Read Mizo Lushai LEHKHABU PAKHATNA SAMUELA 26 Bible Online

LEHKHABU PAKHATNA SAMUELA 26 - Mizo Lushai bible

LEHKHABU PAKHATNA SAMUELA 26

¹Zif-ho chu Gibea khuaa Saula hnênah an lo kal a, “Davida chu Jesimon thlalêr bul Hakila tlângah a biru,” an rawn ti a.

²Tichuan, Saula chu Israel mi zathum thlan chhuah hruaiin thlalêr lamah chuan Davida zawng tûrin a chhuk ta a.

³Saula chuan Jesimon thlalêr bul Hakila tlâng kawng sîrah riahhmun a khuar a; Davida erawh chu thlalêrah a awm a, Saulan a rawn zawng a ni tih a hria a.

⁴Enthlatu a tîr a, Saulan a rawn zawng ngei tih a hre chiang ta a.

⁵Davida chu a tho va, Saula riahhmun khuarnaah chuan a va kal a; Saula leh a sipai hotu Abnera, Nera fapa mut hmun chu a va hria a. Saula chu an riahhmun lai takah a mu a, a vêlin a sipaite an mu a.

⁶Davida chuan Hit mi Ahimeleka leh Joaba u, Zeruii fapa Abisaia hnênah, “Saula awmnaah tu zâwkin nge mi zui dâwn?” a ti a. Abisaia chuan, “Keiman ka zui ang che,” a ti a.

⁷Davida leh Abisaia chu zânah sipai awmnaah chuan an kal a, Saula chu an riahhmun lai takah chuan a mu a, a lu bulah a fei a vit bûr a, Abnera leh a sipaite chuan an lo mut hual a.

⁸Abisaia chuan Davida hnênah, “Hei le, Pathianin i kutah i hmêlma hi a pe ta che a nih hi, khawi nge fei hian leiah ka han chhun bet tlat ang e, nawn leh a ngai tawh lo vang,” a ti a.

⁹Davida chuan Abisaia hnênah, “That suh, LALPA hriakthih chunga kutthlâk tu nge thiam chang awm ang?” a ti a.

¹⁰Davida vêk chuan, “LALPA nunna chhâlin ka sawi e, LALPAN a chungah kutthlâk zâwk sela; a nih loh leh a thih ni a lo thleng emaw, indonaah a la boral mai emaw a ni ang.

¹¹LALPA hriakthih chungah hian kut ka thlâk tawp lo vang, a lu bula fei leh a tuithâwl erawh hi chu la ila, i kal ang,” a ti a.

¹²Tichuan, Davida chuan Saula lu bula fei leh tuithâwl chu a la a, an kalsan ta a. Tu man an hmu lo va, an hre hek lo.

¹³Davida chu râl lehlamah a kal a, tlângchhîpah a ding a, an inkâr chu hla tak a ni.

¹⁴Davida chuan sipaiho leh Abnera chu a au va, “Abner, mi han chhâng dâwn na nge?” a ti a. Abnera chuan a chhâng a, “Lal han au veitu chu tu nge maw i nih le?” a ti a.

¹⁵Davida chuan Abnera hnênah, “Mipa i ni na nge? Israel zîngah tu nge nang tluk awm? Engati nge lal, i pu chu i vên ṭhat loh? I pu that tûrin mi an lo luh kha le.

¹⁶I tih dân hi a ṭha lo, LALPA, mi nung chhâlin ka hrilh a che, LALPA hriakthih i vên ṭhat loh avângin thi tlâk i ni, lal fei leh a tuithâwl, a lu bula mi kha khawiah nge a awm tâk?” a ti a.

¹⁷Saula chuan Davida aw a ni tih a hria a, “Ka fapa David, nang i ni maw?” a ti a. Davida chuan, “Ni e, lalber, ka pu, keimah ka ni e,” a ti a.

¹⁸Davida chuan, “Eng vângin nge ka pu hian a chhiahhlawh hi a ûm le? Eng thil nge ka tiha, eng nge ka tihsual?

¹⁹Lal, ka pu chuan, a chhiahhlawh thu hi lo ngaithla teh se. Min bei tûra tithinurtu che hi LALPA a nih chuan ka inpe mai tûr alâwm; mihring an nih erawh chuan ânchhia dawng rawh se. Chûng mite chuan kan ram Judai ram ata hi min ûmchhuaka, ‘Kal la, pathian dang rawng va bâwl rawh’ min ti a ni ngawt mai alâwm.

²⁰Chuvângin, LALPA awm lohna ramah chuan min that suh se; miin tlânga varung an veh ṭhîn ang hian Israel lal chuan kei uihli mai hi min rawn veh a nih hi,” a ti a.

²¹Saula chuan, “Thil ka lo tisual a ni, ka fapa David, lo hâwng leh rawh. Vawiinah ka nun i zuah avângin i chungah kutthlâk ka tum leh tawh ngai lo vang. Â takin ka lo ûm che a, ka lo tidik lo a nih hi,” a ti a.

²²Davida chuan, “Aw LALPA, heta hi i fei a awm e, i mite zînga pakhat lo kal sela han la rawh se,

²³LALPA chuan mi tin an fel leh rinawm man a pe dâwn si a. Vawiinah nang hi LALPAN ka kutah min pe a, LALPA hriakthih chungah kut ka thlâk duh lo va ni.

²⁴Vawiina i nunna ka zuah ang bawk hian LALPA chuan ka nunna min zuahsak sela, buaina lak ata hi min chhan chhuak rawh se,” a ti a.

²⁵Saula chuan Davida hnênah, “Ka fapa David, lo hmuingîl zêl la, i thil tih apiangah hlawhtling zêl ang che,” a ti a. Davida chu a kal ta a, Saula pawh a hmun lamah a haw ta a.