Read Mizo Lushai LEHKHABU PAKHATNA SAMUELA 28 Bible Online

LEHKHABU PAKHATNA SAMUELA 28 - Mizo Lushai bible

LEHKHABU PAKHATNA SAMUELA 28

¹Chûng lai chuan Filistia mite chuan Israel-te do tûrin an sipai an khâwm chiam a, Akisa chuan Davida hnênah, “Nang leh i mite chuan ka sipaite in dopui ngei ang chu,” a ti a.

²Davida chuan, “Dopui e, i chhiahhlawh hian eng nge ka tih ṭhin i hre mai ang,” a ti a. Akisa chuan Davida hnênah, “A ṭhat chu! Mi vêngtu atân i awm kumkhua mai dâwn nia,” a ti a.

³Samuela chu a thi a, Israel mi zawng zawngin an ṭah a; a chênna khua Rama-ah chuan an phûm tawh a. Saula chuan aienthiam te, dawithiam te a ram ata a hnawt chhuak vek tawh bawk a.

⁴Filistia mite chu an pung khâwm a, Sunem-ah ṭanhmun an khuar a. Saula chuan Israel mi zawng zawng a khâwm a, Gilboa khuaah ṭanhmun a khuar bawk a.

⁵Saulan Filistia sipaiho a hmuh chuan a hlau va, a zâm ta a.

⁶LALPA a râwn a, LALPA chuan mumangin emaw, Urim-in emaw, zâwlnei emaw pawhin a chhâng rêng rêng lo va.

⁷Saula chuan a ṭhuihruaite hnênah, “Ka va râwn tûr mitthi thlûk thiam hmeichhia min zawnsak rawh u,” a ti a. Anni chuan, “E tak a, mitthi thlûk thiam hmeichhia pakhat chu Endor khuaah a awm asin,” an ti a.

⁸Tichuan, Saula chu a inbâwl danglam a, thawmhnaw dang a inbel a, mi pahnih hruaiin hmeichhe hnênah chuan zânah an va kal a, a hnênah, “Thlarau min râwnsak la, a hming ka lam chu min koh chhuahsak teh,” a ti a.

⁹Hmeichhia chuan a hnênah, “Ngai teh, Saula thiltihte chu i hria a, engati nge ka thihna tûrin ka tân thang i kam le?” a ti a.

¹⁰Saula chuan, “LALPA hmingin ka tiam e, LALPA mi nung chhâlin he thil avâng hian i thi lo vang tih ka tiam a che,” a ti a.

¹¹Hmeichhia chuan, “Tu nge ka koh chhuahsak ang che?” a ti a. Ani chuan, “Samuela mi koh chhuahsak rawh,” a ti a.

¹²Hmeichhia chuan Samuela a han hmuh chuan a ṭê ṭhawt a, Saula hnênah, “Engati nge Saula ni reng si-a mi bum?” a ti a.

¹³Lal chuan hmeichhe hnênah chuan, “Hlau suh, eng nge i hmuh le?” a ti a. Hmeichhia chuan Saula hnênah, “Lei ata Pathian ni âwm tak lo chhuak ka hmu,” a ti a.

¹⁴Ani chuan, “Eng ang nge a nih?” a ti a. Hmeichhia chuan, “Putar a ni, kawrfual a ha,” a ti a. Saula chuan Samuela a ni tih a hre ta a, bawkkhupin chibai a bûk a.

¹⁵Samuela chuan Saula hnênah, “Engati nge min koh chhuaha, mi tihbuai le?” a ti a. Saula chuan, “Ka mang a ang êm êm a, Filistia miten min rawn bei a, Pathian lah chuan min hawisan ta si a; zâwlnei emaw, mumang emaw pawhin min chhâng ta si lo va; chuvângin, ka tih tûr min hrilh tûrin ka ko ta che a ni,” a ti a.

¹⁶Samuela chuan, “Chutia Pathianin a hawisan chea, a hmêlma i nih tawh si chuan engtizia nge kei mi la rawn koh cheu va?

¹⁷LALPAN ka hnêna a sawi tawh ang khân i chungah a ti a nih chu, LALPA chuan i lalna a chhuhsak che a, i lam hnai a pe tawh.

¹⁸LALPA thu i zâwm lo va, Amalek-ho kha i tihchimih vek loh avângin tûnah he thil hi i chungah a lo thleng ta a nih hi.

¹⁹LALPA chuan nang leh Israel-te chu Filistia mite kutah a pe che u ang a, naktûkah, nang leh i fate chuan min rawn zui ve ang a, LALPA chuan Israel sipaite chu Filistia mite kutah a pe ang,” a ti a.

²⁰Chu veleh Saula chu leiah a tlu a, Samuela thu sawi avâng chuan a hlau ta êm êm a, nilêng leh zankhuaa chaw ei lo a nih avângin a chau hle a.

²¹Hmeichhia chu Saula hnênah a lo kal a, a mangang hle tih a hria a, a hnênah, “En teh, i chhiahhlawhnu hian i thu ka zâwm a, thih leh thih tiin mi hrilh angin ka ti a.

²²Tûnah, i chhiahhlawhnu thu awih ve la, ei tûr ka siam ang che a, chu chu ei la, i lo harh ang a, i hâwng thei mai ang,” a ti a.

²³“Ka ei dawn lo,” tiin a hnial a. A ṭhuihruaite chuan hmeichhe sawi ang chuan ei tûrin an tur a, an thu chu a zâwm ta a; tichuan, lei ata a lo tho va, khumah chuan a ṭhu a.

²⁴Hmeichhia chuan inah bâwngno chawm thau a nei a, a va talh sawk sawk a, chhangphut a la a, a hmet a, dawidim tel lovin chhang a siam a.

²⁵Saula leh a ṭhuihruaite hmaah chuan a hlui a, an ei ta a. Tichuan, an tho va, chumi zân chuan an kal chhuak leh ta a.