite an khâwm a, Judai ram chhûng Soko khuaah an kal khâwm a. Efes-damim an tih hmun, Soko leh Azeka inkârah chuan ṭanhmun an khuar a.

²Saula leh Israel mite pawh an inpun khâwm a, Ela ruamah ṭanhmun an khuar a. Filistia mite lo dang tûrin an inzâr darh a.

³Filistia mite chu tlângah an awm a, Israel-te pawh a râl lehlam tlângah an awm bawk a, an inkârah chuan ruam a awm a.

⁴Filistia mite ṭanhmun aṭang chuan an mi chak Goliatha, Gath khuaa mi hi a lo chhuak a,

⁵Dâr lukhum a khum a, dâr âwmphaw a ha bawk a, a âwmphaw rih lam chu kg. sawmnga leh pasarih a ni a, tawng ruk leh khâp khata sâng a ni.

⁶A ngalah chuan dâr ngalphaw a bun a, a dârah dârfei a pai a.

⁷A fei ngul chu suk tiat a ni a, a fei lu chu kg. sariha rit a ni, a phaw kengtu chu a hmaah a kal a,

⁸A ding a, Israel sipaiho chu a au va, an hnênah, “Indo tûra inep reng a ṭûl em ni? Kei Filistia mi ka ni a, nangni Saula chhiahhlawh in ni. In zîng ata mi thlang chhuak ula, ka hnênah lo chhuk teh se.

⁹Min hneha min tihhlum chuan in chhiahhlawh kan ni ang a, keiin ka ngama ka tihhlum chuan kan chhiahhlawh in ni ang a, kan bawihah in awm ang,” a ti a.

¹⁰Filistia mi chuan, “Vawiin hian Israel-ho sipaite chu ka cho a ni, mi pakhat han thlang chhuak ula, kan lo inbei ang e,” a ti a.

¹¹Saula leh Israel mi zawng zawngin chu Filistia mi thu sawi chu an hriatin an zâm a, an hlau ta êm êm a.

¹²Davida chu Judai ram Bethlehem khua Efratha mi, Jesaia fapa a ni. Jesaia chuan fapa pariat a nei a, Saula a lo lal khân upa tak, tar tawh tak a ni.

¹³Jesaia fapa pathumin Saula chu indonaah an zui a. A fapa pathum indonaa kalte chu a upa ber Eliaba te, a dawttu Abinadaba te, a pathumna Sama te an ni.

¹⁴Davida chu a naupang ber a ni a, a upa pathumte chuan Saula chu an zui a ni.

¹⁵Davida chu Saula hnên aṭangin a pa berâm enkawlin Bethlehem-ah a va kal ṭhîn a.

¹⁶Filistia mi chuan ni tin, zîng leh tlaiah, a va pan a, ni sawmli chhûng a va intâr lang ṭhîn a.

¹⁷Jesaia chuan a fapa Davida hnênah, “Buhfai kan ro kg. sâwm leh chhang tlâwn sâwm keng la, i ûte riahhmuna awm va pe thuai rawh khai.

¹⁸Tin, bâwnghnute khal tlang sâwm hi an pâwla sâng hotu kensak la, i ûte engtin nge an awm han zâwt la, an chanchin han hre ngei ang che.

¹⁹Saula leh i ûte chu Israel mi zawng zawng nên Filistia mite beiin Ela ruamah an awm e.” a ti a.

²⁰Davida chu zîng takah a tho va, berâm chu vêngtu pakhat kutah a hnutchhiah a, Jesaia thupêk ang chuan a keng a, a kal ta a. Indona hmun pana chhuak mêk sipaiho chu inbei tûra an lo au dur dur laiin ani chuan riahbûk chu a va thleng a.

²¹Israel-ho leh Filistia mite chu inbei tûrin an lo inzâr a, sipai leh sipai chu an lo inep ut mai a,

²²Davida chuan a thil ken chu bungraw enkawltu hnênah chuan a dah a, sipaiho zîngah chuan a va tlân a, a ûte chu chibai a va bûk a.

