Read Mizo Lushai LEHKHABU PAKHATNA SAMUELA 19 Bible Online

LEHKHABU PAKHATNA SAMUELA 19 - Mizo Lushai bible

LEHKHABU PAKHATNA SAMUELA 19

¹Saula chuan a fapa Jonathana leh a chhiahhlawh zawng zawng chu Davida that tûrin a ti a. Nimahsela, Saula fapa Jonathana chuan Davida chu a hmangaih hle a.

²Jonathana chuan Davida hnênah, “Ka pa hian thah a tum che a; chuvângin, naktûk zîngah chuan fîmkhur la, hmun fianrialah biru la; tah chuan awm rêng ang che.

³Tin, ka pa chu ka hruai chhuak ang a, i bihrûkna lam phûlah kan lo kal ang a, i chungchâng ka sawipui ang a, kan inbiak dân chu ka hrilh leh ang che,” a ti a.

⁴Jonathana chuan a pa Saula kiangah chuan Davida chu a va fak a, a hnênah, “lalber, i chhiahhlawh Davida chungah chuan thil sual ti lul suh. I chungah eng mah a tisual lo va, i tân thil ṭha hlîr a ti zâwk ṭhîn asin.

⁵Thih huamin Filistia mi kha a bei a, Israel mi zawng zawng tân LALPAN hnehna a siamsak a; chu chu nang pawhin i hmu a, i lâwm hle kha. Eng vângin nge pawi khawih awm lova Davida chu i thah mai ang?” a ti a.

⁶Saula chuan Jonathana thu sawi chu a pawm a, “Davida chu ka that lo vang,” tiin LALPA hming chhâlin thu a tiam a.

⁷Jonathana chuan Davida chu a ko va, chûng thil zawng zawng chu a hrilh a. Tichuan, Davida chu Saula hnênah a hruai a, tûn hma ang khân a hnênah a awm leh ta a.

⁸Indona a lo awm leh a, Davida chu a thawk chhuak a, Filistia mite chu a va bei a, a that chiam a, a hmaah chuan an tlânchhe ta vek a.

⁹Saula chu ama fei kenga a ṭhut laiin LALPA tirh thlarau sual a chungah a lo thleng leh a; chutih lai chuan Davida chuan ṭingṭang a tum a.

¹⁰Saula chuan Davida chu bangah feia khawh beh tlat a tum a; mahse, Davida chu a kiang hman a, fei chu bangah chuan a khawh bûr ta ngur a. Davida chu a tlân chhuak a, a him ta a.

¹¹Saula chuan Davida chu a ina va huala, a tûk zînga that tûrin mi a tîr a. Davida nupui Mikali chuan, “Zânina i tlân chhuah loh chuan naktûkah an that dâwn che a ni,” tiin a hrilh a.

¹²Tichuan, Mikali chuan Davida chu tukverhah a thlâk thla a, a tlân chhuak a, a him ta a.

¹³Mikali chuan milem a la a, khumah a zalh a, a lû lamah kêl hmul lukham a dah a, puanin a khuh ta a.

¹⁴Davida hruai tûra Saula mi tirhte hnênah chuan, “A dam lo a ni,” a ti a.

¹⁵Saula chuan Davida va en tûrin mi a tîr leh a, “A khum chawpin han zâwn ula, ka lo that ang e,” a ti a.

¹⁶Mi tirhte chu an va luh chuan, ngai teh, milem chu a lu lama kêl hmul lukhamin a lo mu a.

¹⁷Saulan Mikali hnênah, “Engtizia nge hetianga mi buma, ka hmêlma chu i tlân chhuahtîr le?” a ti a. Mikali chuan, “Ka kaltîr loh chuan mi thah a tum si alâwm,” tiin Saula chu a chhâng a.

¹⁸Davida chu a tlânchhia a, a him ta a. Rama khuaah Samuela hnênah a va kal a, a chunga Saula thil tih dân zawng zawng chu a hrilh a. Tin, Samuela nên chuan Naioth-ah an kal a, tah chuan an awm ta a.

¹⁹Saula hnênah chuan, “Ngai teh, Davida chu Rama khuaa Naioth-ah a awm,” tiin an hrilh a.

²⁰Saula chuan Davida man tûrin mi a tîr a. Zâwlnei rual thu sawi dual dual Samuelan a hruai lai chu an va hmu a, Saula mi tirhte pawh chuan thu an sawi ve ta a.

²¹Chu thu chu Saula an hrilh a, mi dang a tîr leh a, chung mite pawh chuan thu an sawi ve leh ta a.

²²Ani pawh chu Rama khaw lamah chuan a kal ve ta a; Seku hmuna tuichhunchhuah lian tak a va thlen chuan, “Samuela leh Davida hi khawiah nge an awm?” a ti a. Mi pakhat hian, “Ngai teh, Rama khuaa Naioth-ah an awm,” a ti a.

²³Tichuan, Naioth-ah chuan a va kal a, Pathian thlarau a chungah a lo thleng ve ta a, Rama khuaa Naioth a thlen thlengin thu a sawi ve ta a.

²⁴A silhfênte a hlîp a, Samuela hmaah chuan thu a sawi ve ta a. Chumi ni chuan nilêng leh zankhuain saruakin a awm a; chuta ṭang chuan, “Saula pawh zâwlnei a ni ve ta elo?” tih hi an chîng hlen ta a ni.