Read Mizo Lushai LEHKHABU PAKHATNA SAMUELA 30 Bible Online

LEHKHABU PAKHATNA SAMUELA 30 - Mizo Lushai bible

LEHKHABU PAKHATNA SAMUELA 30

¹Ni thum nia Davida leh a mite chuan Ziklag an va thlen chuan Amalek mite chuan chhim lam ram leh Ziklag khua chu an lo rûn a, Ziklag khua an lo la a, an hâl vek a.

²Hmeichhiate leh chu khuaa awm zawng zawng, naupang aṭanga tar thlengin salah an man a; tu mah that lovin an hruai a, an lo hâwnpui vek a.

³Davida leh a miten khua an va luh chuan a lo kâng chhe vek a, an nupui te, an fanu leh fapate chu salah an lo hruai vek a.

⁴Davida leh a mite chu nasa takin an ṭap a, chau hnêp khawpin an ṭap a.

⁵Davida nupui pahnih, Jezreel mi Ahinoami leh Karmel tlânga awm Nabala nupui thihsan Abigaili pawh salah an hruai bawk a.

⁶An fanute leh an fapate sala an hruai avângin mite chu an thin a rim êm êm a, Davida chu den hlum an rawt a; chu thil avâng chuan Davida pawh a mangang hle a; mahse, LALPA, a Pathian chuan a tichak thar a.

⁷Davida chuan puithiam Abiathara, Ahimeleka fapa hnênah chuan, “Puithiam kawr kha han la teh,” a ti a. Abiathara chuan Davida hnênah puithiam kawr chu a rawn la a.

⁸Davida chuan, “Min rûntute chu ûm ila, ka la ûm pha ang em?” tiin LALPA a râwn a. Ani chuan, “Ûm rawh, i ûm pha ang a, i chhan chhuak vek ang,” tiin a chhâng a.

⁹Tichuan, Davida chu a hnêna mi zaruk awmte nên chuan an thawk chhuak ta a, Besor lui an va thleng a. Chutah chuan mi ṭhenkhat a hnutchhiah a.

¹⁰Davida chuan mi zali hruaiin a ûm zêl a, mi zahnih erawh kha chu an chauh lutuk avângin Besor lui chu an kai ve thei lo va, an hnutchhiah ta a ni.

¹¹Phûlah chuan Aigupta mi an va hmu a, Davida hnênah an rawn hruai a. Tui in tûr leh chaw ei tûr an pe a.

¹²Theipui chhang hlâwm khat leh grep rah pho ro bâwr hnih an pe bawk a. Tin, chûng chu a han ei a, a lo harh ta a, ni thum leh zan thum lai ei leh in lovin a lo awm tawh a ni.

¹³Davida chuan a hnênah, “Tu mi nge i niha, khawi aṭangin nge i lo kal?” a ti a. Ani chuan, “Aigupta mi, Amalek-ho chhiahhlawh ka ni. Ni thum lai a ni ta, ka dam loh avângin ka puin min kalsan ta mai a ni.

¹⁴Keret mite chênna ram chhim lam te, Judai ram chhim lam te, Kaleb-ho ram chhim lamte kan rûn a, Ziklag khua pawh kan bei bawk,” a ti a.

¹⁵Davida chuan a hnênah, “Chûng ram rûntute hnênah chuan min hruai thei ang em?” a ti a. Ani chuan, “Min that lo tûr leh ka pu kuta min hlân lo tûra in Pathian hming chhâla thu min tiam chuan an hnênah ka hruai ang che,” a ti a.

¹⁶An hnênah chuan a zu hruai ta a, anni chuan Filistia ram leh Judai ram aṭanga an râllâk tam tak chu lâwmin ruai an lo ṭheh a, hmun tinah an lo awm darh a.

¹⁷Davida chuan khawvâr tirh aṭangin a tûk tlai lam thlengin anni chu a bei a; tlangvâl zali, sabengtung chunga chuanga tlânchheho chauh lo chu tu mah dama chhuak reng an awm lo.

¹⁸Davida chuan Amalek miten an lâksak zawng zawng chu a chhuh leh vek a, a nupui pahnih te pawh a chhan chhuak a.

¹⁹Tichuan, naupang leh tar te, an fanu leh fapate leh an thil an lâksak tawh zawng zawng chu kim takin an la kîr leh vek a. Davida chuan a vaiin a hâwnpui leh ta a.

²⁰Davida chuan berâm rual leh ran rual zawng zawng chu a la a, a mite hma lamah chuan an kaltîr a, “Hei hi Davida râllâk a nih hi,” an ti a.

²¹Mi zahnih, an chauh lutuk avânga Davida zui thei ta lo, Besor lui kama an hnutchhiah tâkte hnên chu Davida chuan a va thleng a. Anni chu Davida leh a hnêna kal vete hmuak tûrin an lo chhuak a, Davida leh a mite chuan an rawn pan a, anni chu chibai an bûk a.

²²Amaherawhchu, Davida zuitute zînga mi sualho leh kawhmawh bâwl ṭhînte chuan, “Anni hi kan hnêna an kal ve loh avângin râllâk thil kan va lâkte chu kan pe ve lo vang, an nupui leh an fate erawh chu an hâwnpui thei ang,” an ti a.

²³Davida chuan a chhâng a, “Ka unaute u, chutiang chu a ni lo ve. LALPA min pêk hi chutianga tih tûr a ni lo. Ani chuan min hum a, min beitute chu kan kutah min pe a ni si a.

²⁴He thilah hian tu nge in thu pawm thei ang le? Indonaa zuk kalte chan ang bawk bungraw vênga lo awmte hian an chang ve tûr a ni; inang vekin chan tûr a ni e,” a ti a.

²⁵Davida chuan Israel-te tân chutiang chuan dân leh thupêk a siam nghâl a, tûn thlengin an zâwm ta a ni.

²⁶Davida chuan Ziklag khua a thlen chuan a râllâk sumte chu Judai ram hruaitu, a ṭhiante chu a sem ṭheuh va, “Hei, LALPA hmêlmate laka râllâk ka rawn thawn che u a ni,” a ti a.

²⁷Tichuan, Bethel-a awm te, Rama chhima awm te, Jatira-a awm te,

²⁸Aroer-a awm te, Sifmot-a awm te, Estamo-a awm te,

²⁹Rakal-a awm te, Jerami-ho te, Ken-ho te,

³⁰Horma-a awm te, Borasan-a awm te, Athak-a awm te,

³¹Hebron-a awmte leh Davida chettlat ṭhinna hmuna awm zawng zawng te pawh a thawn vek a.