Read Mizo Lushai LEHKHABU PAKHATNA SAMUELA 20 Bible Online

LEHKHABU PAKHATNA SAMUELA 20 - Mizo Lushai bible

LEHKHABU PAKHATNA SAMUELA 20

¹Davida chu Rama khuaa Naioth aṭang chuan a tlân chhuak a, Jonathana hnênah a kal a, “Eng nge ka tih a, eng nge ka bawhchhiat le? I pa chungah eng nge ka tihsuala hetia mi thah a tum mai le?” a ti a.

²Ani chuan, “A that tawp lo vang che, i thi hauh lo vang. Ngai teh, ka pa chuan thil lian emaw, thil tê emaw min hrilh lovin eng mah a ti ngai lo. Engah tehlul nge hêng thu hi ka hnênah a zêp ang? A zêp hauh lo vang,” a ti a.

³Davida chuan, “Nangin min hmangaihzia hi i pa chuan a hre chiang hle a; chuvângin, i rilru tihnat a hlauh avângin ‘He ka thiltih tum hi chu hre suh se,’ a ti a ni ang. Nimahsela, LALPA nunna leh i nunna chhâlin ka hrilh a che, tlêmah tlêmah ka thi lo chauh a ni,” tiin a chhâng a.

⁴Jonathana chuan Davida hnênah, “I duh apiang chu ka tihsak zêl ang che,” a ti a.

⁵Davida chuan Jonathana hnênah, “Ngai teh, naktûk hi thla thar tûk a ni dâwn a, lal hnêna chaw kîl ngei tûr ka ni a; mahse, ni thum ni tlai lam thlengin phûlah biru tûrin ka kal ang a.

⁶Tin, i pain ka awm lo a ni tih a hre ta a nih chuan, ‘Davida chuan an khua Bethlehem-ah an chhûngkuaa an kum tin thilhlan hlân tûrin kal min dîl ngawih ngawih a, a kal ta a ni,’ ti la;

⁷ani, a ṭha alâwm a tih chuan i chhiahhlawha tân a muanawm ang a, a thinrim erawh chuan ka chungah thil ṭha lo tih a tum tih hria ang che.

⁸I chhiahhlawh hi khawngaih rawh, LALPA hmaah thu i thlunpui si a; ka lo bawhchhia a nih chuan nangman min that mai rawh; engah nge i pa hnênah chuan min hlan kher ang?” a ti a.

⁹Jonathana chuan, “Chutiang chu ring rêng rêng suh, ka pain i chungah thil ṭha lo tih a tum ka hriat phawt chuan ka hrilh loh che i ring em ni?” a ti a.

¹⁰Davida chuan Jonathana hnênah, “I pain bung takin a chhâng che tih tuin nge min hrilh ang?” a ti a.

¹¹Jonathana chuan Davida hnênah, “Hawh teh, phûlah sâwn i kal teh ang,” a ti a. Tichuan, phûlah chuan an va kal ta a.

¹²Jonathana chuan Davida hnênah, “Israel-te Pathian LALPA chu thuhretu ni rawh se, naktûk hetih hunah hian emaw, a tûk lehah emaw, ka pa ka han dâwp vêl ang a, i chungchâng ṭha taka a sawi chuan mi ka rawn tîr ang a, ka rawn hrilh ngei ngei ang che.

¹³Ka pain i chungah thil ṭha lo tih a tum tih ka hriata, ka rawn hrilh lo che a nih phawt chuan LALPA chuan a tih tihin min ti sela, chutiang thil ṭha lo chu ka chungah ti ve rawh se. Him taka i awm theihna kawng ka zawnsak ngei ngei ang che. LALPA chu ka pa hnêna a awm ṭhîn angin i hnênah pawh awm zêl rawh se.

¹⁴Ka damchhûng zawng LALPA angin ka chungah ngilneihna tilang zêl la;

¹⁵ka thiha LALPAN Davida hmêlmate lei ata a tibo vek a nih pawhin, ka chhûngte chu i lo khawngaih kumkhua dâwn nia,” a ti a.

¹⁶Jonathana chuan Davida chhûngte tân pawh thu a thlung tel a, “LALPA chuan tu pawh Davida chunga thil sual ti chu hrem zêl rawh se,” a ti a.

¹⁷Jonathana chuan amah a inhmangaih angin Davida chu a hmangaih a, chutianga amah chu hmangaih ve tûrin Davida chu a tiamtîr a.

¹⁸Jonathana chuan a hnênah, “Naktûk hi thla thar a ni a, i ṭhut hmun a ruah dâwn avângin i awm loh a lang ngei ang.

¹⁹Naktûk tûklehah chuan hmâna i bihrûkna hmunah khân biru leh la, lungpui phênah khân awm reng ang che.

²⁰Inthemthiam ni âwm takin a sîrah thal pathum ka rawn kâp ang a.