²³Anni chu a biak laiin, ngai teh, an mi chak Gath khuaa Filistia mi, a hming Goliatha chu Filistia sipaiho zîng aṭang chuan a lo chhuak a, a thu sawi ngai bawk kha a han sawi a. Chu chu Davida chuan a lo hria a.

²⁴Israel mi zawng zawngin chu mi chu an hmuhin an tlânsan a, an hlau êm êm a.

²⁵Israel mite chuan, “Kha pa lo chhuak kha in hmu em? Israel mite cho tûra lo chhuak a nih ngei kha. Tu pawh amah tihlum chu lalin sum tam tak a pe ang a, a fanu a neihtîr bawk ang; tin, a pa chhûngte chuan Israel ramah chhiah an awl ang,” an ti a.

²⁶Davida chuan a kianga dingte hnênah chuan, “Israel-te tithlabârtu, he Filistia mi thattu hi eng lâwmman nge an pêk dâwn? Pathian nung sipaiho cho veitu, he serh tan loh Filistia mi hi tu nge maw a nih le?” a ti a.

²⁷Mite chuan an chhâng a, “A tihlumtu apiang chu kan sawi ang khân tihsak a ni ang,” an ti a.

²⁸Tichuan, an u ber Eliaba chuan chutianga mi hnêna a thu sawi chu a lo hriatin Davida chungah a thin a ur ta hle a. “Engah nge i lo chhuk ve? Thlalêra berâm tlêm tê kha tu nge i vêntîr? I luhlul leh chapozia hi, indo en tûrin i lo kal mai mai a nih hi,” a ti a.

²⁹Davida chuan, “Eng dang ti lo ve, thu ka zâwt a ni ve mai alâwm,” a ti a.

³⁰Davida chuan mi dang hnên lam a hawisan a, a sawi ngai bawk a sawi leh a, mite chuan a hmaa an chhân ang bawkin an chhâng leh a.

³¹Davida thu sawi chu an hriatin Saula an hrilh a, ani chuan a ko ta a.

³²Davida chuan Saula hnênah chuan, “He pa avâng hian tu mah zâm suh se, i chhiahhlawh hian he Filistia mi hi ka va bei ang e,” a ti a.

³³Saula chuan Davida hnênah, “He Filistia mi hi bei tûrin i kal thei em lo vang a, i la naupang si a, ani zawng a tleirâwl lai ata indo mi a ni tawh asin,” a ti a.

³⁴Davida chuan Saula hnênah, “I chhiahhlawh hian ka pa berâm ka vêng ṭhîn a, sakeibaknei emaw, savawm emaw an lo kala berâm rual zîng ata berâmno an lâk te hian,

³⁵ka ûm ṭhîn a, ka bei a, an sa seh chu ka chhuhsak ṭhîn. Min rawn beih dâwnte hian an baksamah ka man a, ka ṭhuai a, ka that ṭhîn a ni.

³⁶I chhiahhlawh hian sakeibaknei leh savawmte ka that tawh a, he serh tan loh Filistia mi pawh hi chutiang chuan ka sawisa dâwn a ni, Pathian nung sipaite a cho vei a,” a ti a.

³⁷Tin, Davida chuan, “Sakeibaknei lak ata leh savawm lak ata min chhanchhuaktu LALPA chuan Filistia mi lak ata chu min chhan chhuak ang,” a ti a. Saula chuan, “Kal ta che le, LALPAN ṭanpui che rawh se,” a ti a.

³⁸Saula chuan Davida chu ama râlthuam a bel a, dâr lukhum a khumtîr a, âwmphaw a hâktîr bawk a.

³⁹Davida chuan a phaw chungah khandaih a pai a, kal a han tum chhin a; chutiang chuan a la inthuam ngai si lo va. Davida chuan Saula hnênah, “Ka kalpui thei hauh lo mai a, hetiang hi ka la inbel ngai si lo va,” a ti a. Davida chuan a hlîp ta a.

