Read Mizo Lushai LEHKHABU PAKHATNA SAMUELA 27 Bible Online

LEHKHABU PAKHATNA SAMUELA 27 - Mizo Lushai bible

LEHKHABU PAKHATNA SAMUELA 27

¹Davida chu hetiang hian a inngaihtuah a, “Engtikah emaw chuan Saula hian min that ngei dâwn zawng a nih hi, Filistia rama tlan bo aia ṭha hi ka tân a awm dâwn lo a ni; tichuan, Saulan Israel ram chhûngah min zawn a beidawng ang a, a kut ata ka him thei ang,” a ti a.

²A insiam a, amah leh a ho mi zaruk chu Gath lal Maoka fapa Akisa hnênah an kal ta a.

³Davida chu Gath khuaa Akisa hnênah chuan a mite, an chhûngkua ṭheuh nên, a nupui pahnih Jezreel mi Ahinoami leh Karmel tlânga awm Nabala thihsan Abigaili te nên chuan an awm ta a.

⁴Davida chu Gath khuaah a tlân tih Saula an hrilh a; tichuan, a zawng zui ta lo va.

⁵Davida chuan Akisa hnênah, “Min khawngaih la, i rama khaw pakhat min pe la; tah chuan, kan lo awm ang e: engah nge lal khuaah hian i kiangah kan awm ve reng ang?” a ti a.

⁶Chumi ni chuan Akisa chuan Ziklag khua chu a pe a; tûn thlengin Ziklag khua chu Juda lalten an chang hlen ta a.

⁷Filistia rama Davida a awm chhûng chu kum khat leh thla li a ni.

⁸Davida leh a mite chu Gesur mite, Girzi mite, Amalek mite beiin an thawk chhuak ṭhîn a, chûng hnamte chu hmânlai ata tawh Sur ram leh Aigupta ram thlenga lo awm ṭhîn an ni.

⁹Davida chuan chûng ram chu a beih châng apiangin a hmei a pain a that vek ṭhîn a, an berâm te, an bâwng te, an sabengtung te, an sanghâwngsei te, an silhfen te nên a lâksak a. Akisa hnênah a rawn hâwn ṭhîn.

¹⁰Akisa chuan, “Vawiinah tu nge i va rûn le?” a lo ti a. Davida chuan, “Judai ram chhim lam te, Israel-ho chênna chhim ram te, Kanan-ho chênna chhim ram te ka va rûn a ni,” a ti a.

¹¹Davida chuan a hmei a pain tu mah a zuah ngai lo va; a chhan chu, ‘Davida chu hetiangin a che ṭhîn,’ tiin kan chanchin an sawi dah ang e,” a ti a ni. Chu chu Filistia rama a awm chhûnga a tih dân a ni.

¹²Akisa chuan Davida thu sawi chu a awih hle a, “A mi Israel-te huatah a insiam ta si a; chuvângin, kan thuhnuaiah an awm reng tawh dâwn a nih hi,” a tih phah a.