Read Mizo Lushai LEHKHABU PAKHATNA SAMUELA 23 Bible Online

LEHKHABU PAKHATNA SAMUELA 23 - Mizo Lushai bible

LEHKHABU PAKHATNA SAMUELA 23

¹“Filistia miten Keila khua an bei a, hruihzâwla an buhte an lâksak vek mai,” tiin Davida chu an rawn hrilh a.

²Ani chuan LALPA hnênah, “Hêng Filistia mite hi ka zuk bei ang em?” tiin a zâwt a. LALPA chuan, “Kal la, Filistia mite chu bei la, Keila khua chu chhan chhuak rawh,” a ti a.

³Davida mite chuan a hnênah, “Judai ram aṭang pawhin kan hlau a ni a, Keila khuaa zuk kala, Filistia sipaiho zuk beih chu a va hlauhawm lehzual âwm ve?” an ti a.

⁴Davida chuan LALPA chu a râwn leh a, LALPA chuan a chhâng a, a hnênah, “Keila khuaah chuan chhuk rawh, Filistia mite chu i kutah ka pe ang che,” a ti a.

⁵Davida leh a mite chu Keila khuaah chuan an kal ta a, Filistia mite chu an zuk bei a, an rante an lâksak a, an that chiam a; chutiang chuan Keila khuaa mite chu Davida chuan a chhan ta a.

⁶Ahimeleka fapa Abiathara chu Keila khuaa Davida hnênah chuan puithiam kawr kengin a tlân a.

⁷Tin, Keila khuaah Davida a kal tih Saula an hrilh a, Saula chuan, “Pathianin ka kutah min pe ta a nih chu; kulh kawngka kalhna nei khuaah amah a inkhung ta si a,” a ti a.

⁸Saula chuan mi zawng zawng, Keila khua zuk beia Davida leh a hote hual tûrin a ko khâwm a.

⁹Saulan beih a tum tih Davida chuan a lo hria a, puithiam Abiathara hnênah, “Puithiam kawr kha han la teh,” a ti a.

¹⁰Davida chuan, “Aw LALPA Israel-te Pathian, Saula chuan kei i chhiahhlawh avâng hian Keila khuaa lo kala, rawn tihchhiat vek a tum tih ka lo hria a.

¹¹Keila khuaa mite hian a kutah min pe dâwn em? I chhiahhlawhin ka lo hriat ang hian Saula chu a lo chhuk dâwn em? Aw LALPA, Israel-te Pathian, hei hi min hrilh teh,” a ti a. LALPA chuan, “Lo kal a tum,” tiin a chhâng a.

¹²Davida chuan a zâwt leh a, “Keila mite hian kei leh ka hote hi Saula kutah min pe ang em?” a ti a. LALPA chuan, “An pe dâwn che,” a ti a.

¹³Davida leh a hote, mi zaruk emaw lai chu an tho va, Keila khua ata chu a remchânna lai apiangah an chhuak ta a. Davida chu Keila khua ata a tlân chhuak ta tih Saulan a hriat chuan Keila khuaa kal chu a tum ta lo va.

¹⁴Davida chu Zif tlângram thlalêrah chuan a rawl a, a awm ta reng a. Saula chuan ni tin a zawng a; Pathianin a kutah a pe lo va.

¹⁵Davida chu Zif thlalêr Hores hmuna a awm lai chuan amah thah tumin Saula a lo thawk tih a hria a.

¹⁶Saula fapa Jonathana chu a lo thawk a, Davida hnênah Hores-ah chuan a lo kal a. “Pathianin a vêng zêl dâwn che a ni,” a rawn ti a.

¹⁷A hnênah chuan, “Hlau rêng rêng suh, ka pa Saula chuan i chungah kut a thlâk lo vang. Israel lalah i ṭang ang a, kei i dawttu ka ni ang, ka pa pawhin chu chu a hria a ni,” a ti a.

¹⁸An pahnih chuan LALPA hmaah thu an thlung a, Jonathana chu in lamah a hâwng a, Davida erawh chu ramhnuaiah a awm ta reng a.

¹⁹Zif mite chuan Gibea khuaah Saula chu an han hmu a, a hnênah, “Davida chu Hakila tlângram, Jesimon chhim lam Hores hmunah kan bul maiah a awm reng alâwm.

²⁰Tûnah, aw lalpa, lo chhuk la, i duhthusâm ang takin ani chu lal kutah kan lo hlân mai tûr alâwm,” an ti a.

²¹Saula chuan, “Mi in ṭanpui ṭhin avângin LALPA chuan mal sâwm che u rawh se.

²²Kal ta ula, va hre chiang lehzual rawh u. Khawi lamah nge a kal ṭhina, tu nge chutah chuan hmu ṭhîn va zawng chhuak rawh u, mi bum a thiam hle tih ka hre si a.

²³A bihrûkna ṭhinte zawng chhuak vek ula; tichuan, engkim hre chiangin ka hnênah lo kîr leh ang che u. Tin, in rualin ka lo kal ve ang a, chu lai rama a la awm phawt chuan Juda hnam tam tak zîng aṭangin ani chu ka man chhuak ngei ang,” a ti a.

²⁴Tichuan, an tho va, Saula kal hmain Zif-ah chuan an kal a, Davida leh a mite chu Jesimon chhim Araba rama Maon thlalêrah chuan an awm a.

²⁵Saula leh a mite chuan an zawng ṭan ta a, chu thu chu Davida an hrilh a; tichuan, Maon thlalêr lungpui hmunah a chhuk a, chutah chuan a awm ta reng a. Chu chu Saulan a lo hriat chuan Maon thlalêr lamah Davida chu a ûm ta a.

²⁶Saula chuan tlâng pang lehlam kawngṭum a zawh a, Davida leh a hote chu chu tlâng pang lehlam kawngah Saula hlauvin hmanhmawh takin an kal a. Saula leh a hote chuan Davida leh a hote chu an man teuh hle tawh a.

²⁷Zualko pakhat hi Saula hnênah a lo kal a, “Rang takin lo haw rawh, Filistia miten ram an rûn e,” a rawn ti a.

²⁸Saulan Davida a ûm chu a kîr a, Filistia mite bei tûrin a kal ta a. Chuvângin, he hmun hi Sela-hamalekot an ti ta a.

²⁹Chuta ṭang chuan a chho va, Engedi hmunah a biru ta a.