Read Mizo Lushai LEHKHABU PAKHATNA SAMUELA 3 Bible Online

LEHKHABU PAKHATNA SAMUELA 3 - Mizo Lushai bible

LEHKHABU PAKHATNA SAMUELA 3

¹Naupang Samuela chuan Elia kaihhruaiin LALPA rawng a bâwl a. Chûng lai chuan LALPA thu a thleng khât hle a, inlârna pawh a thleng zen zen lo.

²Tin, Elia mit chu a chak tawh lo va, khua pawh a hmu ṭha tawh lo va, a dân pangngaiin a mut hmunah chuan a mu a.

³Samuela chu LALPA in, Thuthlung Bâwm hûnna bulah chuan a mu a. Khua a vâra, khâwnvâr an tihmih hmain,

⁴LALPA chuan Samuela chu a ko va. Samuela chuan, “Eng nge ni?” a ti a.

⁵Elia hnênah chuan a kal a, a hnênah, “Eng atân nge min koh?” a va ti a. Elia chuan, “Ka ko lo che, va mu leh tawh,” a ti a. Tichuan, a kal a, a va mu leh ta a.

⁶LALPA chuan Samuela chu a ko leh a; tichuan, Samuela chu a tho va, Elia hnênah chuan a kal leh a, “Eng atân nge min koh?” a ti a.

⁷Samuela chuan LALPA aw a ni tih a la hre rih lo, LALPA aw chu a la hre ngai lo va ni.

⁸LALPA chuan Samuela chu a ko leh a, chu chu a vawi thumna a ni. Tichuan, a tho va, Elia hnênah a kal leh a, “Eng atân nge min koh?” a ti a. Elia chuan naupang chu LALPAN a ko a ni tih a hre ta a.

⁹Elia chuan Samuela hnênah chuan, “Kal la, va mu leh la, a koh leh che chuan, ‘Aw LALPA, thu sawi rawh, i chhiahhlawh hian a ngaithla e,’ ti ang che,” a ti a. Samuela chu a kal a, a va mu leh ta a.

¹⁰ LALPA chu a lo kal a, a ding a, a hmaa a koh ang khân, “Samuel, Samuel,” a rawn ti a. Samuela chuan, “Thu sawi rawh, i chhiahhlawh hian a ngaithla e,” a ti a.

¹¹LALPA chuan Samuela hnênah, “Ngai teh, Israel ramah hian a hria apiang thin tiṭhâwng zawk tûr ka thlentîr dâwn.

¹²Chumi ni chuan Elia chhûngkaw chungchânga ka lo sawi tawh chu a bul aṭanga a tâwp thlengin ka thlentîr ang.

¹³A fapaten Pathian laka thil sual an tih hre reng chunga a khap loh avângin an chhûngkua chu ka hrem kumkhua dâwn tih ka hrilh tawh si a.

¹⁴Chuvângin, Elia chhûngkaw bawhchhiatna chu inthawinain emaw, thilhlanin emaw engtikah mah tihkian theih a ni lo vang’ tiin Elia chhûngkaw chungchâng thu ka lo tiam tawh a ni,” a ti a.

¹⁵Samuela chu zîng thlengin a mu a, LALPA in kawngkhârte chu a hawng a, inlârna thu chu Elia hrilh a hreh hle a.

¹⁶Nimahsela, Elia chuan Samuela chu a ko va, “Samuel, ka fapa,” a ti a. Ani chuan, “Eng nge ni, ka pu?” a ti a.

¹⁷Elia chuan, “Eng thu nge i hnênah a sawi? Ka hnênah eng mah zêp suh; i hnêna a sawi eng pawh ka laka i zêp chuan Pathianin na takin a hrem ang che,” tiin a vau va.

¹⁸Tichuan, Samuela chuan eng mah zêp lovin a hrilh ta vek a. Elia chuan a hnênah, “LALPA a nih chu, ṭha a tih ang zêlin ti rawh se,” a ti a.

¹⁹Samuela chu a lo ṭhang lian deuh deuh va, a hnênah LALPA chu a awm a, a sawi apiang a lo thleng dik zêl a.

²⁰Dan aṭanga Beer-seba thlengin Israel mi zawng zawng chuan Samuela chu LALPA zâwlnei dik tak a ni tih an lo hre ta a.

²¹Silo khuaah chuan LALPA chu a inlâr zui zêl a. Silo-ah chuan LALPA chu thuin Samuela hnênah a inlâr a.