²¹Tin, ‘Kal la, thal va chhar rawh,’ tiin naupang ka rawn tîr ang a; naupang hnênah, ‘En teh, thal chu i sîrah khân a awm; kal la, la rawh’ ka tih chuan i tân a muanawm a, hlauh tûr a awm lo tih LALPA chhâlin ka sawi a ni.

²²Amaherawhchu, naupang hnênah, ‘En teh, thalte chu i piah lamah sâwn a awm’ ka tih chuan kal bo vang che, LALPA chuan a kal botîr che a ni ang.

²³Tin, nang nêna kan sawi dun tâk chungchângah chuan LALPA chu thuhretu ni kumkhua rawh se,” a ti a.

²⁴Tichuan, Davida chu phûlah chuan a biru a, thla a lo thar chuan lal chuan chawhlui a rawn kîl a.

²⁵Lal chu ni danga a ṭhutna ngai bang bulah chuan a ṭhu a, Jonathana chu a hma zâwnah a ṭhu a. Abnera chu Saula kiangah a ṭhu a, Davida ṭhuthmun erawh chu a ruak a.

²⁶Chumi ni chuan Saula chuan eng mah a sawi rih lo. ‘Eng emaw thiam lohna a nei a ni ang a’ a ti rilru a.

²⁷Thla thar ni hnih ni chuan Davida ṭhuthmun a la ruak ta cheu va. Saula chuan a fapa Jonathana hnênah, “Engati nge Jesaia fapa Davida hi niminah leh vawiinah chawhlui kîl tûra a lo kal loh?” a ti a.

²⁸Jonathana chuan Saula chu a chhâng a, “Davida chuan Bethlehem-a kal mi dîl ngawih ngawih a,

²⁹‘Min kaltîr hrâm rawh, khuaah chuan kan chhûngkuain inthawina kan hlân dâwn a, ka unaupain chuta awm ve ngei tûr chuan min ti si a; chuvângin, min khawngaih la, min kaltîr hrâm rawh, ka unaute ka va tlawh ang e,’ a ti a; chuvângin, lal chaw kîl tûrin a lo kal lo a ni,” a ti a.

³⁰Saula chu Jonathana chungah chuan a thinur ta thut a, “Nang hmeichhe lepchiah leh luhlul fapa, i mualpho nân i nu a hringtu che tizak tûrin Jesaia fapa hi i ṭan tih ka hre chiang a ni.

³¹Jesaia fapa hi a dam chhûng chuan nang leh kan ram hi a ding chhuak dâwn lo tih hre ta che; tûnah, mi kohtîr la, ka hnênah han hruai rawh, a thi ngei tûr a ni,” a ti a.

³²“Eng vânga thi tûr nge a nih, eng nge a tihsual?” tiin Jonathana chuan a pa chu a chhâng a.

³³Tichuan, Saula chuan khawh hlum tumin a tin a, a pa chuan Davida chu thah a lo tum ngei a ni tih a hre ta a.

³⁴Jonathana chuan thinur takin a chaw kil chu a thawhsan a, chumi thla thar ni hnih ni chuan chaw chu a ei duh ta lo, a pain Davida a tihmualpho nasat êm avângin a rilru a na hle a.

³⁵A tûkah chuan Jonathana chu naupang hruaiin phûl lamah Davida nêna an hmun ruatah chuan a kal ta a.

³⁶A naupang hruai hnênah, “Tlân la, ka thal kahte kha va zawng rawh,” a ti a. Naupang tlân lai chuan a piah lamah thal a kâp leh a,

³⁷Naupangin Jonathana thal kahna hmun a va thlen chuan Jonathanan naupang chu a au va, “Thal chu i piah lamah khân a awm lo maw?” a ti a.

³⁸Jonathana chuan naupang chu a au va, “Hmanhmawh la, kal thuai thuai la, muang suh,” a ti a. Jonathana hruai naupang chuan thalte chu a va chhar a, a pu hnênah chuan a rawn la a.

³⁹Naupang chuan eng mah a hre lo va, Jonathana leh Davida erawh chuan thil kalhmang chu an hria a.

⁴⁰Jonathana chuan naupang hnênah a thalte chu a pe a, “Kal ta la, khuaah hâwnpui rawh,” a ti a.

⁴¹Naupang chu a kal liam veleh Davida chu a bihrûkna lung phên aṭang chuan a lo chhuak a, bawkkhupin vawi thum chibai a rawn bûk a; tin, an infâwp a, an ṭap dûn ta a. Davida chu a lung a chhe lehzual a.

⁴²Jonathana chuan Davida hnênah, “Thlamuang takin kal rawh aw, nang nêna kan inṭhianna chu LALPA hminga thu kan thlun tawh kha. LALPA chu nang nêna kan inkârah te, i thlahte leh ka thlahte inkârah te, thuhretu ni kumkhua rawh se,” a ti a. Davida chu a tho va, a kal ta a, Jonathana pawh khuaah a haw ta a.