⁴⁰Tichuan, tiang a la a, luitêa ṭiau lung panga a thlang a, a berâm vên iptêah chuan a ak a, virvawm chu a keng a, Filistia mi chu a pan ta a.

⁴¹Filistia mi chu a lo kal a, Davida chu a rawn pan a, a phaw kengtu chu a hmaah a kal zêl a.

⁴²Filistia mi chu a han hawi a, Davida a han hmuh chuan a hmusit hle a; tleirâwl tê, sâr veng vawng a ni a, a zaidam hmêl hle bawk si a.

⁴³Filistia mi chuan Davida hnênah, “Uicho em ka niha, engati nge tiang nêna min rawn pan le?” a ti a. Filistia mi chuan a pathiante chhâlin Davida chu ânchhia a lawh a.

⁴⁴Filistia mi chuan Davida hnênah, “Lo kal teh, i sate kha chunglêng savate leh ramsate ka han eitîr teh ang,” a ti a.

⁴⁵Davida chuan Filistia mi hnênah chuan, “Khandaih te, thal te, fei te kengin i lo thawk a; kei zawng Engkim LALPA, Israel-te Pathian, i chova hmingin ka lo thawk a ni.

⁴⁶Vawiinah hian LALPAN nang hi ka kutah min pe a ni; ka that ang che a, i lu ka tansak ang che, Filistia sipai ruangte chu vawiin hian chunglêng savate leh ramsate ka pe ang a; tichuan, mi zawng zawngin Israel-te zîngah Pathian a chêng reng a ni tih an hria ang.

⁴⁷Indona hneh nân LALPA chuan khandaih leh fei, hmanruaah a hmang chuang lo tih heta pung khâwm zawng zawngin an hria ang; ani chuan nangniho hi ka kutah min pe dâwn a ni,” a ti a.

⁴⁸Filistia mi chu Davida bei tûra a lo kal hnaih lai chuan Davida chu inbeihna hmun lam panin Filistia mi chu tâwk tûrin a tlan vat a.

⁴⁹Davida chuan a ip a zen a, lung a han phawrh a, a virvawm chuan a han vawm a, Filistia mi chu a chaldârah tak a fuh a, lung chu a chalah a lût a, bawkkhupin a tlu ta dêr a.

⁵⁰Davida chuan Filistia mi chu virvawm leh lungin a bei a, Filistia mi chu a vawm a, a that ta a. Davida chuan khandaih a keng lo.

⁵¹Davida chu a tlân a, Filistia mi kiangah chuan a va ding a, a khandaih chu a pai ata a phawisak a, a lu a tansak ta a. Filistia mite chuan an mi chak a thi tih an hriat chuan an tlânchhe ta a.

⁵²Israel mite leh Juda mite erawh chu an tho va, an au va, Filistia mite chu Gath leh Ekron kulh kawngkhâr thleng rawkin an ûm ta a. Filistia mi, hliam tuarte chu Saraim aṭanga Gath leh Ekron thlengin kawng tluanin an tlu rum a.

⁵³Israel mite chuan Filistia mite an ûm chu an kîrsan a, an riahhmun chu an suam a.

⁵⁴Davida chuan Filistia mi lu chu a la a, Jerusalem-ah a kalpui a, a râlthuam erawh chu a puan inah a dah a.

⁵⁵Filistia mi bei tûra Davida a kal lai chu Saulan a lo hmu a, a sipaihotu Abnera hnênah, “Abner, he tlangvâl hi tu fa nge?” a ti a. Abnera chuan, “Aw lalber, ka lo hre hauh lo mai a,” a ti a.

⁵⁶Lal chuan, “He naupang hi tu fa nge a nih zâwt chhuak rawh,” a ti a.

⁵⁷Davida chuan Filistia mi a that haw chu Abnera chuan a hruai a, Filistia mi lu keng chungin Saula hnênah a kalpui a.

⁵⁸Saula chuan a hnênah, “Tlangvâl, tu fapa nge i nih?” a ti a. Davida chuan a chhâng a, “I chhiahhlawh Jesaia, Bethlehem mi fapa ka ni,” a ti a.