Read Mizo Lushai LEHKHABU PAKHATNA SAMUELA 22 Bible Online

LEHKHABU PAKHATNA SAMUELA 22 - Mizo Lushai bible

LEHKHABU PAKHATNA SAMUELA 22

¹Chuta ṭang chuan Davida chu a chhuak a, Adulam pûkah a awm ta a. A unaute leh a pa chhûngten chu chu an hriatin an zu fin ve ta a.

²Hnehchhiah tuar te, lei bat nei te, lungawi lote chuan an rawn bêl a, an hotu-ah a ṭang ta a. Tichuan, mi zali lai a hnênah chuan an awm ta a.

³Chuta ṭang chuan Davida chu Moab rama Mizpa-ah a kal a, Moab lal hnênah chuan, “Pathianin eng nge min tihsak dâwn tih ka hriat hma chuan ka nu leh ka pate hi i hnênah lo awm rawh se aw,” a ti a.

⁴Tichuan, anni chu Moab lal hnênah chuan a hnutchhiah a, pûk hima Davida a awm chhûng chu chutah chuan an awm a.

⁵Zâwlnei Gada chuan Davida hnênah, “Pûkah hi chuan awm reng suh; chhuak la, Judai ramah kal rawh,” a ti a. Davida chu a chhuak a, Heret ngâwah a lût ta a.

⁶Saula chuan Davida awmna an hre ta tih a lo hria a. Chutih lai chuan Saula chu Gibea khuaah a awm a, tlâng panga Esel thing hnuaiah a fei kengin a ṭhu a, a ṭhuihruai zawng zawng chu a kiangah an ding a.

⁷Saula chuan a kianga ding a ṭhuihruaite hnênah chuan, “Nangni Benjamin mite u, ngaithla rawh u. Jesaia fapa chuan lo te, grep huante pe che uin za hotu-ah te, sâng hotu-ah te a siam vêk dâwn che u em ni?

⁸In vaiin min phiar a ni lâwm ni? Ka fapain Jesaia fapa thu a thlunpui thu tu mahin min hrilh lo va, tu mahin pawi min tihpui hek lo. Ka fapain ka chhiahhlawh Davida hi mi do tûr leh vawiinah pawh min châng ru tûrin a fuih thu hi tu mahin in sawi duh si lo va,” a ti a.

⁹Edom mi, Doega, Saula chhiahhlawh zînga ding ve chuan a chhâng a: “Jesaia fapa chu Nob khuaah, Ahituba fapa Ahimeleka hnêna a lo kal ka hmu a.

¹⁰Tin, ani chuan LALPA a râwnsak a, ei tûr a pe a, Filistia mi Goliatha ngûnhnâm a pe bawk a,” a ti a.

¹¹Lal chuan puithiam Ahimeleka, Ahituba fapa leh a pa chhûngkua, Nob khuaa puithiam zawng zawng chu a kohtîr a,

¹²Saula chuan, “Ahituba fapa tûnah ngaithla rawh,” a ti a. Ani chuan, “Eng nge ni ka pu?” tiin a chhang a.

¹³Saula chuan a hnênah, “Engati nge nang leh Jesaia fapa hian min phiar le? Chhang leh khandaih i pe a. Pathian i râwnsak a; chuvângin, min do va, vawiinah hetiangin min châng ta a nih hi,” a ti a.

¹⁴Ahimeleka chuan lal chu a chhâng a, “Lal mâkpa, vêngtu hotu, in chhûngkaw chawimawitu leh i chhiahhlawhte zînga mi rinawm ber Davida ang hi tu nge awm?

¹⁵Vawiin hi Pathian ka râwnsak ni hmasa ber em ni? A ni lo, lal chuan a chhiahhlawh hi ka pa chhûngte nên nangmah phiarruah min puh lo hrâm rawh. I chhiahhlawh hian hêng thil hi a eng mah ka hre lo tak meuh a ni,” a ti a.

¹⁶Lal chuan, “Ahimelek, i thi ngei tûr a ni, nang leh i pa chhûngte zawng zawng nên,” a ti a.

¹⁷Tin, lal chuan a kianga vêngtu sipai dingte hnênah chuan, “Kal ula, LALPA puithiamte hi that rawh u; Davida lamah an ṭang a, a tlân bo tih hre reng sia ka hnêna an sawi loh avângin,” a ti a. Nimahsela, vêngtu sipaite chuan LALPA puithiamte chungah kut an thlâk duh lo va.

¹⁸Lal chuan Doega hnênah, “Kal la, puithiamte chu va that rawh,” a ti a. Edom mi Doega chu a kal a, puithiamte chu a va bei a, chumi ni chuan puithiam kawr ha chin sawmriat leh panga a that a.

¹⁹Tichuan, puithiam khua Nob chu khandaihin a bei a, a hmei a pa, naupang hnute hne lai lamin, bâwng te, sabengtung te, berâm te nên lam khandaihin a sât hlum a.

²⁰Ahimeleka fate zînga Ahitupa fapa, Abiathara chu a tlân chhuak a, Davida hnênah a tlan ta a.

²¹Abiathara chuan LALPA puithiamte Saulan a thah thu chu Davida a hrilh a.

²²Davida chuan Abiathara hnênah, “Khami nia Doega ka hmuh khân, Saula a hrilh ang tih ka ring rêng a ni. I pa chhûngte zawng zawng chu keimah avânga thi an ni.

²³Ka hnênah awm la, hlau suh, mi thah tumtu chuan nang pawh thah a tum che a ni, ka hnêna i awm chuan i him ang,” a ti a.